Muestra lingua: LA BRIGADA DJUDIYA por Edmond Cohen

Keridos amigos, aki toparash el teksto de la emisyon de esta semanada.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Aki tenesh el teksto de la emision del proksimo djueves 10 de mayo de 2012

Saludos a todos
Edmond Cohen
Paris, Fransya

LA BRIGADA DJUDIYA

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon  de la Asosyasyon Vidas Largas se tendra  el martes 22 de mayo de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.

Oy, pensi de avlarvos de la brigada djudiya de Palestina, ke lucho en la armada ingleza, ama kon bandyera djudiya,  del tyempo de la sigunda gerra mundyala. Ama en vedra, no vos vo avlar solo de esta brigada; a propozito de esta brigada vos vo dizir unos kuantos byervos mas en jeneral sovre el rolo de los djudyos en la lucha kontra los almanes durante la sigunda gerra mundyala.

I en primero, antes de avlar de la brigada djudiya, es menester de dizir dos byervos sovre los askeres de Palestina en la primera gerra mundyala.

Kale saver ke en el invyerno i la primavera 1918 los inglezes achetaron la konstitusyon de una Lejyon Djudiya kompozada de tres batalyones dichos de fuzileros reales (el 38en, el 39en i el 40en), enteramente kompozados de veluntaros djudyos, entre los kuales David Ben Gurion, Itshak Ben Zvi, Eliau Golomb, i sovre todo Vladimir Zeev Jabotinsky. Lucharon kontra los Turkos para rekonkistar la Palestina.

Esto todo se kedo en novyembre 1918 kon la eskapasyon de la gerra, ama en 1920 se fundo la hagana, fuersa djudiya mas o menos klandestina, ke tuvo por lavoro de una parte de dar proteksyon a los djudyos de Palestina kontra los arabos, i de otra parte de organizar la aliya de los djudyos de afuera, afillu si los inglezes no lo permetiyan, lo ke se va yamar la aliya Bet.

Kuando empeso la sigunda gerra mundyala, los djudyos tan de Ingletyerra komo de Palestina entraron en la armada ingleza para luchar kontra los almanes, ama esto era basho la bandyera ingleza, sin nada de espesifikamente djudyo.

En 1939, Chaim Weizmann, prezidente de la Organizasyon Syonista Mundyala, demanda a los Inglezes la kreasyon de una armada djudiya ke luche en la armada ingleza, ama kon bandyera djudiya. Esta demanda no es achetada por los Inglezes, de espanto de los arabos. Ama yene 15 batalyones de djudyos de Palestina se van a ir pelear en la armada ingleza. En Gresya 100 askeres djudyos de Palestina son matados i 1.700 echos prezoneros por los Almanes.

En Ayifton los batalyones de djudyos asperan ke sean embiyados para afrentar a los almanes, i en vez de esto, estan deshados en el dezyerto para entrenarse i guadrar las pozisyones. Un batalyon alsa la bandyera djudiya, lo ke no tyene derecho de azer,  el kapo ingles les da el orden de abasharlo pishin, no lo azen, i por pizma son embiyados leshos en medyo del dezyerto.

Aki kale ke vos konte la istorya de un otro batalyon djudyo, de 400 ombres komandados por el major Liebmann, i de su batalya de Bir El Harmat.

En la primavera de 1942, Rommel esta amenasando la armada ingleza en Tobruk.  Esta aprovando de enserrarla, i los Inglezes dan al General franses Koenig de defender una pozisyon en Bir Hakeim . No kale ke los Almanes pasen. I los Inglezes embiyan tambyen, el 26 de mayo, un batalyon de 400 ombres djudyos de Palestina para defender una pozisyon al norte de Bir Hakeim, yamada Bir El Harmat, o Melchili. Son 400, ama no tyenen dinguna arma pesgada, i mismo muy pokas armas livyanas. Son aya par meter minas.

El 2 de junyo, ayega un zabit alman ke les aze la propozisyon de alevantar la bandyera blanka, para renderse. El kapo de los djudyos, el major Liebmann, le responde:  « No tenemos bandyera blanka. Muestra bandyera es blu i blanka kon el magen david, il la vamos a alsar. – Djudyos sosh ? dize el zabit alman kon sorpreza, i se va.

Pishin los almanes empesan a bombardar kon avyones i kanones a la posisyon djudiya. De los 400 ombres, unos 300 van a murir, ama no se renden, i ni los almanes ni los italyanos pueden tomar la pozisyon. Los almanes embiyan tankes. Los djudyos no tyenen dinguna arma pesgada kontra los almanes salvo las minas ke aviyan metido; aviyan sido embiyados  aya por esto!  Las minas destroyen munchos tankes, i los djudyos atakan los otros kon kokteles Molotov. Los tankes no reushen.

