eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar de mi lavoro el haham Farhi, i tambyen Tito Jacob, el kunyado de Liliane.
Saludos a todos
Edmond Cohen
Paris, Fransya
LA MUZIKA I LOS DJUDYOS
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Dainda no aviya empesado de darvos haberes de los atelyes de konversasyon de la asosyasyon Vidas Largas, syendo ke solo empesaran por de muevo el martes 13 de novyembre a las dos i medya. Ama kale azer dikat: no se tendran mas en el lokal ande estavamos el anyo pasado. Se van a tener al mismo adereso ande estavamos antes, kijo dizir en el Centre Communautaire, 119 rue Lafayette, Paris (10°) métro Poissonnière o Gare du Nord.
Oy pensi de avlarvos de la muzika en la vida djudiya, i ya savesh kuanto entra la muzika en muestra vida de djudyos.
Empesaremos pour el empesijo, lo ke savemos de la muzika del tyempo del Tanah.
Desdel empesijo, en Bereshit, kapitulo 4, pasuk 21, esta eskrito ke Yuval « fue padre de todo travan vihuela (gitarra) i organo », dunke aviya muzikantes antes mismo del diluvyo.
Komo ya lo savesh, el Tanah mos avla muncho de kantar, de bailar i de djugar muzika. No tengo menester de akodrarvos komo Yeshua izo djugar shofar delantre las paredes de Jericho, ke kayeron, o de akodrarvos David manseviko ke djugava kinor para trokar las ideas negras del rey Saul, i ke mas despues va bailar i kantar delantre de la Arka.
En el ultimo psalmo, el 150, puedemos meldar (pesukim 3 a 5) en la Biblia de Ferrara: « Alabaldo (el Dyo) kon sonido de sophar, alabaldo kon gayta y harpa. Alabaldo con adufle y bayle, alabaldo con estrumentos y organo. Alabaldo kon retenyideras de oida, alabaldo kon trompetas de aublacion».
El shofar, no tengo menester de dizirvos lo ke es.
La gayta, es el ladino por el byervo ebreo nevel. Ama kualo es una gayta? Kualo es un nevel? Aki empesan las difikultades. Si miro en un diksyonaryo espanyol, la gaita es una flauta. Si miro en un diksyonaryo ebreo, el nevel es una arpa, una lyra. Komo saver? Me fui a bushkar en mis varyas biblias:
Nevel es tradusido harpe (arpa) por Chouraqui i la Biblia de Jerusalem, luth (laud) por el rabbinato i por Segond. Todos paresen d’akodro para dizir ke el nevel no es una flauta. Parese dunke ke aki la Biblia de Ferrara se yerro.
La harpa es el ladino por el byervo ebreo kinor. Aki todos son d’akodro, salvo ke Chouraqui i la Biblia de Jerusalem, ke ya aviyan tomado arpa para nevel, aki trasladan kinor, el primero por lyre (lyra),la sigunda por cithare (sitarra), lo ke se asemeja un poko.
Adufle, el ladino por el byervo ebreo tof, es un pandero.
Bayle es el ladino por el byervo ebreo mahol.
Estrumentos i organo trasladan en ladino los byervos ebreos minim i ugav. Asigun mi diksyonaryo de ebreo, minim es un laud. I mi diksyonaryo es d’akodro ke ugav es un organo. Para mis otras biblias, es solo una flauta…
I agora ke son las retenyideras de oido, las trompetas de aublacion?
Retenyidera es el ladino por el byervo ebreo tsiltsel, ke asigun mi diksyonaryo de ebreo es el simbalo, dunke un estrumento ke se chaptea. Ama despues el mismo byervo tsiltsel vyene trasladado, en la Biblia de Ferrara, por trompeta, ke es un estrumento ke se sofla, komo el shofar. Deke trokar de traduksyon? Puede ser porke la aublasyon, la terua en ebreo, es el byervo para rosh Hashana, yamada en Bamidbar, kapitulo 29, primer pasuk, yom terua, el diya del grito de las trompetas.
Tomi un poko de tyempo para estos estrumentos de muzika yamados en tres pesukim de los psalmos, para amostrarvos ke, syerto aviyan munchos estrumentos desde el tyempo del Tanah, ama tambyen ke kuando se bushka kon presizyon a kualo koresponden los byervos ebreos para yamarlos, las kozas no son tan kolay. El ke melda una sola traduksyon no se da kuenta de esto.
Esto dicho, mos keda ke los djudyos izyeron muzika desde muncho tyempo, i esto es lo ke keriya amostrarvos.
