eSefarad Noticias del Mundo Sefaradi
Keridos amigos, Mi emisyon de este djueves va ser sovre la kodifikasyon de la alaha.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
LA KODIFIKASYON DE LA ALAHA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes primo de avril, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Oy me vo atrivir de azer una koza un poko yuch para mi, syendo ke vos vo avlar de unos kuantos livros ke no solo no meldi, ama ensima son livros relijyozos eskritos en ebreo, i yo ni so tanto relijyozo ni se tanto el ebreo. Ama yene me parese menester ke sepash un poko komo se fraguo a poko a poko muestra kodifikasyon relijyoza, lo ke se yama alaha, la manera de azer i no azer para un djudyo.
Komo ya lo savesh, Moshe Rabenu resivyo la Tora, ke yamamos tambyen la ley, direktamente del Dyo, kuando estava arriva del monte Sinay. La Tora es yamada tambyen el humash porke es dividida en sinko livros: Bereshit, Shemot, Vayikra, Bamidmar, Devarim. En kada livro se topan varyas leyes, lo mas en Vayikra, ama no solo en este.
I asigun los hahamim, al lado de la ley eskrita, el Dyo avlo tambyen a Moshe dizyendole kozas ke no se topan eskritas, lo ke se yama la ley orala, ke aze uno kon lo ke esta eskrito. (Esto es lo ke no kreen los Karaitos)
En primero la ley orala se trasmityo de boka a oreja, ama kuando los Djudyos tuvyeron las desgrasyas de la kaida de Yerushlayim kontra los Romanos en 70 i yene en 135, se espantaron los hahamim ke los ke konosiyan la ley orala puediyan ser todos matados por los Romanos, por esto fue eskrita la ley orala, mas o menos entre las dos rebueltas, entre Yohanan Ben zakay i Yehuda Hanasi, i esto fue la Mishna, eskrita por hahamim yamados tanaim.
Esto todo ya lo dishe aki en 2012 kuando ize mi emisyon sovre el Talmud. Sovre la Mishna yo vos diziya: «. (La Mishna) se divide en sesh partes yamadas sedarim. Kada seder se divide entre syete a dodje tratados yamados masehot.
Por egzemplo el primer de los sesh sedarim se yama Zeraim (las granas). Onze masehot azen parte de este primer seder Zeraim, konsagradas sovre todo a la agrikultura i a las berahot. La primera masehet, el primer tratado, se yama djustamente Berahot.
Ama este teksto no es klaro, i los hahamim ke vinyeron despues de estos tanaim, autores de la Mishna, i ke fueron yamados los Amoraim, empesaron komentaryos de la Mishna. Unos estavan en Erets Israel, sovre todo en Galilea, otros estavan en Babiloniya, sovre todo en Sura i Pumbedita. El komentaryo de la Mishna por los Amoraim se yama la Gemara. I la Mishna kon la Gemara despues forman lo ke se yama el Talmud.
Ama los de Erets Israel eskrivyeron los primeros, en arameo, una Gemara i los de Babiloniya eskrivyeron despues una otra Gemara. El Talmud kon la Gemara de Erets Israel fue yamado Talmud Yerushalmi, i el Talmud kon la Gemara de Babiloniya fue yamado Talmud Bavli. El Talmud Bavli syendo mas lavorado i de mijor kualidad ke el Talmud Yerushalmi, agora kuando se avla solo del Talmud sin dizir el kual, kale entender ke es el Talmud Bavli.
En el Talmud se topan dos modos de eskrivir, ke son la alaha i la agada. La alaha son la leyes ke rijen la vida del djudyo, a la vez su vida personala, su vida relijyoza, i su vida kon lo otros. La agada, por su parte, es mas morala ke juridika, i es echa de kuentos, de komentaryos, ets.