Los djudyos luchan ocho diyas de infyerno sin bever i sin komer, sin ke los almanes i italyanos keden de atakar. Solo el 10 de junyo, los fransezes de Bir Hakeim i los djudyos de Bir El Harmat resiven de la ochena armada ingleza la permisyon de retirarse. Kedan solo 43 djudyos dainda en pye. El major Liebmann, ferido a la kavesa i en el pecho, ve ayegar los askeres fransezes de Koenig. El General Koenig ve alevantarse unos kuantos ombres flakos i palidos komo sedimes. Da un abraso al major Liebmann, dizyendole bravo, kon lagrimas en los ojos.

En esto, se apersive ke un asker djudyo esta abashando la bandyera djudiya para alsar la bandyera ingleza. Kualo s’esta pasando? demanda Koenig. Liebmann le responde en franses ke no tyenen el derecho de luchar kon la bandyera djudiya, solo kon la ingleza.  Por tanto, esto es lo ke izitesh, responde Koenig. Luchatesh komo djudyos kon la bandyera djudiya, i esta va ser. I mete la bandyera djudiya al lado de la franseza sovre su araba i aze saludar la bandyera djudiya por sus askeres.

Tengo de dizir ke de este diya el général Koenig guadro una tala amistad para Israel i los djudyos ke fue munchos anyos despues i asta su muerte el prezidente de la asosyasyon de amistad Fransya-Israel, ke agora se yama Amistad France-Israel Général Koenig. I yo kuando se muryo me fui a la seremoniya. Agora, despues de su muerte, a sido echo mareshal.

Agora vos kyero tambyen kontar la istorya de Hanna Szenes, esta djudiya de Ungariya ke, en 1939, a la edad de 18, se va en Erets Israel i, despues de ambezarse la agrikultura en Nahalal, entra en 1941, a 20 anyos, en el Kibuts Sedot Yam i en la Hagana. En 1943, tyene 22 anyos i entra en la armada ingleza, en el SOE (Special Operations Executive) ke era para ser embiyado komo asker sekreto afuera de Ingletyerra en medyo de los enemigos. Se ambeza el parashutismo i es embiyada en marso 1944 en Yugoslaviya ande los partezanos. Aprova de entrar en Ungariya para ayudar a los djudyos de aya, ama es aferrada por la polisiya ungareza. En el prezo de Budapest es torturada para ke de a sus amigos. No avla, afillu kuando traen a su madre i amenasan de la torturar eya tambyen.

Es djuzgada el 28 de oktovre i matada el 7 de novyembre. En su prezo, en junyo, eskrivyo una poeziya ke fue topada en su kama despues de su muerte, ande dize:

«Un, dos tres…Puede ser otra semana.
O el mes ke vyene estaré dainda aki,
Ama la muerte, la syento serkana.
Uvyera tenido 23 anyos en julyo a venir.
Djugi a lo ke importava lo mas, los dados an korrido. Pedri.

En 1950, su puerpo a sido yevado para ser enterrado en el Monte Herzl en Yerushalayim.

Por siguro no fue la sola djudiya o el solo djudyo ke kombatyo en estos tyempos kon los Inglezes. Yo tuve el grande onor de tener por mushteri a Victor Gerson, ke fue un kapo del SOE parashutado tres vezes en Fransya durante la gerra. Los ke son interesados por konoser su vida pueden ir sovre wikipedia en franses al nombre de Victor Gerson.

I agora vengo a la brigada djudiya:  The Jewish brigade group. Deke tanto asperi para yegar a esta brigada ? Es porke si es vedra ke desde 1939 los djudyos demandaron el derecho de luchar kon sus bandyera. Kale ver una tabela amostrando un asker vestido komo asker ingles, ama tenyendo una bandyera djudiya; sovre la tabela esta eskrito Tsva ivri (armada ebrea) Jews want to fight as Jews (los djudyos kyeren kombatir komo djudyos) . Ama komo ya vos dishe los inglezes ke governavan la Palestina no achetaron asta 1944, de espanto de aravyar a los arabos. Solo fue en 1944 ke Churchill, esmovido por lo ke se estava pasando kon los djudyos de Ungariya, eskrivyo a Roosevelt:  « The Jews …of all races have the right to strike at the Germans as a recognizable body » (Los djudyos, mas ke kualkyer rasa, tyenen el derecho de aharvar a los Almanes komo  puerpo rekonosido komo tal). Roosevelt respondyo ke era d’akodro, i, udjula, el 20 de septembre 1944, el Ministeryo Ingles de la Gerra anunsyo la kreasyon de una Brigada djudiya. 5.000 veluntaryos entran pishin en esta brigada, kon la bandyera syonista. Son embiyados en Ayifton, i de aya kon vapor en Italya ande ayegan en oktovre 1944.

