eSefarad Noticias del Mundo Sefaradi
Keridos amigos, aki toparesh el teksto de mi emision del djueves 25 de avril, ande vo avlar del LA SYEDRA I EL ANTISEMITISMO
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LA SYEDRA I EL ANTISEMITISMO
Edmond Cohen
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 7 de mayo, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
Ay dos semanas de esto, vos avli del Bund, i kon esta okazyon, vos tuve de meldar eskritos antisemitos de Karl Marx. Esto me dyo a pensar ke seriya interesante de ver si es tan vedra ke la derecha es antisemit i la syedra no.
Syempre uvo ombres konservadores i otros pensando ke era bueno de trokar las kozas para ke sean mijor, sovre todo para los proves i flakos. Los primeros son dichos de derecha, en jeneral son bastante rikos i kyeren kedarlo, lo ke les aze ser konservadores. Los otros son dichos de syedra, i munchas vezes proves, kijendo ke las kozas troken porke esperan ansina ser menos proves.
En el siglo 18, syendo ke la Iglesya era en jeneral antisemit, los djudyos no teniyan kaji dingun derecho, i los konservadores keriyan ke esto kede ansina, kuando ombres de progreso komo Montesquieu keriyan ke los djudyos obtengan derechos, i en Fransya el derecho de ser sivdadano franses.
Lo ke vengo de dizir es vedra… ama la vedra no es solo esto. Es mas komplikada (komo kaji syempre). En el kampo de la Iglesya, aviya un cura, el Abbé Grégoire, ke lucho en favor de los derechos de los djudyos. I en el kampo de los filozofos de progreso, aviya Voltaire, ke aborresiya a los djudyos, i eskriviya, por egzemplo, sovre los djudyos : « un puevlo ignorante i barbaro, ke aune desde muncho tyempo la mas desgustante eskasura a la mas detestavle superstisyon i al mas invinsivle odyo para todos los puevlos ke los acheta i los enrikese…esta nasyon es, en munchos puntos, la mas detestavle ke tenga nunka ensuzyado la tyerra. »
Es vedra ke, kuando uvo la Revolusyon en Fransya, son los deputados de la syedra, a la kontra de lo ke keriyan los deputados de la derecha, ke dyeron la sivdadaniya franseza a los djudyos. Ama es vedra ke los djudyos de Bayonne i de Bordeaux ya teniyan esta sivdadaniya del tyempo de los reyes. Es vedra tambyen ke, un anyo antes de la Revolusyon, el rey de Fransya, Louis XVI, aviya demandado a su ministro Malesherbes de estudyar lo ke se puediya azer en favor de los djudyos.
I es vedra tambyen ke en 1794, los deputados i administradores de Alsace, jakobinos de la syedra lo mas a la syedra, eskriviyan kozas inkreivles de antisemitismo, ke vos meldi kuando vos avli aki de la Revolusyon i los djudyos : un dekreto ke kyeren tomar los Revolusyonaryos de la Alsace del sur deskrive los djudyos komo « ombres perversos », sin zahutes, sin onestad, sin uzansas, « ensuzyados de krimenes », komo « monstres ke paresen perteneser solo por el eksteryor a la espesye umana », komo una « RASA » arrebashada i mamzer (une race dégradée et abâtardie) . « Su EGZISTENSYA es un pezgo indinyo a ombres liberos, una desgrasya publika ke no se puede SIN KRIMEN tolerar en un govyerno popular ».
El 27 de junio 1794 , los Administradores del Departamento del Bas-Rhin embiyan a Hentz, reprezentante en misyon, kijo dizir deputado embiyado en provinsya, una letra diziendo, a propozito de los djudyos :
« En vano una nasyon djeneroza i sensivle los admityo en su pecho…arrepushan la mano apiadoza ke la filantropiya les tendiya, i persistyendo en sus aboresyon fanatika, sus korason se syerra a la gratitud para solo avrirse …a la estruisyon de este mizmo puevlo ke keriya abrasar en eyos a muevos ermanos…El rovo, la inaktividad i la inutilidad tyenen syempre formado el esprito insosyal de esta nasyon barbara…Todos los esfuersos, todos los kudyados, todos los modos de konvensimyento, mismo de vyolensya se rompyeron frente a la ramayud, los fitiles i la negrigura del puevlo del Dyo. Agora kale arrankar plantas parazitas de la tyerra de la libertad. Te propozamos dunke, sivdadano reprezentante, de ordenar :
– primo, ke todos los djudyos los mas rikos seran metidos en prezo asta la paz, i despues echados de Fransya por syempre
-sigundo, ke todos los otros, ombres komo mujeres, seran embiyados en los kazales del interyor, metyendo en kada uno lo mas poko posivle, ovligandolos de no poder, kon la menasa de las penas las mas duras, irse mas leshos ke kuatro kilometros, forsandolos de prezentarse kadal diya a la munisipalidad, al komite de sorvelyansa, ovligandolos a los lavoros de los kampos, de las karreteras i de los atelyes, asigun sus fuersas i sus sekso ;
3, ke todas sus kriaturas machos o embras, (mâles ou femelles, dize el teksto komo si se tratava de animales) desde dodje anyos i menos, seran embiyados en kazas i ospisyos publikos, para resivir una edukasyon nasyonala, para ambezar artes i ofisyos, enfin para adkirir un diya zahutes i talentos ke agan olvidar a los krimenes de sus padres. Las kriaturas, en una Republika, no pertenesen a sus padres, pertenesen a la patria. Las medidas ke te propozamos de tomar son duras, sivdadano reprezentante, ama no kale ezitar entre ombres i la patria, entre una nasyon fanatika i barbara i el saludo de un puevlo libero. »
Lo ke vos vengo de meldar no es un artikolo de gazeta, es un dokumento ofisyal…no eskrito por la derecha, ama por la syedra de la syedra.
