eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar de mi lavoro el haham Farhi, i tambyen Tito Jacob, el kunyado de Liliane.
Saludos a todos
Edmond Cohen
Paris, Fransya
GAZA I LOS DJUDYOS
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo kada semana, vos akodro ke el proksimo atelye de konversasyon de la asosyasyon Vidas Largas se tendra el martes 11 de desyembre de las dos i medya asta las sinko. Dikat: los atelyes no se tyenen mas en el lokal ande estavamos el anyo pasado. Se tyenen agora al mismo adereso ande estavamos antes, kijo dizir en el Centre Communautaire, 119 rue Lafayette, Paris (10°) métro Poissonnière o Gare du Nord.
Esta semana, teniya la entisyon de avlarvos de kozas mas livyanas. Mi mujer lehliya ke se va en un atelye de konversasyon en yiddisch, me disho ke aya es proibido de avlar de la gerra i de la shoa, porke sino se avla solo de esto. 70 anyos se pasaron, ama esto keda en muestro puerpo komo una yaga avyerta. Mi ijo me dize: « biva mas en el prezente, desha un poko este pasado ». Ama komo azer? I es ke es mi kulpa si agora el prezente es los muertos ke kayeron kon esta gerra de Gaza? Kale saver ke desde los tyempos los mal leshanos, syempre los djudyos fueron en gerra kontra Gaza.
Por esto me pensi de avlarvos oy de la istorya de Gaza kon los djudyos.
Asigun lo ke se puede saver oy, la sivdad de Gaza empeso por ser, alderredor de los anyos 1500 antes del kristo, una sivdad de los Ejipsyanos para tener un ojo sovre el pais de Kenaan.
En los anyos 1200 antes del kristo, vienen uno de los dichos « puevlos de la mar », el puevlo de los Pelishtim, venidos, a lo ke parese, de Creta. Toman la rejyon de Gaza a los ejipsyanos, i la sivdad de Gaza va ser una de las mas grandes i poderozas de los Pelishtim.
El Tanah no keda de avlarmos de los Pelishtim:
Al empesijo, todo se pasa byen entre Avraham i Avimeleh, rey de los Pelishtim: se djuran aliansa en Beer Sheva, ke se yama ansina porke es el « pozo del juramyento ».
Ama despues las kozas se van a azer mas i mas negras, sovre todo kuando los ebreos van a aboltar kon Yoshua de Ejipto para konkistar Kenaan.
En el livro Shofetim (kapitulo 10, pasuk 7; kapitulo 13, primer pasuk), vemos ke los ebreos kayen munchas vezes en las manos de los Pelishtim.
Ama despues el Tanah, en los kapitulos 14 a 16 de Shofetim, mos konta la istorya de Shimshon, ke ya konti aki. Vos akodro ke es en Gaza ke Shimshon es yevado kuando es asyegado i enkadenado, i aya es ke aze kaer sovre los Pelishtim (i el mismo, el primer kamikaz de la Istorya) el templo a Dagon, el dyo de los Pelishtim.
Ama las gerras entre Ebreos i Pelishtim no se kedan kon esto.
El primer livro de Shemuel (kapitulo 4) mos konta komo los Pelishtim son en gerra kontra los ebreos, los Bene Israel, i en la bataya de Even Ezer matan a 4.000 Bene Israel.
Vyendo esto, los Bene Israel toman kon eyos el Mishkan, la Arka de Aliansa, para ayudarlos en las batayas. Negra idea, esta vez los Pelishtim matan a 30.000 Bene Israel, i toman la Arka i se la yevan ande eyos. Ya vos konti aki, en una emisyon ke ize sovre la Shehina, komo las estatuas del Dyo Dagon se rompiyan de suyo kuando se topavan al lado del Mishkan, i komo, al kavo, los Pelishtim dyeron el Mishkan atras.
Kuando los ebreos van a tomar a Shaul komo rey, va ser syempre gerra kontra los Pelishtim. Es a esta okazyon ke el pastor manseviko David afrento i mato el ombre fuerte de los Pelishtim, Goliath.
