eSefarad Noticias del Mundo Sefaradi
Keridos amigos,
Para mi emisyon de djueves apareji unos kuantos byervos sovre el istoryano Fritz Stein y me abolti verso mi amigo de korason Victor Hugo, ke ya aviya trasladado – no todo, eskrivyo unos 300.000 versos, yo trasladi solo kuatro o sinko poeziyas, i esta vez meti solo dos de eyas, sovre la buendad.
André Gide diziya ke no se aze buena literatura kon buenos sentimentos. Yene Hugo aprovo (no puediya konoser a Gide).
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
FRITZ STERN I VICTOR HUGO
Kale ke vos diga la vedra, no topi esta semana el tyempo de lavorar a aparejar una emisyon. Estava entero daldeado (okupado)en mi deklarasyon para el vergi. Moda mueva salyo agora, barminan: La deklarasyon – ke ya es una angusya de koza de si para si – deve agora azerse por internet. Si. Ama kualo azer kuando el internet del vergi tyene un bug i no kyere tomar tu deklarasyon ?
Tuve de irme kon mi komputadera al Ofisyo del vergi para amostrar ke no kaminava. «Si, me respondyeron, ya lo savemos, ya afito a otros tambyen.» El empyegado ke vide ograsheo, (peno) aprovando de adovar mi echo, i al kavo, no puedyendo azer nada ni el tampoko, me dyo la otorizasyon de azer mi deklarasyon sovre papel, hatir grande (buendad) ke fue ovligado de azerme.
Esto todo vos esto kontando para darvos a entender ke fui muy okupado esta semana kon varyas kozas, estas i otras, ke no me permityeron de aparejar una emisyon para oy.
Ama yene vos kyero dizir dos byervos sovre un djudyo ke mos desho la vida en New-York el 18 de mayo, a la edad de 90 anyos, kyero avlar del istoryano Fritz Stern.
Este istoryano nasyo en fevrero 1926 en una sivdad de Silesia ke oy se topa en Polonya i se yama Wroklaw, ama ke kuando nasyo se yamava Breslau i aziya parte de l’Almanya. Veniya de una famiya de la burgeziya djudiya; su padre era mediko, i el komo su padre se konsideravan komo halizes (verdaderos) almanes, asta ke venga el nazismo al poder en 1933, i kon el las leyes antisemitas. El se topa en 1935 a la edad de 9 anyos refujyado en Paris kon su famiya, fuyendo el nazismo, i tanto se tresale por la Fransya ke – a mueve anyos, vos akodro – embiya una letra al primo ministro de Fransya, para dizirle todo el byen ke pensa del pais, i ke
le agradariya de kedarse aki. Ama kyen era en 1935 el primo ministro de Fransya ? Un ombre yamado Pierre Laval, ke unos sinko anyos mas despues va ser el primo ministro del Mareshal Pétain, i va ser el ombre ke va
aferrar a los djudyos para darlos a los Almanes, no solo los djudyos de la parte de Fransya okupada por los Almanes, ama tambyen los djudyos morando en la parte non okupada. Sera djuzgado i fuziyado despues de la gerra. Pierre Laval no responde a la letra del chiko Fritz Stern, i finalmenta su famiya va pueder fuir a los Estados Unidos en septyembre 1938, un anyo antes de la gerra.
En 1943, a solo 16 anyos, Fritz entra en la Universidad de Columbia. Ashkulsun Fritz, ashkulsun tambyen la Universidad de Columbia, avyerta a tales mansevikos imigrantes ! (Ashkolsun ! = Kol ha kavod…Bravo !) Fritz Stern va ser despues el mismo profesor de istorya kontemporanea en esta misma universidad.
Desde el empesijo asta su muerte, Fritz Stern estudyo la istorya de la Almanya la primera parte del siglo ente, keryendo entender komo un pais de grande kultura komo era la Almanya de los premyos Nobel vino a meterse kon alegriya basho un salvaje komo Hitler.
En 1961, eskrivyo «The politics of cultural despair» (Politika de dezespero kultural), estudyando komo syertos intelektuales se opozaron a la modernidad en la Almanya prehitleryana. Kon la modernidad estos intelektuales prefasistos se opozaron de la misma manera a los djudyos.