Suvyendo verso la batalya, se paso una koza ke ya vos konti en una otra emisyon:  komo los kazalinos de San Nicandro, ke aviyan segido a  uno de entre eyos yamado Donato Manduzio ke se aviya echo djudyo sin saver ke los djudyos dainda egzistiyan, se enkontraron kon una araba de la Brigada djudiya, i deskuvrieron ke aviya djudyos, i ke se puediyan ir en la Tyerra prometida, lo ke izyeron despues de la gerra. Agora biven en Israel.

Esto dicho, la Brigada Djudiya ayego serka de Bologna, i aya kombatyo los Almanes en la batalya del rio Senio. Kale saver ke en el invyerno de desyembre 1944, los alyados eran tan kansados i el tyempo era tan yelado ke se kedaron delantre de los almanes al norte de Italya, asperando para atakarlos ke venga la primavera. Esta ataka fue en avril 1945. Los djudyos de la Brigada djudiya eran, por siguro, una lagrima en un oseano de gerra, ama izyeron kon koraje lo ke teniyan de azer i ke fue muy yuch, i kale imajinar el orguyo de estos djudyos matando o azyendo prizoneros a askeres almanes espantados de ser echos prezoneros por djudyos ke tyenen una sola gana, matarlos.

Poko tyempo despues, estamos el 8 de mayo 1945, i la gerra esta eskapada. La brigada djudiya se va okupar de tres kozas:  en primer ayudar a los sovrebivyentes de la shoa, enkantados de ver askeres djudyos kon bandyera djudiya venir traerles ayudo, en sigundo organizar a eskondidas de los inglezes la aliya de los djudyos, i en treser vengarse de los almanes, matando lo mas posivle de SS ke pudyeron eskabuirse.

Dos grupos sekretos se organizaron para bushkar a zabites SS, i azyendose pasar por polisiya militar ingleza, aferravan al SS i lo aogavan. Ansina estos grupos mataron a unos 200 SS despues de la gerra.

Esto es la istorya de la Brigada djudiya. Fue la sola armada ofisyala ke pudo luchar kontra los Almanes en tanto ke djudiya, ama por lo tanto no kale olvidarse de todos los djudyos ke lucharon en movimyentos de rezistansya djudyos.

Los mas konosidos, por siguro, son los dos movimyentos del ghetto de Varsovia, el militar dirijido por Dawid Apfelbaum i el syonisto dirijido por Mordehai Anielewicz, ke lucharon los dos en tanto ke djudyos kontra los Almanes i sus ayudantes polakos i ukranyanos en 1943. No tengo menester de apesgarme sovre esta istorya, syendo ke ya la konti aki en dos emisyones ay sinko anyos de esto.

Ama kale akodrar tambyen ke aki mismo en Fransya uvo munchos movimyentos djudyos de rezistansya:  la « Armada Djudiya, » kreada por Abraham Polonski. El tambyen, tuve la grande onor de tenerlo komo mushteri despues de la gerra. Izo un lavoro ekstraordinaryo a eskondidas durante toda la gerra, ama en 1944 la Armada Djudiya lucho kontra los Almanes kon la bandyera djudiya. No fue la sola. Los scouts djudyos de Fransya, dirijidos por Robert Gamzon, entraron tambyen en un grupo de rezistansya ke tomo el nombre de Compagnie Marc Haguenau. Si meldash los rekodros de Gamzon (ke se muryo despues de la gerra banyandose) verrash ke los rezistantes diziyan el birkat amazon despues de komer…Ama akurtado, adjusta Gamzon. Son estos ke van en 1944 partisipar a la liberasyon de  las sivdades de Mazamet i de Castres.

Lo ke esto dizyendo sovre las armadas djudiyas no deve, por siguro, azer olvidar todos los djudyos ke kombatyeron los almanes, no en tanto ke djudyos, ama komo askeres en las armadas de kada pais alyado . Uno eskrivyo en una revista:  « El puevlo djudyo tyene una armada de un milyon i medyo de askeres:  serka de un milyon solo en la armada kolorada (450.000) i en la armada amerikana (500.000). Los askeres djudyos se amostraron en todas las batayas, ama poko aprovecharon en tanto ke puevlo de lo ke izyeron. Se puede pensar ke el mijor eskondimyento de esta gerra  es la parte ke los djudyos tyenen en eya. Un puevlo kon  una armada de milyon i medyo de kombatantes es el asker deskonosido de esta gerra, el alyado sin nombre, sin siya en el konsijo de las nasyones!»

Kuando se oye esto, kale alegrarse ke agora las kozas trokaron:  ay una armada djudiya ke se yama Tsahal, i ke gano sus gerras en kondisyones en ke deviya todas pedrerlas. Syempre kon menos armas i menos kombatantes ke sus enemigos. Oy, no tan leshos del yom a atsmaut, tengo una sola koza de dizir:  viva Israel, i para munchos i buenos!

Al djueves ke vyene, si kyere el Dyo!

Edmond Cohen