eSefarad Noticias del Mundo Sefaradi
Keridos amigos,
Mi emisyon para el djueves ke vyene,despues de Kipur, sera sovre Haïm Viktor Arlozorov, syonisto partezano de bushkar la paz kon los arabos, ke muryo asasinado a 34 anyos, sin ke nunka se sepa kyen lo mato. Negosyo kon los nazis la posibilitad de deshar irsen de Almanya los djudyos, i ansina salvo, kuando el ya era muerto, a 60.000 djudyos almanes. Fue el amante de Magda Goebbels, ke tuvo un padrasto djudyo ke puede ser era en vedra su haliz padre.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
HAÏM VIKTOR ARLOZOROV
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya. http://www.radioj.fr/node/145
Oy mos topamos al empesijo de estos pokos diyas ke van entre Kipur, ke fue ayer, i Sukot, ke va empesar el alhad ke vyene, 16 de oktovre a la tadre.
De kualo avlarvos oy? La semana pasada me pensava avlarvos de Haïm Arlozorov, i vino la muerte de Shimon Peres, ke me izo trokar de idea. Dunke es oy ke vos vo avlar de Arlozorov, i komo esto me va tomar todo mi tyempo, no vo pueder eskapar oy kon Shimon Peres, afillu si, el djueves pasado, me dyeron la palavra despues de mi tyempo, i tuve de kedarme antes de pueder eskapar lo ke vos teniya de dizir. Lo eskaparé la semana proksima, si kyere el Dyo.
Es tambyen por manko de tyempo ke no vos avlaré oy de Pierre Tchnernia, ombre de televizion ke mos desho la vida el 7 de oktovre, esto tambyen sera para la semana ke vyene.
I agora avlaremos de Haïm Arlozorov. Munchas son las kayes ke yevan su nombre en Israel, komo en Tel Aviv, por egzemplo. Ama no solo kayes, ay tambyen una male al norte de Haïfa ke se yama Kiryat Haïm en memorya de Haïm Arlozorov, i mismo sivdadikas komo el kibuts Giv’at Haïm o el moshav Kfar Haïm.
Kyen era este Haïm Arlozorov? Nasyo Vitaly Haïm Arlozorov en la sivdadika de Romny, en Ukranya, en 1899. Su papu era el Rav Eliezer Arlozorov de Romny, ke eskrivyo komentaryos del Talmud. En 1905, el chiko Haïm tyene a penas 5 anyos, i ve su kaza atakada en un vyolente pogrom. La famiya reushe a fuir la Ukranya i se va topar abrigo en Königsberg, oy Kaliningrad, ke era en este tyempo la kapitala de la Prusa Oryentala. La famiya se keda aya syete anyos, de tal manera ke el chiko Haïm se ambeza a avlar muy byen el alman. Ama en mismo tyempo se ambeza el ebreo kon un profesor. Kuando empesa la primera gerra mundyala en 1914, la famiya Arlozorov, afillu si no tyene la nasyonalidad almana i por esto es menasada de deportasyon, es otorizada a topar abrigo en Berlin. El padre de Haïm abolta en Ukranya por sus echos, ama es detenido aya i se muere aya del cholera. Alozorov estudya la ekonomiya en la Universidad de Berlin i obtyene el diploma de doktor. En mismo tyempo ke estudya, eskrive artikolos syonistos i se aze un kapo del partido syonisto Hapoel hatsair (el ovrero mansevo). Eskkrive en la gazeta Die Arbeit (El lavoro).
I en 1919, a la edad de solo 20 anyos, publika un livro en forma de tratado:»Der jüdische Volkssozialismus» (el sosyalismo del puevlo djudyo). En este livro, ke yo no meldi, povereto de mi, ama vos digo lo ke dizen de el en Wikipedia, Arlozoroff defende la idea de una esperansa nasyonala para el puevlo djudyo en Eretz Israel. Arlozorov defende el sosyalismo, ama en el mismo tyempo un sosyalismo syonisto para el puevlo djudyo, lo ke aze la diferensya kon los djudyos komunistos o sosyalistos del Bund, ke se kyeren solo sosyalistos, puede ser djudyos, ama no syonistos, i no tenyendo entisyon de irsen en Erets Israel. Arlozorov, afillu si su livro esta eskrito en alman, kyere un fuerte renasimyento del ebreo en Erets Israel.