Esto dicho sovre Fritz Stern, me pensi para oy meldarvos de muevo dos traduksyones ke ize de poeziyas de Victor Hugo. Ya las meldi aki en una otra emisyon, ama oir a Victor Hugo no es nunka pedrita de tyempo, i no ay danyo de oirlo dos vezes.
La primera poeziya tyene por titolo
Le Crapaud, EL SAPO
(un djiz -sorte- de godra rana muy fea)
Ke savemos ? Kyen konose el fondo de
las kozas ?
El sol ponyendose echava sus rayos en las
nuves pembis;
Era el kavo de un diya de tempesta, i la
puesta del sol
Trokava la luvya en fuego en su ogar ardyente ;
Serka de un karril, al bodre de una aguarina
de luvya,
Un sapo mirava el syelo, bestya syegada ;
Grave, el sonyava ; la orror kontemplava
la esplendor.
(Oh ! deke la sufryensa i deke la feor ?
Guay ! El basho-imperyo es kuvyerto de
Augustulos,
Los Cesares de negriguras, los sapos de fistolas,
Komo el prado de flores i el syelo de soles !)
Las ojas se koloravan en los arvoles bermejos.
La agua se aziya espejo, mesklada a la yerva,
en el karril;
La tadre se despligava komo una bandyera ;
El pasharo abashava la boz en el diya aflakado ;
Todo se aziya paz, en el ayre, sovre la agua ;
i, yeno de olvido,
El sapo, sin espanto, sin verguensa, sin birra,
Dulse, mirava la grande aureola solara ;
Puede ser el maldicho se sentiya bendicho,
No ay bestya ke no tenga un espejo de infinito ;
No ay ninyeta inyovle i basha ke no sea tokada
Por el relampago de arriva, en vezes tyerno i
en vezes vyolente;
No ay monstre flakito, shashuto, impuro,
engrenyado,
Ke no tenga la imensidad de los astros en los ojos.
Un ombre ke pasava vyo la orrivle bestya,
I, temblando, le metyo su karkanyal
sovre la kavesa;
Era un papaz tenyendo un livro ke meldava.
Despues una mujer, kon una flor al pecho,
Vino i le arrevento el ojo kon la punta de
su solombrero;
I el papaz era vyejo, i la mujer era ermoza.
Vinyeron kuatro eskolaryos, serenos komo el syelo.
– Yo era kriatura, era chiko, era kruel;-
Todo ombre sovre la tyerra, ande la alma
sorretea sotometida,
Puede empesar ansina el relato de su vida.
Se tyene el djugo, la borrachez i el amaneser
en los ojos,
Se tyene su madre, son eskolaryos alegres,
Chikos ombres gustozos, respirando la atmosfera
A inchir los pulmones, keridos, liberos,
kontentes; kualo azer
Sino atormentar algun ser desmazalado?
El sapo se arrastava al fondo del kamino
afoyado.
Era la ora ande de los kampos las onduras
se azulean;
Eskuro, bushkava la noche; las kriaturas
lo apersivyeron
I gritaron: «Mataremos a este negro animal,
I komo es tan feo, le azeremos muncho mal!»
I kada uno de eyos, riyendo – la kriatura
riye kuando mata –
Se metyo a puncharlo kon un ramo puntudo,
Engrandesyendo el burrako del ojo
arreventado, firyendo
Las feridas, tresalidos, resivyendo palmas
del pasante;
Porke los pasantes reiyan; i la solombra
de tomba
Kuvijava este preto martirizado ke no tyene
mismo un rinchido,
I la sangre, sangre desgrasyada, de todas
partes korriya
Sovre este povre ser tenyendo por krimen
de ser feo;
Se fuiya; teniya una pacha arankada;
Una kriatura lo aharvava kon una pala
asoltada,
I kada golpe aziya espumar este enheremado
Ke, mismo kuando el diya sovre su kavesa
sonriye,
Mismo debasho el grande syelo, se arrasta
al fondo de una kava;
I las kriaturas diziyan:»Komo es negro! Bava!»