El lavoro de la Gemara se eskapo kon los Amoraim verso los 500 asigun unos, i asigun otros kon los Savoraim verso los 700. Lo ke es siguro, es ke el Talmud el mismo fue komentado, en primero por los Geonim entre 600 i 1000, despues por varyos hahamim : Rabenu Gershom, Rabbenu Hananel, Nissim Gaon. Ama de leshos el mas famozo, i kon razon, komentador del Talmud fue Rashi en los anyos 1100. Komento la totalidad del Talmud de manera klara, i pishin fue indispensavle para entenderlo, de tal manera ke kuando por la primera vez el Talmud fue imprimado, el teksto de Rashi fue metido al lado del texto del Talmud, en karakteres espesyales por esto yamados karakteres Rashi. Una vez imprimado de esta manera, el Talmud izo 5.894 pajinas. Kada pajina es imprimada de la misma manera : en medyo de la pajina el teksto de la Mishna segido de su komentaryo por la Gemara, i al rededor el komentaryo de Rashi i el de los Tosafistos (los ke adjuntan) ke vinyeron despues de Rashi.»
Ama esto dicho, no kale konfundir komentar el Talmud i kodificar las alahot (vamos a dizir leyes) del Talmud. El lavoro de kodifikasyon ya empeso antes de Rashi kon los Geonim:
– Ahaï de Shabha (680-752) Su ovra, la primera eskrita despues del Talmud verso 750, se yama las Sheiltot, ke son 182 estudyos alahikos travados de las parashiot (meldaduras de Tora de kada semana).
-Yehudaï bar Nahman Gaon, ke fue Gaon de Sura, en Babiloniya, entre 760 764. Su ovra se yama Halahot pesukot
– Siméon Kayyara, despues de eyos, eskrivyo la ovra yamada Halahot gedolot entre 800 i 850.
-Haï Gaon (939 – 1038) ultimo gaon de Pumbedita, eskrivyo munchas teshuvot (repuestas) i a lo manko tres tratados sovre kuestyones alahikas: uno (eskrito en arabo) sovre las kompras, uno sovre el kredito, tradusido en ebreo komo sefer amashkon, uno sovre las kondisyones, tradusido komo Mishpete atenaïm.
Estas todas ovras ke vinyeron despues del Talmud konstituyen un primer empesijo de kodificasyon de las halahot.
Los ke van a vinir despues de eyos van a aprovar de azer un lavoro mas jeneral i kompleto.
El primero va ser Itshak Alfassi, yamado el Rif (Rabi Itshak alFasi) (1013 – 1103). Su haliz nombre era en vedra Itshak ben Yaakov haCohen, ama fue yamado Al Fasi porke, afillu si nasyo en Aljeriya i muryo en Espanya, bivyo lo mas de su vida en la sivdad marrokiya de Fes.
Su ovra mayor es el Sefer aalahot, yamado tambyen Hilkot aRif. Esta ovra trava las alahot de los tres sedarim del Talmud: Moed (fyestas) Nashim (mujeres) i Nezikin (danyos) i tambyen los tratados Berahot (Bendisyones, ke se topa en el seder Zeraïm-semyentes) i Hulin (kozas profanas). ke se topa en el sefer Kodashim -kozas sagradas). En todo 24 tratados.
Alfassi toma las desizyones salvo las ke valen solo para Erets Israel, i sin las diskusyones antes. I no se okupa tampoko de las kuestyones de Agada. Su lavoro va ser muy famozo i va muncho ayudar a los ke van a vinir detras de el, i por empesar el grande Rambam.
No tengo menester de prezentarvos uno de los mas famozos, sino el mas famozo djudyo de la Edad Medya: Rabi Moshe Ben Maimon (1135- 1204), tambyen konosido komo Rambam o Maimonides.
Entre todas las ovras de Rambam, su mas famoza es el Mishne Tora (repetisyon de la Tora), tambyen yamada Yad Hazaka (Mano fuerte) eskrita entre 1170 i 1180.
En esta ovra Rambam trata de todas las alahot, reglas, ke sean para su tyempo, o mizmo para el tyempo del Bet Amikdash, el Templo de Yerushalayim.
Trata de las 613 mitsvot,ke Rambam divide en dos: las 248 de azer; i las 365 de no azer.
