eSefarad Noticias del Mundo Sefaradi
Keridos amigos, el djueves 9 de janvier, kuando vine a la radyo para azer mi novena i ultima emisyon sovre la atadura de Itshak en el Meam Loez, no pude avlar en direkto por modo de los haberes sovre Dieudonné, ke aboltaron este diya la Fransya entera en jeneral, i la radyo en partiolar. Pre-enrejistri mi emisyon, ke deviya pasar el djueves de despues 16. Este diya no paso, no se deke. Paso finalmente (kortada antes de la fin) el djueves pasado 23 de janvier. Dunke agora ya eskaparon mis vakansas i tuve de aparejar mueva emisyon para el djueves ke vyene, i la ize sovre la konversyon i los konvertidos (al djudezmo)…
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
KONVERSYON I KONVERTIDOS
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 4 de fevrero, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
El djueves pasado, fue difuzada la emisyon ke yo aviya preenrejistrado el 9 de janvier, mi novena i ultima emisyon sovre la atadura de Itshak. Ama komo empeso dos minutos despues del tyempo (por modo de las reklamas munchas i largas) kuando vino la ora de eskapar yo estava dainda avlando, i me kortaron la palavra kuando vos aziya unas observasyones en konkluzyon: sovre el yuch ke fue este lavoro, sovre el estilo de Khuli, kon un alay de byervos en ebreo, i muy muy pokos byervos turkos.
I me kedava de dizir lo ke sige:
Tresera i ultima observasyon: Khuli, kon muncha modestiya, ya disho munchas vezes ke lo ke mos konta no vyene de el mizmo, todo lo tomo de eskritos de hahamim antes de el, ke se ve solo komo un vulgarizador. I es vedra ke travo sus komentaryos del Talmud i de los midrashim. Los anakronismos ke pueden enkantarvos, komo Itshak estudyando la Ley kon haverim en una yeshiva, no son invensyones de Khuli, son travados de los midrashim.
Esto dicho, yo no puedo eskapar esta emisyon sin akodrarvos ke ay otros hahamim ke pensaron, i yo penso komo eyos i lo dishe en una emisyon ke ize, ke a dingun momento Avraham tuvo espanto, a dingun momento penso ke esta istorya se iva eskapar por un degoyamyento, ke su fe, su djudezmo komo dize el Meam Loez, es ke teniya tal konfiansa ke al ultimo momento vendriya el orden, ke vino, de no matar a su ijo, ke izo todo el komando del Dyo komo si iva matarlo, ama todo en savyendo ke el orden trokariya al ultimo momento. Esto es mi idea, i me plazyo de ver ke antes de mi fue la idea de Philon de Aleksandria i tambyen de Don Itshak Abravanel. Me kedo en buena kompaniya…
Ansina deviya de eskaparse la emisyon difuzada el djueves pasado, i agora vengo a mi emisyon de oy:
Por empesar, me parese menester de dizir dos byervos en memorya de Ariel Sharon, ke se muryo aze poko.
Ay kozas buenas i ay kozas negras ke se pueden dizir sovre este ombre, ke fue un militar i un kapo politiko de primera importansya.
Ama ay una koza ke es sigura: es ke el es ke troko el destino de la gerra de Kipur en 1973, kuando kon sus tankes korto en dos la armada ejipsyana, i entro en la parte afrikana del Canal de Suez, avansando verso el Kairo. Esto metyo fin a la gerra, porke los Ejipsyanos entendyeron pishin ke agora no aviya mas dingun hayre ke la ganen.
Si era por esto solo, la memorya de Ariel Sharon mereseriya de ser onorada por todos los djudyos.
Esto dicho, i trokando de lakirdi, un amigo me dyo la idea de avlarvos oy de konversyon i de konvertidos. No de los ke se konvirtyeron del djudezmo a otra relijyon, sea, por la mayoriya, forsados, lo ke se yama anusim en ebreo, sea porke lo kijeron de si para si, komo el kardinal franses Lustiger, por egzemplo. Kuando avlo oy de konversyon, avlo de los ke se konvyerten de otra relijyon al djudezmo.
Kale saver ke syempre uvo konversyones a muestra relijyon, i se puede dizir ke el primer de todos los konvertidos fue Avraham avinu, syendo ke vino de si para si al monoteismo tenyendo un padre idolatro i fabrikante de idolas. I no solo vino el, ama el mismo konvirtyo a otros. Esto lo travan los hahamim del pasuk 5 del kapitulo 12 de Bereshit, ande esta dicho: «Y tomo Abram a Saray su muger y a Loth hijo de su hermano, y a toda su ganancia que ganaron, y a la alma ke fizieron en Haran (veet anefesh asher asu beHaran)». El Tanah dize nefesh al singular, ama a parte la Biblia de Ferrara ke traslada palavra por palavra, vide ke en todas las otras traduksyones ke tengo, nefesh es trasladado al plural, i por empesar la traduksyon en djudeo-espanyol i no en ladino de 1905: «las almas ke resivyeron». Salvo ke asu no es resivyeron, ama izyeron. Todos no trasladan nefesh por almas. Lo mas entyenden ke se avla de los servidores ke Avram i su mujer se izyeron en Haran.
