eSefarad Noticias del Mundo Sefaradi
Keridos amigos,
Mi emisyon de este djueves va ser, en primera parte, sovre Frank Sinatra, ke en mas de ser el kantador i aktor ke savemos, fue un grande amigo de los djudyos i de Israel, i en sigunda parte vo avlar de los djudyos de Mexico.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
FRANK SINATRA. LOS DJUDYOS DE MEXICO
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Mi emisyon se puede oir en el mundo entero sovre internet, al sityo de Radio J, http://www.radioj.fr, sea en direkto (el djueves a las 4 i sesh, kale klikar arriva a la derecha, sovre Ecoutez Radio J en direct) sea en redifuzyon, indose al kavo de la redifuzyon de las emisyones de la medyudiya del djueves.
De otra parte, vos akodro ke el proksimo atelye de konversasyon de Vidas Largas se va tener el martes primo de marso, de las dos a las kuatro, en el Centre Communautaire. Estos atelyes son avyertos a todos, venid munchos. A estos atelyes una mujer va faltar: Gisèle Salmona, la sekretarya de muestra asosyasyon Vidas Largas, ke no mankava dingun atelyé, mos desho la buena vida el djueves pasado. Era muy hazina sin ke lo sepamos, porke nunka se keshava. Bendicha sea su memorya.
I agora vo empesar mi emisyon, avlandovos de un ombre ke nasyo aze syen anyos, el 12 de desyembre 1915. Este diya nasiya en Hoboken (New Jersey) en una famiya de orijen italyana, i mismo sisilyana por lo ke es del padre, el grande kantador i aktor Frank Sinatra. Kyen no se tresalyo oyendolo kantar Stranger in the night? Ama puede ser ke algunos de vozotros, keridos oyentes, no saviyan ke Frank Sinatra, si no era djudyo, fue un grande amigo de los djudyos en jeneral i de Israel en partikolar. Mi amigo José Molho me embiyo un ermozo artikolo de Catherine Garson en la gazeta Actualité Juive, intitolado «Frank Sinatra, le Roi des Juifs» (el Rey de los Djudyos), i es bazandome sovre este artikolo ke pensi azer la primera parte de mi emisyon de oy.
Kuando el chiko Sinatra era dainda kriatura, su madre ke lavorava teniya de desharlo, i lo fiyava a su vizina djudiya, la Senyora Golden, syempre dispuesta a okuparse de el i de guadrarlo, avlandole yidish i dandole strudel i otras buenas kozas de la kozina djudiya. Eya le va ofreser una djoya en forma de mezuza ke el va yevar muncho tyempo.
(El empesijo de esta istorya me da muncho a pensar a la chikez i mansevez de un otro rey en la muzika, kyero avlar de Louis Armstrong. Un poko lo mismo fue kon el, ke topo, kuando era chiko, amor i kalor en una famiya djudiya, ke le ofresyo su primera trompeta – i byen izo! Aya se ambezo el yidish (a lo manko es lo ke meldi) i yevo vida entera un magen David.)
Syerro la paranteza, i me abolto a Frank Sinatra, ke va kedar vida entera amigo de los djudyos, peleandose kontra los antisemites. Mas grande, ambezandose ke unos klubs de golf no admiten a djudyos, va entrar maksus en un klub de golf djudyo.
Kuando va tener su primer ijo, va eskojer komo padrino a su amigo djudyo Mani Sacks, afillu las protestasyones del papas.
Durante la gerra, ambezandose lo ke esta afitando a los djudyos en Evropa okupada, djuga en un espektakolo eskrito en 1943 por Ben Hecht kon una muzika de Kurt Weill, intitolado «We will never die» (Nunka mos vamos a morir). El 9 de marso 1943, son 40.000 en el Madison Square Garden, i despues el espektakolo se va en Chicago, Philadelphia, Boston, Washington, i Hollywood- Los Angeles. Ben Hecht fue el primero a renderse kuenta ke esto todo no aviya servido de nada, sino azer yorar munchos djuyos amerikanos, ama sin ayudar ni salvar a un solo djudyo evropeo. Ama esto no es la kulpa de Frank Sinatra, ke partisipo a todos los espektakolos malgrado ke ya era una star muy okupada (a parte de munchos diskos, djugo en dos filmos este anyo 1943, komo Higher and higher, kon Michèle Morgan).