Esta tradisyon de alavar al Dyo kon muzika se mantuvo asta oy. Kuando uno se va en el kal, la primera koza ke se oye es ke todo el ofisyo es kantado. En primer de todo la meldadura de la perasha. El ke melda la tora la melda sovre pergamino, sin nekudot, los puntos ke markan las voyelas, ama tambyen sin taamim, estos signos muzikales sovre los tekstos ke son eskritos sovre los livros en papel. El ke melda la tora tyene en vezes al lado de el, para ayudarlo, uno ke tyene el teksto en papel kon los teamim, i kon los dedos aze signos al meldador de lo ke son los teamim. I el meldador kon un ojo melda i kon el otro ojo mira la mano de su ayudante…egzaktamente de la misma manera ke en un orkestra el muzikante melda sus notas kon un ojo, i kon el otro ojo mira los djestos del kapo de orkestra. Manera de avlar, porke a kada vez ke veo un kapo de orkestra menearse, veo ke los muzikantes no azen dingun dikat a sus djestos, i solo meldan sus notas. Ama kon esto me esto aleshando de mi istorya.
Lo ke keriya dizirvos, es ke si no ay en el Tanah notas de muzika komo egzisten oy, yene ay taamim ke son signos muzikales.
Se puedriya azer una emisyon entera sovre los teamim, ama mijor seriya una emisyon de televizyon, para amostrarlos, dizyendo komo se yaman i lo ke azen. Komo esto no lo puedo azer a la radyo, vos kombido de ir a mirar sovre wikipedia el byervo cantillation hébraïque en franses, o solo cantillation en ingles.
En mas de la meldadura de la perasha komo de la haftara, en vedra todas las orasyones del kal se kantan. I no solo las orasyones. Mismo las meldaduras del Talmud, ke son estudyos i diskusyones entre hahamim, se kantan tambyen. El vyernes a la tadre, en el ofisyo, se melda un largo estudyo del Talmud sovre las luzes ke se pueden uzar para shabath i el azete kasher i el ke no es kasher, asigun tal haham i tal otro. I mismo este estudyo se kanta, i se kanta de tal manera syempre la misma.
No vos vo ambezar ke al lado del haham eskojido por su savidurya, el kal tyene un hazan eskojido por su boz. Lo ke no kyere dizir ke el hazan es un bovo ke solo save kantar. En la mayoriya de los kavzos el hazan el tambyen tyene una grande savidurya afillu si no tanto ke el haham. Ama el haham tyene ensima su boz. Agora los grandes hazanim azen diskos. Yo tengo diskos del hazan Izak Algazi ke kantava antes de la gerra a la manera de Izmir. Tambyen ande los Ashkenazim ay hazanim muy famozos, kon bozes de opera.
Esto es por la muzika relijyoza, ama ay tambyen una muzika djudiya ke no es relijyoza. La muzika akompanyo a los djudyos, por lo ke se puede saver, todo el tyempo ande bivyeron en Erets Israel, no solo para el Templo o el kal, ama tambyen para las alegriyas i las fyestas.
Kuando vinyeron los diyas pretos del egzilo, los djudyos kontinuaron kon la muzika, ama inspirandosen de las melodiyas i de los ritmos de la djente ande se topavan, de tal manera ke la muzika de los djudyos fue diferente asigun los paizes ande se fueron.
Los djudyos ke estavan basho la dominasyon de los arabos adoptaron una muzika serka de la muzika araba. Los djudyos de los paizes kristyanos adoptaron una muzika, vamos a dizir oksidentala. Por lo ke es de los djudyos de Espanya, komo ya lo savesh, en medyo de la Edad Medya los kristyanos estavan al norte i los arabos al sur. Los djudyos, ke se topavan de las dos vandas, kompozaron romanses i kantes influensados a la vez por los kristyanos del norte i los arabos del sur. Kuando los kristyanos konkistaron toda la Espanya i echaron a los djudyos en 1492, los djudyos se yevaron kon eyos sus muzika, sus kantes i sus bayles. Los ke fueron akojidos en el imperyo osmanli guadraron no solo sus lingua, ama tambyen sus muzika i sus kantes, ama yene fueron influensados por la muzika de los turkos, eya misma influensada por los arabos.
Los djudyos espanyoles kontinuaron de kantar en espanyol, ama kon palavras ande se avla delos kaminos de Sirkidji o de los bilbilikos. Adoptaron los estrumentos de muzika de los turkos, i mismo algunos djudyos se metyeron tambyen a kantar en turko i a la turka, komo por egzemplo el hazan Izak Algazi, ke kantava syerto en lashon syendo ke era hazan, ama tambyen en espanyol o en ladino, i tambyen en turko. Por esto es ke los turkos teniyan en grande konsiderasyon el kantador Algazi efendi.
En kuanto a los ashkenazim, eyos tambyen fueron influensados a la vez por las muzikas de los rusos i polakos, ama tambyen de los chinganés, i esto todo dyo una muzika partikolar muy ermoza kon kantes en yiddisch.
