eSefarad Noticias del Mundo Sefaradi
Keridos amigos, aki toparesh el teksto de mi emision del djueves 18 de avril, ande vo avlar del Bund.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
EL BUND
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes ke vyene, 23 de avril, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
El martes pasado tuvimos el Yom aatsmaut, i uvyera sido bueno ke vos avle oy de kozas sovre Israel. Por tanto, me pensi de avlarvos oy de una organizasyon ke syempre estuvo opozada al syonismo, kyero avlar de la organizasyon agora bastante deskonosida de se yama el Bund.
Me vash a demandar : deke avlar oy, dos diyas solo despues del Yom aatsmaut, de una organizasyon opozada al syonismo ?
La repuesta se topa en una istorya de Djoha. Djoha se va al banyo turko, i los tellakes no se okupan byen de el, lo deshan ansina, no le dan ermozos shavones, le dan un pishtamal suzyo…i el les da un bakshish de boda, no se kuantas liras, ama komo si era el un rikinyon.
La semana despues, kuando vyene de muevo al hamam, esta vez todos se enkorvan al kyen se va okupar lo mijor de el, i es tratado komo un pasha. Ama el les da un chiko bakshish de prove . Los tellakes son enkantados : deke tan poko oy ? I Djoha les responde : o hamam, bu para, o para, bu hamam. Para el banyo de la otra vez, la para de oy. Para el banyo de oy, la para de la otra vez !
Yo para oy i el Yom aatsmaut vos ize el 7 de fevrero una emisyon intitolada Las reushitas de Israel. I la emisyon ke vo azer agora sovre el Bund, es la ke vos teniya de azer el 7 de fevrero…O hamam, bu para ; o para, bu hamam…
Kualo es el Bund ? Vos tengo de dizir ke, konosyendo muy poko esta istorya, lavori kaji solo kon internet sovre Wikipedia, i sus artikolos sovre el Bund, Liberman, Kremer, Medem i Edelman. El Bund es una organizasyon djudiya sosyalista, ke nasyo en Lituaniya en 1897, ke tuvo una grande importansya en la Evropa del Este en la primera mitad del siglo vente, i dainda bive, ama kale mijor dizir sovrebive, syendo ke la mayoriya de sus myembros dezaparesyeron kon la Shoah.
Ama empesaremos, komo syempre, por el empesijo, i por esto vos tengo de avlar de un djudyo litvak, kijo dizir nasido en Lituaniya, en 1845, ke se yamava Aaron Samuel Liberman. Ijo de un savyo relijyozo, es un intelektual ke, en 1872, dunke a la edad de 27 anyos, entra en Vilnius, kapitala de la Lituaniya, en un grupo revolusyonaryo djudyo. Estamos en el tyempo de la opresyon tsarista en jeneral, i kontra los djudyos en partikolar.
La polisiya tsarista topa el grupo i lo destroye, ama Liberman reushe de fuir en Londres, Ingletyerra. Aya entra komo gazetero en la gazeta sosyalista Vperiod (adelantre, en ruso), i funda la Asosyasyon de los sosyalistos djudyos de Londres, kompozada de estudyantes i ovreros. En el mismo tyempo, Karl Marx bive en Londres ande esta eskrivyendo El Kapital. Ama Karl Marx , afillu si nasyo djudyo, es un antisemit ke eskrive kozas inkreivles. Solo para darvos una idea, vos kyero meldar un pedaso de la letra ke eskrive a su amigo Engels, el 30 de julyo de 1862 , avlando de Ferdinand Lassalle, otro sosyalisto djudyo, ke Marx yama el « negro-djudyo » :
« Agora esto siguro, komo lo preva la konformasyon de su kavesa i el kreser de sus kaveyos, ke desyende de los negros ke se adjuntaron a Moshe kuando traversaron Ayifton (o puede ser su madre o su vava tuvo relasyones kon un negro). Es siguro ke esta meskla de djudyo i de alman kon la sustansya de baza del negro deviya dar un kuryozo rezultado. La importunidad del haver es tambyen tipika del negro. »
Esto es una letra privada, ama el Kapital tambyen es yeno de dichas antisemitas, de tal manera ke nunka entendi komo se aze ke tantos uvo, i dainda ay, djudyos marksistos. La repuesta deve ser ke nunka meldaron sus eskritos.
Esto dicho, no kale olvidar ke Marx era el mismo djudyo de padre i de madre…Es un egzemplo tipiko de lo ke Theodor Lessing yamo der jüdische selbsthass, el odyo djudyo de si mismo.
Vos parese puede ser ke me aleshi de mi sujeto ke era los empesijos del bundismo, ama en vedra no. Porke nunka los bundistos van a adjuntarse a la ideolojiya komunista. Syempre, i asta agora, van a kedar sosyalistos, ama no komunistos.
Para aboltar a Liberman, vos dire ke afillu en Londres, aze sus diskorsos i konferensyas solo en yiddish, porke para el, el lavoro revolusyonaryo se deve azer en la lingua popular, avlada por los ovreros djudyos : el yiddish.