Esto dicho, kuando Napoleon, eredero de la Revolusyon, toma el poder al empesijo del siglo 19, el es ke da emansipasyon a los djudyos de los munchos paizes ke konkista. Su ermano es ke eskapa kon la Inkizisyon en Espanya, todas kozas ke van a kaer a basho kon la kaida de Napoleon.
En el siglo 19, a la syedra son, a lo menos en Fransya, los primeros sosyalistos.
I por dizir la vedra, la mayoriya son antisemitos, i no poko.
Charles Fourier eskrivyo tanto kontra los djudyos ke no puedo todo kontarvos. Meldaré solo, por egzemplo : « Los djudyos, kon sus kostumbres merkantiles, es ke no son la landre del Puerpo sosyal ? (…) Si el tyempo los enderechava, es ke no se seriyan enderechado en Londres, ande son admetidos desde muncho tyempo i ande azen ofisyo de korrer las kayes, enkorajande los ijos de famiya a arrovar, ets ? »
Proudhon, en su tefteriko : « Djudyos. Azer un artikolo kontra esta rasa, ke entosiga todo, enkashandose en todos lugares, sin nunka derritirse en dingun puevlo. Demandar su ekspulsyon de Fransya, salvo los ke son kazados kon fransezas ; supremir los kales, admeterlos a dingun empleo, persegir enfin la anulasyon de este kulto. No es por nada ke los kristyanos los yamaron deisides. El djudyo es el enemigo del jenero umano. Kale reembiyar esta rasa en Asia, o masakrarla…Por el fyerro o por el fuego, o por la ekspulsyon, kale ke el djudyo dezaparese…Achetar los viejos ke no konkrian mas. Lavoro de azer. Lo ke los puevlos de la Edad Medya aborresiyan por instinkto, yo lo aborresko kon penseryo i para syempre. El odyo del djudyo komo del ingles deve ser muestro primer artikolo de fey politiko. »
De Marx (ke por tanto era djudyo) i de Engels, ya vos avli en mi emisyon sovre el Bund. Ke ayga una organizasyon sosyalista de ovreros djudyos nunka impidyo a la syedra antisemita de ver en los djudyos solo rikinyones kapitalistos.
Karl Marx : « Kualo es el kulto profano del djudyo ? El trafiko. Kyen es su Dyo profano ? La para. »
El mismo Karl Marx, eskrivyendo a su amigo Engels : « Este esyerkol de korespondante berlineze del Daily Telegraph es un cifut (youpin en franses, no se komo lo eskrivyo en alman) de alkunya Meier, paryente del proprietaryo del echo, un cifut ingles de alkunya Levy ».
En kuanto a Engels, avlando en la gazeta de los djudyos polakos : « Esta rasa, la mas suzya de todas… »
Jules Guesde funda un « partido ovrero de Fransya » . En su gazeta Emile Moreau, uno de sus partezanos, eskrive : « En vedra el govyerno de la Evropa, la direksyon de sus echos esta entre las manos de un sindikato israelito ke aze luvya i ermozo tyempo en la politika evropea i akoje todas las ganansyas. La burgeziya katolika aprovo de impedir esta akumulasyon de las rikezas mundyalas, ke da espanto, entre las manos de los ijos de Abraham, de Isaac i de Yaakov, ama syempre fue vensida…Kualkyer koza ke se aga, es el mozaïko sindikato ke ganara. »
Jules Guesde le responde : « Es vedra ke la finansya esta entre las manos de los semites ke sus vida desde siglos afuera de toda proprieta terriana a preparado, akostumbrado a la propriedad movilyara i a su uzo ». Jules Guesde es el « moderador »…
Esto todo amostra ke Adolf Hitler, kuando entro en el partido del nasyonal sosyalismo, kijo dizir del sosyalismo nasyonal, (porke no kale olvidar ke en el byervo nazi ay el byervo sosyalismo) tuvo solo de akojer lo ke sosyalistos vinidos muncho antes de el ya aviyan dicho i eskrito.
