eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Esta semana, fui un poko haragan – en vedra fui okupado por otras kozas – i para mi emisyon eskoji dos artikolos travados de la gazeta El Amaneser de mayo: Dos madres – un nombre, un ermozo eskrito de Rivka Abiry, i tambyen Mi primer dia de eskola, por Miriam Raymond , arekojido por Matilda Koen-Sarano en su livro De la fasha asta la mortaja.
Saludos a todos
Edmond Cohen
Paris, Fransya
DOS ESKRITOS DE EL AMANESER DE MAYO
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes ke vyene,19 de junyo, de las dos i medya asta las sinko, 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
Oy tuve la gana de meldarvos dos artikolos ke eskoji en la gazeta El Amaneser de mayo, i por empesar un rekodro de Rivka Abiry.
Kale saver ke Rivka Abiry eskrive kada mes en El Amaneser, syempre en pajina 10, i me tresalgo de meldarla. No es la primera vez ke vos meldo un eskrito de eya ke travi de la gazeta. Tuve el plazer ay un syerto tyempo de avlar kon eya sovre Skype, eya en Haifa ande mora, yo en Paris.
Esta vez mos konta su aniversaryo de 90 anyos ke se paso en Fransya. Ama lo mijor es ke le deshe la palavra. Su artikolo se yama Dos madres – Un nombre.
Kuando me desperti esta demanyana, mirando por la ventana a la kaye, vide grandes banderas de Israel i Fransia enkolgadas de los tavlados altos de las lampas ke esklaresen la kaye, djugando kon el viento. Esto me akodro un akontesimiento ke vos kero kontar.
El pasado anyo fue invitada a vijitar Nice (Fransia) para enkontrarme kon mis primos.
En yegando ayi me sorprendio de deskuvrir ke me toparon un otel « Le Petit Palais » situado serka del Museo Matisse i el Museo Chagall, no leshos del sentro. Era un otel amistozo de famiya, ke en verdad era un lugar muy konveniente para mi. De mi kamareta me plazia ver a partir de la demanyana fina la tadre la vista panoramika de la sivdad, las kolores de la mar trokando del blu profundo a la plata, la vedredura de los arvoles, komo de mesmo en la leshura el aeroporto. Saliendo del otel, viajando kon el karro, se entrava en la sivdad de Nice, despues al paseo maritimo i a todas las sivdades ermozas i famozas de la Kosta. Ayi mos enkontrimos en las kayes i kalejas kon las otras djentes, kon los grupos de personas i turistos ke se arekojian para kaminar, para avlar o kantar kon una gitara. Mozotros de mesmo kaminando a lo largo del paseo maritimo, gozimos de la rika vizion ke mos plazio a todos, ke en verdad es manyifika. Ansina mos gozimos de konoser el Cap de Nice, la famoza Promenade des Anglais, Beaulieu, el Baie de Villefranche sur Mer, Cap Ferrat, Antibes, Juan-les-Pins, Cannes, St Raphael i St Tropez.
Kuando arivimos en agosto el anyo pasado, fue djusto kuando Nice era selebrando su 150 aniversario desde ke el Rey de Sardinia dio Nice a la Fransia.Pero lo ke me impresiono sovre esta parte de la Côte d’Azur, eran las guertas, los chikos kaminos ke se topavan afuera de Nice, los lugares alderedor, en la kampanya, tal komo Tourettes sur Loup, St Paul de Vence, Le Gourdon, Grasse i Mougins.
Los restorantes lokales son todos amistozos, te rogan de entrar ariento i ainda te prezentan la mijor kombinasion de komidas i de beviendas, ke te pueden ofrir. Saviendo esto, la noche del festival del porto de Nice, mos fuimos a un restorante serka del porto djusto en frente de « La Colline du Château ». Aki enkomendimos la « bouillabaisse » una supa de peshkados kozinada kon diferentes yervas, « la courgette de beignets de fleurs », el « farci » i la « krem karamel ». De mesmo tengo de kontarvos ke mos sirvieron despues de todo esto, dos a tres tipos de kezo, ke se sierven jeneralmente a la fin de la komida franseza komo dijestivo. Al igual mi madre lo yamava « la eskova del estomago ».