Esto no fue bastante para eskapar las gerras, i en el monte de Guilboa los Pelishtim mataron a tres ijos de Shaul, inkluendo Jonathan, el mijor amigo de David. Shaul se mato el mismo, echandose sovre su espada.
David kompozo sovre estas muertes uno sus mas ermozos kantes (Shemuel II, primer kapitulo, pesukim 19 a 27).
Empesa ansina: « O hermosura de Ysrael sobre tus alturas matado, como cayeron barraganes. No denunciedes en Gath, no albriciedes (no proklamesh) en calles de Askelon, porque no se alegren hijas de Pelisteos, porque no se alegren hijas de incircuncidos… »
Aki David no avla de Gaza, ama avla de Gath i de Ashkelon, otras sivdades de los Pelishtim.
Despues de la kortadura, a la muerte del rey Shelomo, del reyno de los Ebreos en dos reynos, Israel al norte i Yehuda al sur, el profeta Amos, bivyendo en Yehuda, izo profesiyas, verso los anyos 750 antes del kristo, del tyempo de los reyes Jeroboam II en Israel i Ozias en Yehuda. Vos akodro ke el reyno de Israel va kaer poko tyempo despues, en 722, i su povlasyon, diez trivos sovre dodje, va dezapareser por syempre.
Deke vos avlo del profeta Amos? Porke mos avla de Gaza, en los pesukim 6 i 7 del primer kapitulo del livro de sus profesiyas:
« Assi dixo Adonay: sobre tres rebellos de Hazah (Gaza), y sobre quatro, no lo faré tornar; por su fazer captivar captiverio perfeto para entregar a Edom. Y encenderé fuego en muro de Hazah, y quemara sus palacios. »
De muevo estash vyendo ke no es kolay de entender el ladino; ama en vedra no es el ladino ke es yuch de entender, es el ebreo. Kuando Amos dize sovre tres « rebellos » (pish’é en ebreo), kale entender pekados; tres i kuatro es manera de dizir munchos. No lo faré tornar kyere dizir no vo trokar de idea (komo el ke aze teshuva). Ke pekados izo Gaza? Izo kaptivos ebreos i los entrego al enemigo Edom.
Esto mos amostra ke la gerra no se eskapo en estos tyempos entre Gaza i los Ebreos, i a lo ke parese no se paso byen para los ebreos. Ke va azer el Dyo kontra Gaza? Veshilahti esh behomat Aza. Encendere fuego en muro de Hazah. Por dizirvos la vedra, la traduksyon de veshilahti esh por encendere fuego no me plaze muncho. Es vedra ke no estamos aki para avlar de traduksyon, ama no me puedo detener de darvos a entender lo ke no me plaze.
El verbo lishloah, en ebreo, es embiyar. Shelah manot, en tyempo de Purim, es embiyar regalos. Aki el verbo es al pasado, ama kuando ay un vav dicho konversivo al empesijo del verbo, de pasado se aze futuro. Dunke ve shilahti no es, asigun mi, ensenderé fuego, ama embiyaré fuego. I el verbo se topa ser al binyan Piel, lo ke kyere dizir ke tyene una forma intensiva. Kyere dunke dizir no solo embiyar, ama embiyar kon fuersa: echar fuego komo un volkano. Yo uvyera trasladado echaré fuego. La Biblia del Rabinato tralada muy byen, asigun mi, veshilahti por: je déchainerai, desbrocharé…
Deke la Biblia de Ferrara tomo encenderé? No se. Sovre todo ke ya save uzar del byervo encender para trasladar un otro byervo ebreo: en Shemot, kapitulo 35, pasuk 3, meldamos a propozito del diya de Shabat: lo tevaaru esh: no encendades fuego.
Bueno. Mos kedaremos sovre este punto de detalyo sin dingun interes, puede ser, para vozotros, ama yo so ansina, agora no trokaré mas…
Esto todo era para amostrarvos ke las kozas fueron una gerra de todo tyempo entre djudyos i Gaza. No es koza mueva oy.