I malgrado el pesimismo de Ben Hecht, kyen save? Puede ser ke este espektakolo kontribuyo a enkorajar a estos mansevos amerikanos ke vinyeron en Fransya el anyo de despues para kombatir, i kon ke ardor, a los almanes, i salvar a los djudyos sovrebivyentes.
Lo ke es siguro, es ke en 1945, va ser la vedeta, i mismo el solo aktor de un filmiko anti-rasisto de diez minutos, «The house I live in» (la kaza ande moro), de Albert Maltz, ande defende un ijiko djudyo aharvado por sus kompanyeros, i Sinatra les aze la lisyon ke todos son los mismos amerikanos i ke no kale azer diferensya. Este filmiko se puede ver sovre youtube: https://www.youtube.com/watch?v=weaUOdCIBGQ
Sinatra va ser tambyen un ardyente partezano del syonismo. En 1947, partisipa en Hollywood a un konserto en favor de un estado djudyo en Palestina, i va azer mas de esto: va ayudar la Hagana a merkar armas a eskondidas . En un kafé Sinatra aze la konosensya de Teddy Kollek (ke sera despues mayor de Yerushalayim), el kual le da a entender ke tyene de yevar un milyon de dolares a un vapor kargado de armas, i ke la polisiya del FBI esta sorvelyando todo lo ke aze. Se meten de akodro, i por una puerta sale Kollek kon una chanta, i la polisiya lo sige. Entremyentres Sinatra sale por otra puerta kon la para i se va al vapor sin ser sospechado, i remite las paras al kapitan, i el vapor se va kyeto kon las armas i las paras…Es Kollek ke lo konto despues.
La amistad de Sinatra para Israel i el syonismo se ve tambyen en 1966 en el filmo de Melville Shavelson «Cast a giant shadow» (en franses l’ombre d’un géant – la solombra de un gibor) ke konta la istorya vedradera del jeneral Marcus, djudyo amerikano ke va kombatir en 1948 kon Tsahal. El va ser ke va imajinar i azer fraguar el kamino dicho de Birmaniya ke va permeter a Tsahal de guadrar el kontakto kon Yerushalayim i embiyarle komida i armas malgrado la desfecha de Latrun i la serradura por los arabos del kamino auzado para Yerushalayim. Malorozamente este jeneral Marcus, ke no saviya avlar ebreo, va ser matado por yerro por un asker djudyo. No es Sinatra ke djugava este jeneral, sino Kirk Douglas, ama el, Sinatra, djugava el rolo de un avyador, veluntaryo amerikano kristyano, ke tyene un avyon ama kaji no armas para afrentar a los Ejipsyanos, i me akodro ke antes de ser matado, echa agua kon un bokal de soda, su ultima arma.
Antes de este filmo, en 1962, Sinatra se fue en Israel para dar syete konsertos en favor de la fundasyon de un sentro para las mansevezes djudiya i araba en Nazareth. Keriya ver todo el pais, inkluendo las alturas del Golan. Estavamos sinko anyos antes de la gerra de los sesh diyas; Israel izo saver a los Siryanos ke las arabas kon Sinatra no eran militares i ke no teniyan de travar.
Sinatra kontinuo vida entera de ovrar en favor de Israel, kon sus paras. Ayudo para fraguar un sentro para estudyantes en el kampus de la Universita de Yerushalayim. Este sentro yeva su nombre, a el ke k se yamava por shaka «el rey de los djudyos».
Sinatra se muryo el 14 de mayo 1998, a la edad de 82.