En este mismo tyempo ande Arlozorov tyene unos 20 anyos, su ermanika Lisa tyene una amiga almana de 18, Magda, de la kuala vos tengo de dizir unos kuantos byervos, porke su istorya vale la pena de ser kontada, syendo ke se dize ke Arlozorov i eya fueron amantes, lo ke en vedra no es siguro. Lo ke es siguro, es ke Haïm Arlozorov fue el primer grande amor de su vida. Ama no va ser el solo, Magda va eskapar en el Bunker de Berlin en 1945 kon su ultimo marido Joseph Goebbels.
Magda nasyo en novyembre 1901 de un padre injenyer, Oskar Ritschel, i de su mosa de 20 anyos, de alkunya Behrend. Komo no son kazados, la chika Magda va yevar la alkunya de su madre. Despues sus padre i madre se kazan, ama divorsyan muy presto, la chika tyene solo 3 anyos. Su madre se kaza despues kon un merkader djudyo, Richard Friedländer, ke se okupa de su edukasyon. De kristyana ke es por su nasimyento, vyene a interesarse al djudaismo de su padrasto, i mismo empesa a yevar su alkunya. Digo su padrasto, ama asigun Wikipedia en ingles, Friedländer seriya el haliz padre de Magda. Aze muy poko tyempo ke, este anyo mismo, un eskrivano i istoryano yamado Oliver Hilmes, topo en los arshivos la karta de rezidensya de Friedländer amostrando ke la madre de Magda lo konosyo antes de Ritschel. Hilmes lo konto en la gazeta Bild.
Ver Magda Goebbels’ biological father may have been Jewish
Ke Magda Goebbels era puede ser djudiya de padre, esto es un scoop ke vos esto ambezando oy. Esto dicho, por demas, komo lo dishe, Olga aze la konosensya del ermano Vitali Haïm, ke en Almanya se yama Viktor, de su amiga Lisa Arlozorov.
Asigun los rekodros de Lisa Arlozorov, Magda, ke ya se interesava al djudaismo por modo de su padrasto (o padre?), agora se interesa al syonismo al lado de Viktor, partisipa a los debates del grupo «Tikwath Zion» (esperansa de Tsion) sovre el avenir de la Palestina, se ambeza el ebreo i mismo yeva un magen David. Vos esto akodrando ke estamos avlando de la ke va ser despues Magda Goebbels!
En 1920, Magda aze la konosensya de un riko Alman, Günther Quandt, i se kaza kon el en janvier 1921. Asigun Wikipedia ke se funda sovre el kapitulo 3, intitolado «Magda Goebbels, Première dame du IIIème Reich» eskrito por Anna-Maria Sigmund, en 2004, de un livro eskrito por eya i Janine Bourlois, intitolado «Les femmes du IIIème Reich» , Magda kontinua a eskondidas su relasyon kon Arlozorov. Komo lo vo kontar mas despues, el se va en Erets Israel en 1924, ama va aboltar en Almanya entre 1928 i el empesijo de1932, i Magda empesa yene kon el. Kuando su marido Quandt se lo ambeza, la birra lo toma i la echa afuera. Es el divorsyo en 1929.
En 1930, Magda konose Joseph Goebbels i entra en el partido nazi, en 1931 es la amante de Goebbels todo en kontinuando a ver Arlozorov asta ke se pelean i ke Arlozorov se vaya de Almanya.
En 1931, se kaza kon Goebbels, tyene kon el 6 kriaturas kada una kon un nombre empesando por H komo Hitler.
I, ya lo savesh, el primo de mayo 1945, Magda entosiga i mata a sus sesh kriaturas, despues Goebbels le trava un kurshum en la kavesa i se mata despues el mismo.