Ama despues empesa en 1877 una vida difisil, porke Liberman deve irse a Viena . Aya funda una gazeta Haemet (La Vedra) i la aze embiyar en Rusiya. La polisiya de Austria lo aferra i lo embiya en Almanya, ke lo arondja i se ve de muevo en Ingletyerra de ande se fuye verso Amerika en 1880, ande se muere poko tyempo despues, a la edad de 35. El mismo se seriya matado.
Son los grupos sosyalistos fundados por Liberman ke en 1897 se van a aunir para azerse el Bund.
1897, es el mismo anyo ande Herzl reune el kongreso de Basel, ande nasyo el movimyento syonisto.
Ama dainda no estamos en 1897, i vos tengo de avlar de un otro revolusyonaryo djudyo litvak, nasido, el, en 1865, dunke 20 anyos despues de Liberman. Su nombre : Arkadi Kremer. Ama es konosido komo der tate, el padre, porke el tambyen es konsiderado komo el padre del Bund.
Estudyante, entra en los movimyentos revolusyonaryos , i es aferrado una primera vez en 1889 ; tyene 24 anyos.
Ocho anyos mas despues, en 1897, i para pueder entrar en la Sigunda Internasyonala sosyalista, por lo kualo es menesrter de un partido, Kremer funda kon sus amigos el Algemeyner Yidischer Arbeter Bund in Lite, Polyn un Rusland (la Unyon Jenerala de los lavoradores Djudyos de Lituaniya, Polonya i Rusiya) mas konosida kon la sola palavra Bund : Union.
Es Kremer ke eskojo el nombre Bund (union) i no el nombre Partei (partido) porke kyere una organizasyon mas avyerta a varyas tendensyas ke un partido.
I desdel empesijo el Bund va tomar sus distansyas kon un otro partido de ovreros sosyalistos el tambyen, ama syonisto, el Poalei Tsion. El Bund es kontra la idea de irse de su lugar para fraguar el sosyalismo en un otro lugar, kual ke sea. Es simptomatiko ke el Bund sea fundado en el mismo anyo, 1897, ke el Kongreso syonisto de Basel.
De tal manera ke los ovreros djudyos de la Evropa del Este, van a tener de eskojer entre tres tendensyas : los djudyos bolchevikos, los djudyos syonistos, i los djudyos bundistos, ke se rekonosen el el partido menchevik de Julius Martov (djudyo nasido en Estambol, ama , a la diferensya de los bundistos, el no kyere dingun partikolarismo djudyo i yidisch).
Kale byen entender ke los bundistes, komo son yamados, se syenten sosyalistos antes de ser djudyos. Asigun los bundistos, los djudyos son una kategoriya partikolar de sosyalistos. Rompen enteramente kon el judaismo relijyozo. « La literatura sosyalista es muestra tora », dizen los bundistos, i asigun Rachel Ertel, los bundistos son prontos para morir por el ateismo komo sus padres lo eran para la Sanktifikasyon del Nombre (kidush ashem).
El mismo Kremer ke fundo el Bund en 1897, funda un anyo despues el Partido Ovrero sosyal-demokrato de Rusiya. El Bund aze parte en tanto ke movimyento djudyo a este muevo partido.
Todos son echados en prezo, inkluyendo Kremer, ke va kedar dos anyos asta ser liberado en 1900 , i fuir en Suissa i de aya en Londres.
Ama Lenine, ke es bolchevik, va azer salir el Bund del Sigundo Kongreso del POSDR en 1903, i tomar la mayoriya en el Kongreso.
De este tyempo, el Bund va luchar a la vez kontra el bolcheviksmo i kontra el syonismo.
A su kuatren kongreso, el Bund deklara ke « konsidera el syonismo komo una reaksyon de la klasa burgeze kontra el antisemitismo i la situasyon anormala del puevlo djudyo. El syonismo politiko tenyendo por eskopo la kreasyon de un territoryo para el puevlo djudyo no puede pretender rezolver la kuestyon djudiya (…) ni satisfechar el puevlo en su globalidad. »
Esto no va impedir los bundistos de aunirse en vezes kon los syonistos para luchar en djuntos en tyempo de pogromes, komo lo vamos a ver mas despues en el Ghetto de Varsovia en 1943.
Ama dainda no estamos en esto, porke antes kale avlar de la revolusyon de 1917. Kuando avlo de la Revolusyon de 1917, avlo de la de fevrero, la de los mencheviks, sostenida por el Bund. A la rovez, el Bund se va opozar a los bolchevikos i a la revolusyon de oktovre.
Ama durante la gerra sivil, vyendo komo los blankos aziyan pogromes antisemitos, los bundistos se metyeron de la vanda de los kolorados kontra los blankos.
En 1920 i 1921, el Bund de Rusiya se korto, i su syedra kon Heifetz i su sentro kon Rafes se aunaron a los bolchevikos. De tal manera ke el Bund dezaparesyo de la URSS, indimas ke Staline elimino los ke kedavan.
Solo kedo el Bund en Polonya. Ama el Partido Polones Sosyalisto no era muy amigo del Bund por espanto de los electores antisemitos, i se kreo una seksyon djudiya del PPS para konkurensar el Bund.