I despues de tenervos avlado de Frank Sinatra, kon el tyempo ke me keda, vos kyero avlar agora de los djudyos de Mexico.
Si no tomi una emisyon entera sovre estos djudyos, es por dos razones: la primera, es ke teniya la gana de avlarvos de Frank Sinatra. La sigunda, es ke la istorya de los djudyos en kualkyer pais de Amerika ke sea, es bastante korta, i de toda manera no puede empesar antes de 1492, kuando fue deskuvyerta la Amerika por los evropeos en jeneral i los espanyoles en partikolar.
Ya se ke la asemejansa entre las piramidas mexikanas komo la de Chichen Itza, por egzemplo, i syertas ziggurates babilonyanas dyo se pensar a algunos ke los Mayas se ambezaron de los Babilonyanos. Bushkando sovre internet, topi, en la Biblioteka en linea Watchtower, de los Testimonyos de Jehovah, un artikolo dicho «de muestro korrespondante en Mexico», sovre las piramidas mexikanas, ke se eskapa ansina: «no seriya sorprendyente ke las zigurates babilonyanas (i la relijyon ke en eyas se pratikava) ayan sido los modelos de las impresionantes i misteryozas piramidas del Mexico». Esto es lo ke dize el artikolo, ama si, seriya muy sorprendyente, porke no veo komo los moradores del Mexico podriyan konoser a las ziggurates babilonyanas syenes de anyos antes de Cristobal Colon, i yene syenes de anyos despues de los Babilonyanos.
Esto dicho, kuando Hernan Cortes entro en el Mexico en los anyos 1520, es posivle ke kon el aviya konversos, i komo estamos solo a manko de trenta anyos de 1492, falsos konversos i halizes i sekretos djudyos.
Ama topi sovre internet un artikolo muy interesante de Brigitte Natanson, ke es profesora de literatura i sivilizasyon latino-amerikanas en la Universita de Orleans, i ke izo su tezis sovre «Les juifs au Mexique: portrait d’une communauté.»(los djudyos en el Mexico: retrato de una komunita). No es su tezis ke meldi, solo un artikolo intitolado: «Lois migratoires et réalité: quelques données sur l’immigration juive au Mexique au XXème siècle» (Leyes migratoryas i realidad: unas kuantas informasyones sovre la imigrasyon djudiya en el Mexico en el siglo 20).
En este artikolo, Brigitte Natanson mos ambeza ke si es vedra ke uvo kripto-djudyos en el Mexico al empesijo de la kolonizasyon, a poko a poko la Inkizisyon i la asimilasyon izyeron dezapareser estos anusim en tanto ke djudyos. Es vedra ke la Inkizisyon no pedriyo tyempo: el primer djudyo a ser kemado lo fue en 1529, solo 10 anyos despues de la entrada de Cortes en el Mexico. El ultimo fue el papas Miguel Hidalgo y Castilla, akuzado a la vez de luteranismo, ateismo i djudaismo! Afillu lo ke puede pareser un poko kontradictoryo en una tala akuzasyon, fue fuzilyado en 1811. Kuando la Inkizisyon se eskapo dos anyos mas despues en 1813, no aviya mas «djudaizantes» en el Mexico.
A la fin del siglo 19, no ay djudyos en Mexico, salvo uno asigun una revista, El Sabado, del profesor Francisco Rivas en 1889. Este profesor, el mismo djudyo, eskrive: “ A los miembros sanos de la colonia israelita. Los exhortamos a perseverar en la persuasión mosaica, y no a imitar a ciertos perversos circuncisos que reniegan de su raza, de su patria y de su Dios”.
Unos pokos djudyos vyenen al kavo del siglo 19 de Alsace, de Almanya (lo ke es la misma koza a la fin del siglo 19) i de Ingletyerra.