Su frente sangreava; su ojo enkolgava;
en la retama
I el punchonero, terrivle de ver, kaminava;
Paresiya salir de kuakyer abominavle serra;
O la negra aksyon, empeorear la mizerya!
Adjuntar orror a la fealdad!
Desgoznado, de piedrizika en pyedrizika
enkoshado,
Dainda respirava; sin avrigo, sin refujyo,
Se arrastava; paresiya ke la muerte,
nazlaneandose,
Lo topava tan estremesyente ke lo refuzava;
Las kriaturas keriyan aferrarlo en un gaytan,
Ama les eskapo, arresvalando a lo largo de
los arvolikos;
El karril era grande avyerto, arrasto sus
yagas en el
I se enkasho, sangriente, rompido, la kavesa
avyerta,
Sintyendo kualkyer freskura en este vedre
muladar,
Lavando la krueldad del ombre en este lodo;
I las kriaturas, kon la primavera sovre la kara,
Blondas, grasyozas, nunka se teniyan tan
divertido;
Todos avlavan endjuntos i los grandes
a los chikos
Gritavan: «Mira ver! Ola Adolphe, ola Pierre,
Tomaremos para eskaparlo una pyedra godra!»
Todos endjuntos, sovre el ser por azardo
aboresido,
Apuntavan sus miradas, i el dezesperado
Mirava abashar sovre el estas frentes orrivles.
– Guay! Tengamos eskopos, ama no
tengamos mendirizes;
Kuando apuntamos a un lugariko del
orizonte umano,
Tengamos la vida, i no la muerte,
en muestra mano. –
Todos los ojos persegian el sapo en el lodo;
Era furor i era felisidad;
Una de las kriaturas vino atras, traendo
una pyedra,
Pezgada, ama para el mal kolay alevantada,
I disho: «Vamos a ver komo esto va azer.»
Halbuki, en este mismo tyempo, djusto
en este punto de tyerra,
El azardo traiya una araba muy pezgada
Travada por un vyejo azno ferido,
flako i sodro;
Este azno akavado de kanserya, kosho
i desmizeryado,
Despues de un diya de kamino
se aserkava del ahir;
Arrodeava la kareta i yevava un sesto;
Kada paso ke aziya paresiya el penultimo;
Esta bestya kaminava, aharvada, rompida;
Los golpes la emburujavan komo una nuve;
Teniya en sus ojos envelados de una vapor
Esta estupidez ke puede ser es estempereo;
I el karril era afoyado, i tan yeno de lodo
I de un lado tan duro ke kada buelta
de karucha
Era komo un lugubre i ronko
arankamyento;
I el azno iva mauyando i el aznero
blasfemando;
El kamino abashava i pushava el hamor;
El azno sonyava, kedo, basho el asote,
basho el palo,
En una ondura ande el ombre no se va.
Las kriaturas oyendo esta karucha i este
paso,
Se aboltaron ruidozos i vyeron la kareta:
«No metas la pyedra sovre el sapo. Kedate!»
Gritaron. «Mira, la araba abasha
I va pasar ensima, es muncho mas divertyente.»
Todos miravan. En supito, avansando
en el karril
Ande el monstre asperava su tormento ultimo,
El azno vyo el sapo, i, triste – guay! abokado
Sovre un mas triste, – pezgado, rompido,
desganado, eskorchado,
Paresyo golerlo kon su kavesa basha;
Este galeryano, este maldicho , este hazino,
izo mersed;
Arrekojo su fuersa amatada, i, apretando
Su kadena i su yular sovre sus muskulos
en sangre,
Rezistyendo al aznero ke le gritava: Adelanta!
Dominando del pezgo la abominavle
komplichita,
Kon su kanseryo achetando el kombate,
Travando la karreta i levantando la albadra,
Atrabulado, desviyo la karrucha implakavle,
Deshando detras de el bivir este desmazalado;
I despues, basho un golpe de asote, tomo
de muevo su kamino.
Estonses, soltando la pyedra eskapada
a su mano,
Una de las kriaturas – el ke konta esta istorya, –
Basho la kube immensa a la vez blu i preta,
Oyo una boz ke le diziya: Sea bueno!
Buendad del bovo! dyamante del karvon!