La ovra se divide en 13 livros, eyos mizmos divididos en tratados:
1)Primer livro Mada (konosensya): los prisipyos esensyales del djudezmo
Se divide en 5 tratados:a)Yesode atora (los prinsipyos de la Tora)
b)Deot (predispozisyones morales)
c) Ilhot talmud tora(reglas sovre el estudyo de la tora)
d)Avoda zara vehukat agoyim (Idolatriya i uzos paganos)
e)Ilhot teshuva (reglas sovre el arrepentimyento)
2 )Sigundo Livro Ahava (amor): kozas de azer syempre, komo la orasyon o los tefillin
Se divide en 6 tratados:
a) Kiryat Shema (orasyon del Shema)
b) Tefilla ubirkat Cohanim (orasyon i bendisyon por los Cohanim)
c) Tefillin umzuza vesefer Tora
d) Tsitsit
e) Berahot (bendisyones)
f) Mila
3 Treser livro Zemanim (tyempos): kozas de azer en syertos tyempos, komo el Shabat. Se divide en dyez tratados:
a) Shabat
b) Eruvin (las maneras de kaminar i yevar en Shabath)
c) Shevitat assor (repozo del diez, kijo dizir yom kipur)
d) Shevitat yom tov (las fyestas)
e) hamets umatsa (Pesah)
f) Shofar ve suka velulav (Rosh ashana i Sukot)
g) Shekalim (las paras para el Templo de Yerushalayim)
h) Kidush ahodesh (Rosh hodesh)
i) Taaniyot (los diyas de tanit)
j) Megila vaHanuka (Purim i Hanuka)
4 Kuatren livro Nashim (mujeres): kazamyento, yibum, ets. Se divide en sinko tratados:
a) Ishut (kazamyento)
b) Gerushim (divorsyos)
c) Yibum vahalitsa (la ovligasyon para el ermano de un kazado sin ktiaturas de kazar kon su bivda, es el yibum, i la seremoniya para no azerlo, es la halitsa)
d) Naara betula (el forsamyento de una mansevika virjen)
e) Sota (kavzo de la mujer kazada akuzada por su marido de ir kon otro)
5 Sinken Livro Kedusha: kozas de santedad. Se divide en tres tratados:
a) isure bia (interdiksyones seksuales)
b) Maahalot asurot (komidas proibidas)
c) shehita (komo se matan las bestyas de komer)
6 Sejen Livro Aflaa (séparasyon): promesas i juramyentos, syendo ke el ke aze una promesa es separado de los otros. Se divide en kuatro tratados:
a) shevuot (juramyentos)
b) Nedarim (los nederes, promesas al Dyo)
c) Nezirut (el kavzo del nazir, komo era Shimshon, por egzemplo)
d) Arahin veharamim (las ofrandas)
7 Seten Livro Zeraïm (semyentes): leyes agrikolas (por egzemplo el anyo shabatiko) No se divide en tratados.
8 Ochen Livro Avoda (servisyo divino):Leyes del Templo de Yerushalaïm. El tampoko no se divide en tratados
9 Mueven Livro Korbanot (sakrifisyos): sakrifisyos privados en el Templo. El tampoko no se divide en tratados
10 diezen Livro Tahara (pureza):pureza ritual. A parte de la nida, entre marido i mujer, las otras leyes de pureza valiyan del tyempo del Bet Amikdash. Este livro tampoko no se divide en tratados.
11 Onzen Livro Nezikin (danyos) : derecho de la responsabilidad. Se divide en sinko tratados:
a) Nizka Mammon (danyos materyales)
b) Geneva (rovo)
c) Gezela vaaveda (rovo kon vyolensa i kozas topadas)
d) Hovel umazik (kriminal i danyozo) Yagas i kevraduras i su kompensasyon
e) Rotseah ushemirat nefesh (matansina i kuidado de la vida)
12 Dodjen Livro Kinyan (Akizisyon) : el komersyo
13 Tredjen Livro Mishpatim (Djusgamyentos) : derecho sivil
14 Katorzen Livro Shoftim (Djusgos): los djusgos, el rey, el Sanhedrin.
Estos tres ultimos livros, por lo ke se, no se dividen en tratados.
Para eskrivir su Mishne Tora, Rambam se fundo no solo sovre las desizyones del Talmud, ama tambyen de las teshuvot de los Gaonim komo de las desizyones de Itshak Alfasi. A la kontra, no konosiya Rashi, ke portanto bivyo antes de el.