En 150 antes del kristo Yonathan, ermano de Yehuda Makabi, aprova de enserrar a Gaza. No reushe ama toma rehenes (otages) embiyados a Yerushalaïm.
En 97 antes del kristo, el rey djudyo Alexandros Yanaï toma Gaza i la destruye. El territoryo de Gaza aze parte de su reyno.
Ama kuando vyenen los Romanos en 63 antes del kristo, son eyos ke toman a Gaza, ke va ser dominada por eyos i despues los Byzantinos kristyanos, asta ke vengan los arabos muzulmanos en 637 despues del kristo.
Meldi un diya en la gazeta Le Monde ke los Pelishtim son los abuelos de los Palestinyanos de oy. Respondi a esta gazeta de medra para enyegar tala bovedad. Los Palestinyanos de oy son arabos ke no tyenen nada de ver kon los Pelishtim. Ama la jeografiya, eya, no troko, i Gaza esta al mismo lugar. Los enemigos no son los mismos, ama yene son de Gaza.
Pasaremos presto sovre el tyempo ande Gaza dependyo de los Kruzeros, despues de Salaheddin, despues de los Mamelukes, i despues de los Turkos Osmanlis.
Djudyos biven en Gaza del tyempo de los Osmanlis, por egzemplo Nathan de Gaza, ayudante espiritual de Shabetay Tsvi en el siglo 17.
Ama komo ya lo savesh son los Inglezes ke en 1917 toman Gaza a los Osmanlis, i en 1947, en el plano de despartimyento entre djudyos i arabos, Gaza se topa en la vanda de los arabos. I lo va kedar, salvo ke va ser okupada i administrada por los Ejipsyanos, ke desde 1954, desde la venida al poder de Neguib i de Nasser, van a embiyar terroristos palestinyanos yamados infiltrados o fedayin para matar i degoyar a inosentes siviles morando a la frontera kon Gaza.
El 28 de fevrero 1955, los Israelyanos van a embiyar la armada en Gaza i matar unos kuantos fedayin i tambyen Ejipsyanos, ama esto no va abastar; a la rovez, los Ejipsyanos van a kontinuar a embiyar fedayin kontra Israel, asta la gerra de 1956, ande Israel konkista Gaza, i me akodro muy byen ke los askeres israelyanos kantavan « Ve shilahti esh! esh! behomat Aza », un kante tomado de Amos por Emmanuel Zamir.
Ama despues Israel deve render no solo el Sinaï, ama Gaza tambyen a los Ejipsyanos, ke empesan por de muevo el terrorismo kontra Israel, i esto asta ke de muevo Israel konkiste Gaza en 1967.
Komo ya lo savesh, los arabos de Gaza veniyan en masa para lavorar en Israel, i de su lado Israel metyo implantasyones en el territoryo de Gaza.
Ama kuando los terroristos venidos de Gaza kontinuaron sus matansinas en Israel, Israel serro la frontera, ama los terroristos se metyeron a embiyar roketas sovre Israel.
En 2005, Israel yevado por Ariel Sharon vazya sus implantasyones i sale de Gaza i de su territoryo, esperando ansina topar una syerta trankilidad. Ama ni esto va abastar. Los Palestinyanos del Hamas, ke toma el poder en Gaza, kontinuan de embiyar mas i mas roketas sovre Israel. Miles de roketas kayen sovre Sderot.
En desyembre 2008, Israel se dechida de bombardar i entrar en Gaza. Es la operasyon plomo endursido. Los Palestinyanos tyenen 1.300 muertos. Israel sale de Gaza i yene el Hamas embiya sus roketas, asta la sigunda operasyon de los Israelyanos, yamada esta vez Pilar de defensa, ke se tuvo i se eskapo ay unos kuantos diyas. 6 muertos del lado de Israel, 163 ande los de Gaza, ke baylaron siguros ke son eyos ke ganaron esta gerra….
Kuando se eskapara esta gerra de Israel kontra Gaza, ke empeso aze 3.000 anyos? El ke lo save ke me lo diga…
Al djueves ke vyene, si kyere el Dyo!
Edmond Cohen