Kuando estos ashkenazim se fueron en Amerika, al empesijo del siglo vente, deskuvrieron la muzika de los pretos, el jazz. Los unos, komo Benny Goodman, Artie Shaw o Mezz Mezzrow, adoptaron el jazz, djugando komo si eran pretos eyos mismos. Kale saver ke el orkestra de Benny Goodman fue el primer orkestra ande pretos i blankos djugaron en djuntos. Otros, komo George Gershwin, inventaron lo ke yamaron el jazz sinfoniko.
Ama esto todo no se puede yamar muzika djudiya. A la roves, la influensa del jazz dyo para otros djudyos lo ke se yama agora la muzika klezmer, de los dos byervos ebreos kele zemer, estrumentos de muzika. La muzika klezmer, ke a mi me agrada muncho, es una meskla del jazz kon la muzika djudiya venida en Amerika de la Evropa del Este. Agora la muzika klezmer mos vino atras de los Estados Unidos, i ay munchos orkestras klezmer en Fransya, komo, por egzemplo, el Orient Express Moving Schnorrers – solo el nombre ya me mete en alegriya.
Kale dizir ke, aki en Fransya, se puede oir no solo klezmorim ama tambyen un alay de kantadores, o mas preszizamente, no se deke, de kantaderas, en djudeo-espanyol (Marlene Samoun, Sandra Bessis, i tantas otras). En vedra, kreo ke ni una es haliz djudeo-espanyola, de la misma manera ke agora munchos klezmorim no son djudyos del todo, ama, komo se dize, la muzika no tyene fronteras.Kuando fuimos resividos aze poko en el Sentro Medem, tuvimos la tadre un konserto muy ermozo, solo de kantes sefaradim.Por tanto, la kantadera, Sarah Hirschmuller, es una djudiya ashkenaziya, i su muzikante akompanyador, Rabah Hamrene, es un arabo kon muncho talento.
No kale olvidar tampoko, en Fransya, los muzikantes djudyos de Afrika del Norte, komo Enrico Macias, ke eyos djugan a la manera de los arabos.
Por lo ke es del estado de Israel, no ay de enkantarse ke se tope en este pais las influensas meskladas de un alay de muzikas diferentes, la rusa kon la yemenita, por egzemplo. Agora, munchos kantadores israelyanos kantan rock i rap en una muzika ke no tyene nada de djudyo. A mi me agradava mijor el tyempo de Yafa Yarkoni i de mi kerida Shoshana Damari la yemenita, ke saviya dar una kolor kayente a todo lo ke tokava. Mos keda Yeoram Gaon, ke mos tresale kon sus kantes en djudeo-espanyol afillu si los yama ladino.
Agora kualo dizir de la muzika klasika? Era en oksidente la muzika ke se djugava para los Senyores, i los djudyos no kompozaron, por lo ke se, asta el siglo 19, ande vimos djente komo Mendelsohn o Meyerbeer, o Offenbach. En jeneral, por lo ke me parese, ama no konosko bastante la muzika para djusgar, la muzika de estos kompozitores no tyene muncho de djudyo. De toda manera, tan Mendelsohn komo Offenbach, el mismo por tanto ijo de hazan, se konvertyeron al kristyanismo.
En el siglo vente uvo Arnold Sshoenberg o Darius Milhaud, ama yo no so kapache de dizir si para eyos se puede avlar de muzika djudiya.
A la rovez, un Max Bruch eskrivyo un muy ermozo Kol Nidre sin ser djudyo. Se dize la misma koza por Maurice Ravel ke eskrivyo un kadish, ama por lo ke es de Ravel esto mas shupeli, syendo ke afillu si puede ser no se save, la alkunya Ravel es una alkunya djudiya. Lo travo del livro Les Juifs à Paris (los djudyos en Paris) de Léon Kahn (1889), livro ke me regalo el haham Botton zl, mi maestro de Talmud Tora. Aya se puede meldar ke, entre los myembros de un kaliziko de Paris aviya un Salomon Ravel i en un otro un David Ravel. Por esto, asigun mi, si Maurice Ravel eskrivyo un kaddish, deve ser porke ya se konosiya orijenes djudiyas (de la vanda de su padre de ande le vyene su alkunya).
Esto dicho, no es porke un kompozidor o un kantador es djudyo ke su muzika se puede dizir muzika djudiya. Sino una grande parte de la muzika livyana franseza seriya djudiya, kon Serge Gainsbourg, Barbara, Francis Lemarque, Jean-Claude Goldman, i tantos otros.
De la misma manera ay un alay de grandes tanyedores klasikos de violon o de piano ke son o ke fueron djudyos, ama esto no me parese ser muzika djudiya. Agora son japonezes o kinezos, esto no aze tampoko muzika kineza.
La sola koza ke se pueda dizir, es ke los djudyos syempre tuvyeron un atadijo kon la muzika, kual ke sea, i ke ay entre tantas muzikas del mundo syertas melodiyas ke pishin tyenen una savor djudiya. Ke sea Kuando el rey Nimrod o A yidishe Mame.
Astal djueves ke vyene, si kyere el Dyo!
Edmond Cohen