Santa enigma! luz veneravle de las tinyevlas!
Los selestos no tyenen nada mas ke los
funebres
Si los funebres, grupo syego i kastigado,
Sonyan, i no tenyendo la alegriya, tyenen
la piyadad.
O espektakulo sagrado! la solombra
apiyadando la solombra,
La alma eskura vinyendo en ayudo a
la alma tenebroza,
El bovo, esmovido, sovre el desgrasyado
abokandose,
El maldicho bueno azyendo sonyar el
elijido negro!
El animal adelantando kuando
el ombre va atras!
En la trankilidad del palido krepuskulo,
La behema a vezes pensa i syente
ke es ermana
De la misteryoza i profonda dulsor;
Abasta ke un relampago de grasya
relumbre en eya
Para ke sea igual a la estreya eternal;
El azno ke, aboltando la tadre,
sovrekargado, kansado,
Muryendo, sintyendo sangrear
sus poveretos eshuekos yanos,
Aze unos kuantos pasos mas,
se desviya i se aturva,
Para no trespizar un sapo en el lodo,
Este azno basho, ensuzyado,
firido kon el palo
Es mas santo ke Socrate
i mas grande ke Platon.
Bushkas, filozofo? O pensador, meditas?
Kyeres topar lo vero basho muestras
brumas maldichas?
Kree, yora, undete en el insondavle amor!
Kualkyer es bueno ve klaro
en la bruska enkrusijada;
Kualkyer es bueno mora en un kanton
del syelo. O savyo,
La buendad, ke del mundo aklara la kara,
La buendad, esta mirada de la demanyana
inosente,
La buendad, puro rayo ke kalyente
lo deskonosido,
Instinkto ke en la noche i en la sufriyensa,
ama,
Es el atadero indeskriptivle i superyor
Ke aune en la solombra, guay! tan lugubre
munchas vezes,
El grande inosente, el azno,
al Dyo el grande savyo.
Ansina s’eskapa esta poeziya de Victor Hugo. A los ke saven el franses, diré: no la djuzgezsh sovre mi povereta de traduksyon. Kale ir a meldarla en franses, komo fue eskrita por Hugo, sea sovre un livro, sea sovre internet. Es muy kolay: Le crapaud Victor Hugo sovre Google, i tenesh la poeziya en franses:
http://poesie.webnet.fr/lesgrandsclassiques/poemes/victor_hugo/le_crapaud.html
La sigunda poeziya es muncho mas korta, ama trata eya tambyen de la buendad. Tyene por titolo :
DESPUES DE LA BATAYA
Mi padre, este gibor a la sonriza tan dulse,
Segido d’ un solo asker ke keriya entre todos
Por su grande koraje i por su kodja boy,
Kavalkava, en la tadre de una bataya
Sovr’el kampo yeno de muertos ande kaia noche.
Le paresyo en lo brusko oir una flaka keshada.
Era un Espanyol de la armada en fuida
Ke s’arrastava sangriento al bodre del kamino,
Rinchendo, rompido, palido i muerto mas ke bivo
I ke diziya : «De bever, de bever, por piyadad ! »
Mi padre, esmovido, tendyo a su asker fiel
Un bokal de raki enkolgado a su albadra
I disho : « Na, da de bever a este desmazalado ».
En supito, en el momento and’el asker enkorvado
Se abashava verso el, el ombre, un djiz de arap,
Toma un tufenk ke dainda teniya,
Trava a la frente de mi padre, gritando « Karamba ! »
La bala paso tan serka ke su chapeo se kayo,
I ke el kavayo izo una ida atras.
« Dale yene de bever », disho mi padre.
En vedra, no era un bokal de raki ke teniya el
jeneral Hugo, el padre de Victor. Era un bokal
de rhum, so yo – libertad del traduktor – ke
troki el rhum en raki, ke mos kuadra mas en
djudeo-espanyol. Ama si pensaj, ke sea rhum
o ke sea raki, no era de alkool ke el firido
teniya lo mas de menester : es de agua, asigun
estava pedryendo toda su sangre.
Al djueves ke vyene, si kyere el Dyo!
Edmond Cohen
Paris Fransya