Si tomi tanto tyempo para avlarvos de los amores de Arlozorov kon Magda Goebbels, es porke unos dizen ke la muerte de Arlozorov fue dechidada por Goebbels el mismo, por selo. De esto no estamos siguros, ama lo ke savemos, es ke Goebbels izo en 1938 aferrar Friedländer, padrasto (o padre?) de Magda, ke fue deportado i muryo en Buchenwald en 1939, entre parantezas sin ke Magda aga nada para salvarlo.
Ama dainda no estamos en esto, i aboltaremos a la vida de Arlozorov. Por su primera vez, Arlozorov se va a vijitar a Erets Israel en 1921, djusto kuando empesan la rebuelta araba de Jaffa kontra los djudyos (ke fundaron a Tel Aviv al lado de Jaffa en 1909). Arlozorov ayuda a los moradores de la sivdadika de Neve Shalom, serka de Jaffa, de defendersen. En todo, 47 djudyos son matados, ama kon la defensa djudiya los arabos pyedren tambyen 48 d’entre eyos. Esto dicho, en mismo tyempo ke Arlozorov ayuda a los moradores djudyos, se da kuenta ke ay menester de enderechar presto las relasyones entre djudyos i arabos.
Arlozorov demanda a los syonistos de tomar en kuenta el nasyonalismo arabo. Ama sus amigos, afillu en su partido, Hapoel hatsair, no son todos de akodro kon el. Ama el pensa ke un akodro rezyo kon el vezindaryo arabo no seriya un detenimyento para los esfuersos por un ogar djudyo nasyonal.
En el kongreso syonisto de 1923, Arlozorov es elijido al Komitado de Aksyon Syonista. Tyene solo 24 anyos. I en 1924, aze su aliya en Erets Israel. En 1927, el es ke reprezenta el Yishuv, kijo dizir los djudyos de Erets Israel, en la Sosyedad de las Nasyones en Geneva.
A la kontra de las ideas de Arlozorov, los del movimyento Betar dirijidos por Zeev Jabotinsky aprovan de engrandeser la prezensya djudiya serka de la Pared en Yerushalayim. Los arabos, komo a kada vez, gritan kontra lo ke yaman un atako kontra la Meshkita Al Aksa i en 1929 es una mueva rebuelta araba. Los djudyos van a tener 133 matados. Arlozorov akuza los revizyonistos de la vanda de Jabotinsky de meter en sekana a los djudyos kon sus aksyones kontra los arabos. Vyeja istorya. Desdel empesijo del syonismo uvo los partizanes de apasiguar a los arabos i los ke pensan, komo pensava Jabotinsky, ke no sirve de nada, i ke kale ser fuerte kontra los arabos, sin pensar topar la paz kon eyos.
Ay solo kuatro diyas arresivi de mi amigo Samy Cohen un livro muevo ke eskrivyo, «Israël et ses colombes, enquête sur le camp de la paix» (Israel i sus palombas, enkuesta sovre el kampo de la paz). Dainda no tuve el tyempo de meldar este livro. Ama, asigun lo ke meldi en la kuatro de kuvyertura, en Israel «el movimyento de la paz no dezaparesyo. Se troko, dando nasimyento a un alay de chikas organizasyones, de una vitalidad ke no se puede pensar».
Aboltaremos al syonisto Arlozorov. En 1930, ovra para la unifikasyon de dos partidos syonistos sosyalistos, el suyo, Hapoel Hatsair, i el otro, Poale Tsion, lo ke va dar el Partido Mapaï. En 1931, es embiyado al kongreso syonisto, i en mismo tyempo es echo Direktor Politiko de la Adjensiya Djudiya, lo ke es un muy alto sityo porke la Adjensiya Djudiya es kaji el governo de los djudyos antes ke tengan un estado. Arlozorov es un amigo serkano de Haïm Weizmann.
Ayegamos al anyo 1933, ande vamos a tener sinko mezes i medyo de evenimyentos tenyendo atadijo kon Arlozorov, asta el 16 de junyo, diya de su muerte por matansa.