Ama, asigun Brigitte Natanson, la haliz imigrasyon djudiya empeso solo al empesijo del siglo 20, kon la politika de imigrasyon del prezidente Porfirio Diaz. Los evropeos son konsiderados komo mijores lavoradores ke los indijenos. I entre los evropeos, los preferidos son los espanyoles, los fransezes i los beljikanos, ke son de la misma rasa, mas ke los Almanes o los Inglezes, afillu si lavoran muy byen. La vedra es ke los primeros son katolikos i los sigundos protestantes, i la relijyon katolika no keda de ser la sola permetida en el Mexico, a la diferensya de Arjentina o Estados Unidos.
De tal manera ke los djudyos fuyendo las persekusyones de la Evropa del este van sovre todo en Argentina i Estados Unidos.
Yene vyenen djudyos del imperyo osmanli, fuyendo las gerras balkanikas i la Grande Gerra. Es kolay para eyos ke todos ya avlan djudeoespanyol. Me akodro de mi amigo Leon Cohen, venido de Tanger en Paris, i oyendo en el kal Saint-Lazare a los djudyos sefaradim de Turkiya avlar entre eyos, me dize: «son kuryozos estos djudyos de Turkiya ke avlan komo Mexikanos…» Esto para dizir ke los Mexikanos tyenen una manera lenta de avlar mas serka de la manera djudeoespanyola, ke la manera de los espanyoles de Espanya.
Ay tambyen una komunita de djudyos de Syria, yamada Monte Sinaï, ke se forma en el empesijo del siglo vente.
I despues de los anyos 20 vyenen los ashkenazim, malgrado leyes ke no permiten kolay la immigrasyon.
Oy los djudyos en el pais entero son unos 50.000 (sovre unos 120 milliones de mexicanos, sea 0,04%, o uno por 2.400). Unos 37.000 biven en la sivdad misma de Mexico. La mayoriya de los djudyos agora, si no son todos rikos, a lo manko azen kaji todos parte de la burgeziya.
Asigun lo ke meldi, forman una grande famiya muy unida, afillu si ay los ke vyenen de aki i los ke vyenen de aya, los ke son mas relijyozos i los ke lo son menos. Ama yene, por lo ke meldi, biven entre eyos: ay 23 kales en el pais, 12 eskolas djudiyas, ande van 80% de los chikos djudyos, una universita, ets. I grasyas a esto, los djudyos despues se kazan entre eyos: ay solo 10% de kazamyentos mikstos, lo ke es poko komparado a lo ke se pasa en Fransya i en los otros paizes de Evropa.
Meldi tambyen ke los djudyos de Mexico no sufren de antisemitismo, puede ser porke no son munchos, puede ser tambyen porke munchos mexicanos saven ke sus antepasados eran djudyos. I meldi tambyen ke, si son muy atados kon el Estado de Israel i dan todos para el KKL, no son por lo tanto interesados por la aliya, syendo ke se syenten byen en Mexico.
Akodro a los ke son interesados por la vida djudiya en Mexico ke pueden ir a meldar sovre internet el «Diario Judio, diario de la vida judia en Mexico y el Mundo». I de fakto, es una gazeta muy kompleta ke avla de todo lo ke interesa a los djudyos, ke sean en Mexico mismo o en el mundo entero. Ay una rubrika Idiomas, ke inkluye franses, ingles, yidisch, espanyol por siguro, ama tambyen djudeo-espanyol. Si vos vash estos diyas a la rubrika djudeoespanyol, veresh una foto del profesor Sephiha i de Michel Azaria tomada en Auschwitz en 2003, kuando fue la inogurasyon de la laja en djudeo-espanyol, grasyas al kombate de estos dos ombres.
http://diariojudio.com/lang/djudeo-espanyol/
Podresh ver tambyen ke la gazeta mete munchos tekstos de mis emisyones de aki, ke va tomar en la gazeta eSefarad, ke eya se topa tambyen sovre internet desde Argentina, i publika todas mis emisyones una detras de otra.
Agora ya vino el tyempo de eskapar esta emisyon, i vos digo al djueves ke vyene, si kyere el Dyo!
Edmond Cohen
Paris – Fransya