Rashi, el, lo entyende de otra manera: kualo dize el tanah? ke izyeron (al plural) alma. Para Rashi, esto signifika ke izyeron djudyos a djente. Kyen lo izo? De lo ke izyeron es un plural, Rashi trava ke Avram konvertiya a los ombres, i Saray a las mujeres. De tal manera ke no solo la famiya, ama el klano de Avram era kompozado de muevos djudyos.
El Tanah mos da dos otros egzemplos de konversyon. El primero es Yitro, el suegro de Moshe Rabenu. Al empesijo, era, dize el Tanah, «cohen Midyan», sacerdote de Midyan, lo ke mos amostra, entre parantezas, ke el byervo cohen no vale solo para los djudyos, ama para todos los saserdotes, kual ke sea su relijyon.
Esto dicho, kuando supo Yitro toda la istorya de la salida de Ayifton, disho (Shemot, kapitulo 18, pasuk 11) «Agora sé que grande Adonay mas que todos los dioses», lo ke , me vash a dizir, no es dainda una konversyon entera, syendo ke parese ke pensa ke dainda kedan otros dyozes, afillu mas chikos… ama en vedra va azer alsasyon i sakrifisyos para el Dyo, i no para los diozes de Midyan.
Otro egzemplo muy famozo de konversyon kontado sino en la Tora, a lo manko en el Tanah, es Ruth la moabita ke va dizir a su suegra Naomi, despues de la muerte de su marido: «Ameh ami ve Eloeh Eloay» (Tu pueblo mi pueblo, i tu Dio mi Dio). I komo ya lo savesh, de la desendensya de Ruth va naser el rey David, i de esta desendensya vendra el Mashiah. Nada no es!
En todos tyempos despues uvo djente ke se konvirtyeron al djudezmo.
Del tyempo de los Hashmonaïm i sovre todo de Aleksandros Yanay, uvo puevlos ovligados por fuersa a la konversyon, komo los Idumeos, a kyen devemos Antipater, i su ijo Herodes ke se izo rey de Judea.
Ya vos konti aki en una emisyon el kavzo de la reyna de Adiabene, un pais al norte del Irak de oy, i de sus ijos, ke se izyeron djudyos del tyempo de la primera rebuelta, i komo estos dos ijos de la reyna kombatyeron kon los defensores de Yerushalayim kontra Titus, i fueron aferrados komo prizoneros por los Romanos.
Otro de los mas famozos konvertidos es Onkelos, al kyen devemos el Targum, kijo dizir la traduksyon, del tanah en arameo.
El Talmud mos konta ke este era sovrino del Emperador Adriano, el ke destruyo a Yerushalayim en 135, i ke no solo se konvirtyo el mizmo, ama konvirtyo a los soldados romanos embiyados por el Emperador para aferrarlo.
Si dize tambyen ke el famozo Rabbi Akiva, el tambyen, nasyo en una famiya de konvertidos. Se izo kon el tyempo uno de los mas grandes hahamim de su epoka, ke fue la epoka de la rebuelta de Bar Kohba (132-135 despues del Kristo). Rabi Akiba partisipo a esta rebuelta i sostuvo a Bar Kohba. Despues lo pago de su vida, i fue tortrado a muerte por los Romanos.
Antes aviya partisipado a los lavores de la Mishna, i se dize tambyen ke el eskrivyo las Otiot, komentaryo sovre la valor mistika de kada letra del alfabeto ebreo.
I no tengo menester de avlarvos de los Khazares, estos turkos del sur de la Rusiya de oy. Sus reyes se konvirtyeron al djudezmo en los anyos 800.
Agora se dize mizmo ke los djudyos ashkenazim seriyan desendyentes de los Khazares. La kuestyon es muy diskutada i disputada entre los istoryanos, i no so yo ke podre darvos la yave. Ama lo ke es siguro, es ke uvo munchas konversyones al djudezmo en todas epokas.
Se dize tambyen ke syertos berberes de Aljeriya furon konvertidos al djudezmo antes de las invazyones arabas, i ke munchosos djudyos de Aljeriya seriyan desendyentes de estos. La vedra es ke no se save muncho i los istoryanos no tyenen provas. El istoryano arabo Ibn Khaldun dize ke la Kahina, esta kapo de rezistansya kontra los invadores arabos, era djudiya. Todos no son siguros de esto. Ama si djudiya era, deviya ser por konversyon.
En vedra la importansya de la konversyon ande los djudyos aze polemika entre los istoryanos, ama una koza es sigura, es ke syempre uvo konversyones (al punto ke esto sirve agora de argumento a los arabos, asigun los kuales los djudyos ne oy no son los desendyentes de los ke bivyeron de Palestina al tyempo, ama goyim konvertidos de mas despues, pensando ke kon este argumento se aflaka el syonismo).