De mesmo gozimos del festival del porto kon un otro grupo de israelis ke mos akompanyaron al restorante i ke les agrado el saltanat feliz al dorador. Avlavamos ebreo i despues de unas kuantas beviendas izimos bruido, ke yo noti de las miradas ke mos echaron las otras personas kuriozas asentadas en el mesmo restorante.
Personalmente gozi de esta atmosfera pero me senti kansada, teniendo en kuento la muzika a todo volumen en el fondo, el mucho avlar i la ora de la noche. Sin sintir serri por algun tiempo mis ojos, ma me aparesio ke vide mi ijo alevantandose i en tomando un vidro kon vino, disho kon una boz kayente i dulse ke arepoza la alma:
« Kero dedikar esta tadre a mi mama ke trayi de Israe li ke esto viendo ke la povereta se kanso, ma ke kero espertarla.
Despues echo una mirada a su espoza i las otras personas, en diziendo:
« Puedo ayudarla…??? »
Las repuestas no lo sorprendieron. El entonses kontinuo:
« Visto ke este es el noventen aniversario de mi mama, yo le apronti amanyana una sorpreza, ma ke kreo ke le va azer plazer. »
Ke sorpreza??? demandaron todos ke estuvan asentados a muestra meza. Pero mi ijo disho solamente:
« Por favor, la sorpreza de la noche deshala para la manyana. »
En este momento, dos personas ke estuvan asentadas al lado de mozotros se alevantaron i se aserkaron de mozotros, demandando si avlavamos ebreo i si venimos de Israel. Los kombidimos a muestra meza i la dama mos konto la istoria sigiente.
« Aze vente anyos ke su ijo Vitali viajo a Israel i lavoro komo voluntaryo en un kibbutz. Ayi konosio a Yaaloma, se enamoraron i mesmo el proposo de kazarsen. Pero Yaaloma, siendo la ija de un sovrebiviente de los kampos de muerte de los nazis, lo refuzo, por modo ke era katoliko i no djudio. Esta romansa se rompio de manera ke el mansevo amargado de vista se fue atras a la Fransia. Desde entonses no se vieron ni se oyeron uno del otro ». Despues de este triste kuento, los dos invitados, plaziendoles el muabet, se kedaron dainda mucho tiempo a la meza muestra.
El sigente dia me dishe « Si te dan, toma, si te aharvan, fuye ». No tuve muncha pasensia de endevinar la sorpreza. Ma la vieja kere bivir para mas ver i oir. Me yevaron a Monte Carlo donde en el luksuozo restorante « Le Saint Benoît » fue aresentada una chika fiesta. Este restorante teniya vista a la sivdad, a la mar, al porto maraviyozo, i a las hevras de yates. No era imajinable mi alegria, mi felisidad de resivir un tal regalo de mi ijo. No podia kreerme ke era todo verdad. Tuve todo el tiempo lagrimas en mis ojos, keria bezar i abrasar de muevo mi kerido, regalado ijo.
Despues de gostar el tipiko antipasto, el vino, el menu de frutas de mar, i los diferentes kezos, la puerta de la kozina se avrio i el kozinero prinsipal, vestido en su uniforma blanka, trayendo una torta en su mano, i su ayudante una kandela alumbrada, se aserkaron de mi. El maestro kon finesse tomo mi mano i disho:
« So Vitali, del kual ayer vos avlo mi madre, ke les konto sovre mi primer amor i del tyempo ke pasi en Israel. Estimada sinyora, mis felisitasiones, salud, todo bueno, sana i saludoza ke me este i ke goze de su estado aki en Monte Carlo. » Me se tomo el tino i el suluk. No pude dizir ni una palavra. Estuve muy emosionada, yorando, yorando…
Apenas tuve el tiempo de alimpiar mis lagrimas de alegria, Vitali kito de su aldikera un chiko kuti de djoya i me amostro arientro una ermoza brosh de oro, la bandera de la Fransia. Me arogo, a mi retorno a Israel, de mandarlo a Yaaloma.