I los komunistos ? Ofisyalmente luchan kontra el antisemitismo, ama kuando la polisiya franseza aferra, el 20 de junyo 1940, a una militanta komunista, topa sovre eya un tefteriko, agora en los arshivos de la Sivdad de Paris. En este tefteriko esta eskrito lo ke van a dizir los komunistos a los Almanes, ke vyenen de entrar en Paris solo sesh diyas antes, el 14, en favor de la reavyertura de la gazeta l’Humanité.
« Semos komunistos, tenemos aplikado la linea del partido komunisto. Basho Daladier, Reynaud, djudyo Mandel. Djudyo Mandel mos a enkarselado i a fuzilyado a ovreros ke sabotavan Defensa Nasyonala. No mos sometimos frente a la diktadura djudyo Mandel… » Por los ke no lo saven, el djudyo Georges Mandel, ke aviya sido ministro, fue aferrado i matado por los Fransezes de la Milisya en 1944.
En Rusia, despues del pakto jermano-sovietiko, Staline da a los almanes los komunistos i antifascistos almanes refujyados en Rusia, lo mas djudyos.
Despues de la gerra, el 12 de agosto de 1952, aze fuzilyar a 13 poetas i eskrivanos yidisch.
En el mismo tyempo los komunistos Tchekoslovakos aferran a 14 sozde konspiradores dirijidos por Rudolf Slansky. Entre eyos 11 djudyos. Sovre los 14, onze son kondenados a muerte i matados.
En janvier 1953, Staline aze meter en prezo a 9 doktores, entre eyos sesh djudyos, akuzados de tener matado a dos kapos komunistos, es la sozde konspirasyon de los asasinos en bluza blanka, konspirasyon de « burgezes syonistos ».La muerte de Staline el 5 de marso 1953, va permeter la liberasyon, el 5 de avril, de syete de los 9. Dos ya muryeron durante los interogatoryos.
Despues va empesar el martiryo de los refusniks, estos djudyos ke demandan a ir en Israel, i son echados en el Gulag.
En la Polonya de 1968, kedan muy pokos djudyos por modo de la shoa, ama yene Gomulka aharva a munchos djudyos ke tyenen postos importantes i los aze echar en prezo komo « syonistos ».
Dainda no avli de una syerta syedra frente al sionismo.
Ya savemos ke el trotskismo, syendo internasyonalisto, es kontra el sionismo, ke kyere una nasyon para los djudyos.
Ama los komunistos del partido komunisto van muncho mas leshos. Los mayores Komunistos de sivdades serka de Paris arresivyeron estos diyas kon grande onor a tres asasinos palestinyanos, para selebrar el 17 de avril, diya para la liberasyon de los prezoneros palestinyanos ( ke eyos demandan la liberasyon de todos los prezoneros, dunke inkluyendo los asasinos de kriaturikas djudiyas inosentes.) Por siguro, los komunistos van a dizir ke no son antesemites. Vos desho de djusgar…
Los komunistos maoistos son tambyen kontra el syonismo, ama algunos, mas ke otros. Kayi ayer sovre una « letra avyerta del PCMLM (penso ke es el Partido Komunisto Marxisto Leninisto Maoïsto) a la Bandiera Kolorada ( ke parese ser el organo del « Partido Komunisto Maoisto de Fransya). Deke vos avlo de esta letra avyerta ? Porke, entre estos dos partidos maîstos, kualo es la diferensya ?
Kale meldarlo, i vash a entender : « Tenesh en agosto 2006 firmado un dokumento kon el Partido Komunisto Maoïsto de Italya ande se avla del Estado Nazi-sionisto de Israel. (…) Es korekto de analizar el syonismo komo un movimyento fasisto. Ama atribuar al fasismo de tipo kolonyal ke es el Estado syonisto las karakteristikas del fasismo de tipo imperyalisto de la Almanya nazista es azer revizionismo istoriko ». Me kedo aki de mi meldadura de este dokumento, ke kontinua por tanto kon su deliryo. Keriya solo amostrarvos kualos son las preokupasyones aktuales de los varyos Maoistos…
En kuanto a los sosyalistos de agora, no kale olvidar tampoko ke Mitterrand el prezidente sosyalisto serro todos los tefteres de kriminales kontra la umanidad persegidos en Fransya, i ke solo fue kuando el prezidente de derecha Chirac tomo el poder ke fue posivle de djusgar a estos kriminales.
Agora ya vino la ora de eskapar mi emisyon. Kualo kije azer kon esta emisyon ? Pretender ke toda la syedra es antisemita ? Por siguro no. De todo tyempo uvo una syedra amiga de los djudyos, ke los ayudo en tyempos difisiles, ke les dyo en Fransya la sivdadaniya i todos los derechos, ets En 1968 los mansevikos de la syedra franseza kaminaron en las kayes gritando (en favor de Daniel Cohn-Bendit menasado de ekspulsyon en tanto ke alman) « Semos todos djudyos almanes ! »
La sola koza ke kije amostrar es ke no es bastante ser de syedra para ser amigo de los djudyos, indimas de Israel. I no es porke uno es de derecha ke de manera sigura es antisemit.
Al djueves ke vyene, si kyere el Dyo !