En el siglo vente, uvo en Italya, en la sivdadika de San Nicandro, kazalinos ke no solo se konvirtyeron, ama se fueron en djuntos en Israel, ande biven agora komo djudyos israelyanos.
Esto todo mos amostra ke munchos son los ke se konvyerten. Munchas vezes es para pueder kazarse kon un djudyo o una djudiya, ama no es la sola razon. Ay munchos ke se kyeren konvertir solo porke son travados verso muestra relijyon, i se puede ver ke en el mizmo tyempo ande munchos de los muestros a poko a poko se van afuera de muestra relijyon, ay otros ke demandan a entrar. I kuando entran, en jeneral son mas djudyos ke losdjudyos de nasimyento.
Me akodro tener enkontrado a una manseva konvertida al djudezmo, lo ke yo no saviya, la pensava djudiya de nasimyento, i esta me tomo la kavesa porke keriya ke yo sea mas djudyo. Eya era mas sufu ke el mas sufu de los sufus, i supe ke despues se kazo kon un sufu i no se kuantas kriaturas tuvyeron en sira, ama munchas.
Me akodro tambyen ke Madeleine Ferraille, nasida katolika en Fransya, se konvirtyo i se izo Ruth, i muncho mas despues se kazo kon el haham Amram Blau, fundador i kapo de los Neturei Karta, i se izo Ruth Blau.
Agora veremos kualas son las kondisyones para azer su konversyon. Kale dizir ke esto depende del pais, i, en el pais, del movimyento djudyo (liberal, ortodokso, ets) ande kyere entrar el kandidato.
Aki vo avlar de las kondisyones (ke no son kolay) tal ke son en Fransya en los kales konsistoryales, kijo dizir bastante ortodoksos, porke son la mayoriya de los kales fransezes.
Los hahamim dizen al kandidato ke para ser achetado kale ke el mizmo achete de toparse basho tres yugos: el yugo del reyno divino (ol malhut shamayim), el yugo de la Tora (ol Tora) i el yugo de las mitsvot (ol mitsvot).
Me akodro ke el haham Moshe Cassorla me dizia: mozotros tenemos por kavdal los zahutes de muestros antepasados; los konvertidos no tyenen este kavdal. Kale ke tengan por kavdal sus solos zahutes personales.
Para amostrar su interes por muestra relijyon el kandidato deve komer kasher, guadrar shabat i yom tov, frekuentar regularmente una komunita (ofisyos al kal, kursos, konferensyas, komidas shabatikas, ets), saver meldar en lashon, konoser las prinsipales berahot.
Kale embiyar una letra de motivasyon eskrita a la mano al Konsistoryo.
Kale toparse un haham ke va ser su protektor i ayudante.
Esto todo toma bastante tyempo. El haham mira si el kandidato merese ke su demanda sea tomada en konsiderasyon.
Despues el kandidato pasa un egzamen eskrito de 280 kuestyones.
Si el kandidato reushe el egzamen eskrito, pasa delantre un beth Din de tres hahamim para una konversasyon ke amostrara si el kandidato tyene motivasyones profundas.
Si el kandidato responde byen, el Bet Din toma una data para la Brit Mila si es un ombre , i despues el Mikve.
Despues del mikve, el kandidato toma un nombre djudyo. Es djudyo i aze parte del puevlo djudyo tal i komo kualkyer otro djudyo. La sola diferensya es ke si es una mujer, no se puede kazar kon un Cohen.
Esto todo ke vos vengo de dizir es komo se pasa en los kales konsistoryales de Fransya. La konversyon es mas kolay en los kales liberales, i por egzemplo ande los liberales las konvertidas pueden kazarse kon un Cohen.
Por esto los ortodoksos no rekonesen komo djudyos a los ke se son konvertidos en un kal liberal. El Estado de Israel, si. La ley del ritorno vale para los djudyos ke se konvirtyeron afuera de Israel, kual ke sea el kal. Ama las kozas en vedra son mas komplikadas: El Estado los konsidera komo djudyos, ama los hahamim de Israel, no. I komo son eyos ke azen los kazamyentos, un konvertido no rekonosido por los hahamim no se puede kazar en Israel, afillu si es Israelyano i konsiderado komo djudyo por el Estado…
Esto aze un problema muy grave en Israel syendo ke ay munchos amerikanos i sovre todo rusos ke los hahamim no konsideran komo djudyos. Agora ay lucha entre los hahamim en Israel, los unos keryendo azer las kozas mas kolay, los otros no.
Esto todo es pekado porke el Talmud kyere muncho a los konvertidos. Dize kozas komo: Un konvertido ke estudya la Tora vale tanto ke el Cohen Gadol kuando entrava en el Santo de los Santos. Al kandidato ke kyere konvertirse, kale darle la mano para ke entre basho las alas de la Shehina. Una vez konvertido, todo kandidato es konsiderado komo Israel. No kale akodrar a un konvertido lo ke kreiya antes. Ets.
Al djueves ke vyene, si kyere el Dyo!
Edmond Cohen