Vos akodro en primero, de esto el povereto Arlozorov no es responsavle, ke el anyo 1933 empesa kon la tomada del poder por Adolf Hitler en Almanya el 30 de janvier. Tomada demokratika, porke su partido nazi gano las eleksyones, i esto mos amostra ke la demokrasiya no es la panasea…
Por su vanda Arlozorov se pelea kon Ben Gurion i sus amigos sovre la politika de tener kon los Inglezes. Ben Gurion no kyere lavorar kon los Inglezes, demaziya amigos kon los arabos asigun el. Arlozorov pensa ke de no lavorar kon los inglezes va ser peor, i deshar las manos liberas a los Arabos kon les Inglezes.
El 8 de avril, Arlozorov organiza una siduta istorika en el otel King David en Yerushalayim, entre los kapos syonistos (Sharet, Ben Zvi, i el mismo) i kapos arabos venidos de Transjordaniya para aprovar de lavorar en djuntos. Esta siduta no va ser del gusto ni de los kapos arabos de Palestina, ni de munchos syonistos, sovre todos los revizyonistos, muy arravyados kontra Arlozorov.
De otra parte, Arlozorov se sikilea muncho por lo ke va ser de los djudyos almanes una vez ke los nazis ayegaron al poder i ke pishin empesan leyes antisemitas. La idea de Arlozorov es de obtener de una parte de los Inglezes la posibilitad para les djudyos almanes de fuir en Erets Israel, de otra parte de obtener de los Almanes ke los deshen fuir. Lo ke implika negosyasyones kon los Almanes. Esto arravya Zeev Jabotinsky,kapo de los Revizyonistos, ke no kyere ke ayga la mas chika negosyasyon kon el Dyavlo.
Yene Arlozorov se va en Almanya para negosyar kon los almanes, demandandoles ke deshen fuir a sus djudyos kon sus byenes; su idea es muy klara: vozotros, los Almanes, no keresh a los djudyos, mozotros los keremos. Arlozorov se va en Almanya i obtyene un akodro kon los Nazis, ke se va yamar el akodro Ha’avara (el akodro de transfero). Este akodro va ser firmado el 25 de agosto 1933, dos mezes despues de la muerte de Arlozorov, ama yene se puede dizir ke es enteramente el rezultado de los esfuersos de Arlozorov.
Este akodro a permetido, malgrado la politika de los Inglezes de impedir la venida de djudyos en Palestina, de salvar a mas de 60.000 djudyos ke pudyeron topar avrigo en el pais de los Djudyos i ayudar a fraguarlo.
I agora yegamos a la muerte de Arlozorov, ke a parte de sus amores kon Magda Goebbels tuvo dos mujeres, en primero Gerda Goldberg, i despues su divorsyo, Sima Rubin. No topi sovre internet ni kuando se kazo ni kuando divorsyo.
Ama una koza es sigura: el 16 de junyo 1933, solo dos diyas despues ke abolto de Almanya ande se topava para negosyar, Arlozorov esta kaminando kon su sigunda mujer Sima sovre la playa de Tel Aviv, kuando dos ombres van a travar sovre Arlozorov, ke va morir en el ospital despues de tener dicho ke los matadores eran arabos. El misteryo Arlozorov empesa pishin, porke Sima, eya, dize ke eran djudyos avlando ebreo sin aksento.
Tres syonistos revizyonistos son pishin aferrados: Ahimeir, Rosenblatt i Stavsky. Ama son liberados sin prevas, Ahimeir i Rosenblatt en primero, despues Slavsky, i portanto Sima Arlozorov rekonose Rosenblatt i Stavsky.
Sovre esto, un arabo, Abdul Madjid, ya kondenado por otra matansa, vyene akuzarse de tener matado Arlozorov. Sima dize ke no lo rekonose. Los matadores eran djudyos, asigun eya, ama vos akodro ke asigun Arlozorov el mismo, eran arabos. Durante 18 diyas i 28 peshkuzas, el arabo mantyene su pozisyon, asta ke venga dizir despues ke le dyeron (kyen? no se) 1.500 livras para ke se akuze…
Nada va salir de esto todo. Unos van a pensar ke son los Nazis yevados por Goebbels ke izyeron matar a Arlozorov, ama la vedra es ke asta oy, el misteryo keda entero sovre la muerte de este grande syonisto i ombre de paz.
Al djueves ke vyene, si kyere el Dyo!
Edmond Cohen
Paris Fransya