Entremyentres un ombre se va azer uno de los mas importantes en el Bund, kyero avlar de Vladimir Medem.
Nasido en Letoniya en 1879, Medem fue bavtizado komo ortodokso por su padre, el mismo djudyo konvertido al protestantismo. Por tanto, va ser este sozde ortodokso ke va tomar konsensiya ke en vedra es djudyo, i va ser uno de los kapos i teorisyanos mas importantes del Bund.
En 1916, Medem, influensado por Simon Doubnov, lucha por la otonomiya kulturala de los djudyos al seno de los otros partidos sosyalistos. Asigun el, kada nasyonalidad del mismo pais, i los djudyos forman una nasyonalidad, deven krear un movimyento separado. Kada sivdadano del pais eskoje komo kyere de ke nasyonalidad kyere azer parte. Kada movimyento nasyonal deve tener su otonomiya al seno del pais i de su Parlamento jeneral.
Medem se peleo syempre, en primero, asta 1917, kon los tsaristos ke lo aferraron en 1912 asta 1915, i despues de 1917 kontra los bolchevikos.
Se egzilo verso los Estados Unidos ande se muryo en 1923, a la edad de 44 anyos, de una hazinura de los rinyones.
El nombre de Medem kedo en la memorya de los Bundistos, i dainda en Paris ay un sentro Medem i una biblioteka Medem, en memorya de este ombre i de sus ideas.
Esto dicho, el Bund era una organizasyon muy importante en Polonya antes de la Sigunda Gerra Mundyala, ke konkurensava el movimyento syonisto.
Kuando empeso la gerra i ke la Polonya fue konkistada de una parte por los Almanes i de otra parte por los Rusos asigun el pakto jermano-sovyetiko, el Bund lucho kon koraje ama fue aharvado por las dos partes. Los Rusos , alyados de los Almanes, aferraron a los Bundistos, i dos de sus prinsipales kapos, Victor Alter i Henryk Erlich, fueron fuzilyados por los Rusos en desyembre 1941, komo syendo alyados de los nazis.
En kuanto a la parte okupada por los Almanes, no tengo menester de dizir ke syendo djudyos, arreyevaron la shoa komo los otros, salvo ke munchos syonistos ya se aviyan ido en Palestina i no fueron tokados por la Shoa, kuando los bundistos, ke keriyan azer el sosyalismo en el pais ande moravan, aki la Polonya, tuvyeron la suerte de los djudyos de Polonya, kijo dizir fueron kaji todos matados.
Kale yene akodrarvos ke los djudyos lucharon en djuntos kontra los Almanes, i ke amanyana 19 de avril 2013 va ser el setenten aniversaryo de la Rebuelta del Ghetto de Varsovia. Ya vos konti en otras emisyones komo los rezistantes del Ghetto de Varsovia eran en dos organizasyones, la Aliansa militar de Dawid Apfelbaum, i la Organization Djudiya de Lucha. Esta sigunda organizasyon era dirijida por Mordehay Anielewicz, un mansevo del Hashomer atsair, kijo dizir un sosyalisto syonisto. Ama no kale olvidarse ke, al lado de el, aviya un kapo del Bund yamado Marek Edelman. A la muerte de Anielewicz el 8 de mayo 1943, es Edelman ke fue el muevo kapo i kontinuo la lucha, asta ke pudo fuirse por los lagumes, i sovresalir de esta manera.
Bundisto era, bundisto se kedo asta su muerte, en 2009 en Varsovia.
En primero, va kombatir kon los otros rezistantes polakos en la rebuelta de Varsovia en 1944.
Yene se va sovresalir de esta lucha, i despues de la gerra, bundisto ke es, se va kedar en Polonya, afillu el pogrom de Kielce en 1946, afillu las persekusyones antisemitas de Gomulka despues de 1968.
I bundisto ke es, kuando se va en Israel, es para vijitar a amigos, nunka par azer aliya. Al kontraryo, aprovecha su prezensya en Israel para azer deklarasyones en favor de los Palestinyanos.
En 1971, su mujer, por tanto bundista komo el, se va de Polonya kon sus dos kriaturas para ir a morar en Paris. Edelman va kedar en Polonya asta su muerte en 2009 a la edad de 90.
Esto dicho, el bundismo agora pertenese sovre todo al paseo, afillu si esta organizasyon egziste dainda. Aze poko tyempo, el Sentro Medem de Paris kombido los djudeo-espanyoles a venir a su kaza, i vuestro servidor tuvo mismo el onor de azer aya, en tyerra yidisch, una chika konferensya sovre muestra lingua, i el Profesor Sephiha, ke por razones de salud no pudo vinir, embiyo un teksto sovre su relasyon kon la lingua yidisch. No eran munchos los bundistos para oirmos. La shoah a aharvado al bundismo de una manera ke lo echo a basho, i por ensima kale dizir ke los djudyos del mundo, mismo sosyalistos, lo ke no son todos, se syenten mas serka de las ideas del syonismo ke del bundismo.
Ama, komo dize el profesor Sephiha, kada uno kon su djiz i kon su shishit … Al djueves ke vyene, si kyere el Dyo !
Edmond Cohen