I, preva de su independensya, se fundo tambyen sovre ovras de goyim, en jeneral gregos, por egzemplo en su lavoro sovre el kalendaryo, o en los prinsipyos de la filozofiya de Aristote.
Kale saver ke todos no achetaron la kodifikasyon de Rambam en su Mishne Tora. Uno de sus adversaryos fue un franses, Avraham Ben David de Posquières, no sovre todo por siguro, ama diziya ke la opinyon de Rambam no era la sola de estudyar.
En kuanto a Yona de Gerona, izo mismo kemar el Mishne Tora en 1240. Ama despues se arrepintyo de esto i se fue para demandar pedron sovre la tomba de Rambam en Teverya (Tiberiade). Ama se muryo antes de ayegar.
La vedra keda ke a poko a poko todos los hahamim konsideraron la valor de la opinyon de Rambam. I los dos kodifikadores ke vinyeron despues de el, es dizir Yaakov ben Asher kon su Arbaa Turim i Yosef Karo kon su Shulhan Aruh, se inspiraron muncho del lavoro de Rambam.
Yene, antes de Yaakov ben Asher, kale nombrar su padre, Asher ben Yehiel, (1250 – 1327) yamado el Rosh, ke eskrivyo varyas alahot a la manera del Rif (Rabi Itshak Alfasi).
Ama es de su ijo, Yaakov Ben Asher (1270 – 1340) ke kale sovre todo avlar, porke este haham, nasido en Almanya i ke bivyo lo mas de su vida en Espanya (Toledo) eskrivyo, unos syen anyos despues de Rambam, una ovra muy importante yamada Arbaa Turim (las kuatro kolumnas).
Estas kuatro komumnas son:
1) Orah Haïm (kamino de vida): La vida del ombre de kadal diya (orasyones, tsitsit, tefillin, Shabat i fyestas)
2) Yore Dea (maestro de la savidurya) : Leyes de kozas proibidas meskladas (alimentasyon, shehita, kasherut, ets)
3) Even aezer (pyedra del ayudo): Leyes de la famiya, del kazamyento, del divorsyo
4) Hoshen Mishpat (pektoral del djuzgamyento): Leyes sovre los djusgamyentos i los tribunales.
Esta ovra muy importante tyene dos diferensyas kon el Mishne Tora de Rambam: de una parte se okupa solo de los ke es menester para bivir en la Gola, i no en Israel kon un Bet Amikdash, i de otra parte da a konoser las opinyones de kada uno kuando Rambam dava una sola solusyon sin dizir de ande viniya.
I por siguro no puedo eskapar esta emisyon sin avlarvos de la ovra de Yosef Karo, este haham nasido en Espanya en 1488, sea kuatro anyos antes de la ekspulsyon, i ke se muryo en Safed en 1575.
Esta ovra se prezenta komo un komentaryo de los Arbaa Turim de Yaakov Ben Asher, i se yama Bet Yosef (la kaza de Yosef). En vedra, es muncho mas ke un komentaryo. Karo arrekoje todas las desizyones, todas las alahot ke se tuvyeron antes de el, en una kompilasyon monumentala.
I por tanto, no va ser kon esta ovra ke va kedar famozo entre todos. Es por el resumen ke izo del Bet Yosef, ande solo guadro las desizyones sin las diskusyones. Este resumen, lo va yamar Shulhan aruh (meza aparejada). Agora se puede dizir ke el ke kyere konoser la ley djudiya la topara en el Shulhan Aruh.
Karo se refyere a las ovras de las kualas vos avli, es dizir el Sefer aalahot del Rif, el Mishne Tora de Rambam i el Arbaa Turim de Yaakov ben Asher. Guadra la prezentasyon en kuatro partes del Arbaa Turim, i eskrive una ovra ke turo asta oy.
El haham Moshe Isserles,(1526 – 1572) pensando ke el Shulhan Aruh era una ovra sefardita ke no tomava en kuento las kostumbres de los Ashkenazim, eskrivyo un livro ke yamo la Mappa (el mantel). Komo vyene agora al lado del Shulhan Aruh, kontribuyo a la fama del Shulhan Aruh el mizmo.
Ya vino el tyempo de eskapar mi emisyon, i vos digo al djueves ke vyene, si kyere el Dyo!
Edmond Cohen