Despues de unos kuantos dias resivi la sigiente repuesta:
« Grasias de azerme akodrar de Vitali, ke yo me siento kulpoza de romper su korason, antes de munchos anyos. Entremientres me kazi, tengo un marido enkantador i pari dos ijos. Kon el permiso de mi marido, di a mi ijo bohor el nombre « Haim » ke es la traduksion perfekta del nombre de mi amigo fransez « Vitali » o « Vito » komo lo yamavamos aki en el kibbutz. »
I Rivka Abiry eskapa su teksto dizyendo:
Este kuento es dedikado a mi kerido ijo.
Vo demandar a Rivka kuala es la parte de vedra en este rekodro i kuala es la parte de su invensyon. A mi me vyene kuriozo ke su ijo le avia aparejado una sorpreza en Monte Carlo ande Vitali sin saver ke sus dos madres se topavan asentadas al lado la una de la otra.
Komo vos dishe, el Amaneser de Mayo es yeno de otros artikolos tambyen muy interesantes, sin avlar del miyo, el teksto de una una emisyon ke aviya echo aki sovre Rachel la comedyante.
Por esto tengo gana de meldarvos un otro artikolo, un rekodro kontado por Miriam Raymond en 1988 en Milano, i arekojido por Matilda Koen-Sarano en su livro De la fasha asta la mortaja. Este rekodro tyene por titolo Mi primer dia de eskola.
El primo dia ke yo me fui a la eskola tinia poko manko de sinko anyos, se puede dizir kuatro anyos i medyo. Yo era muy chikitika, no solo de eda, ma era i bashitika. Todas las otras kriaturas ya tinian sesh, siete anyos pasados i me eran de dos, tres palmos mas altas.
Kuando entri en la klasa el primo dia, me asenti kon todas las otras kriaturas en los bankos de la skola.
La maestra, ke no konosia ainda a dinguno i ke era una muy buena mujer, su alma repoze en Ganeden, tomo la lista de todos los elevos i empeso a meldar los nombres a uno a uno. I demando ke kada uno del kual meldava el nombre s’alevantara i dishera: « Prezente ». Empeso la maestra a meldar los nombres, i uno por uno los ijkos s’alevantaron. Kuando vino mi turno, yo naturalmente m’alevanti i dishe: « Prezente! »
La maestra no sinto mi boz, ke era muy basha, komo era yo entera. « Ande stas?! »disho. « Deke no respondes? »
Kon toda mi fuersa griti: « Prezente!! »
La maestra miro, miro: « La boz ya la sinti agora », disho, « ma deke no te stas alevantando? »
« Ma yo ya me alevanti! » le dishi yo, muy muy averguensada. I de akel dia en delantre me asenti en el primo banko de la klasa por todos los anyos ke vinieron despues . Ma la koza no skapo ansina.
Kuando skapi el lise i tinia ke ir a dar los examenes, siendo ke studyimos en la skola djudia, tiniamos ke dar los examenes en una skola statal, ande dinguno mos konosia.
En akel tiempo yo era muncho mas bashika de las otras elevas, i muncho mas chika de eda. Kuando todas las otras tinian diziocho anyos, yo tinia un poko mas de diisesh, me peynava kon unas buklitas chikitikas, i yevava unas kalsas de lana fin al diz i paresia una ijika chikitika (makare pudiera pareserlo oy!)
Kuando arivi a la puerta de la skola ande ivan aver los examenes, era un poko tadre i yo stava korriendo. Ma el shomer de la skola me kedo i no me kiria deshar pasar.
« Ijika! » me disho, « No saves ke aki se dan examenes para skapar el lisé?! Kualo stas bushkando aki? Ande keres entrar? »
I yo, muy emosionada, le dishi: « Ma yo tengo ke azer los examenes de lisé, i…arivi tadre! Deshame entrar!! »
El ombre se maraviyo muncho i me disho: « Pasa! Pasa! Ma…agora i las kriaturas stan dando examenes de lisé? »
Ansina s’eskapa este rekodro. Deke me plazyo i lo meldi? Porke me akodro mi propya vida . Me afitaron las mismas kozas. Yo tambyen eskapi el liseo a los diisesh anyos, chiko i paresiendo manko. Kuando pasi la vijita medikala para entrar a la Universidad, la mujer miro mi karta de estudiante, me miro, i disho: « Agora los toman a la kuna??? »
Oy tengo kaveyos blankos i en el otobus la djente se alevanta para darme su sityo. Los tyempos trokaron…
En kuanto a mi mujer, ke dainda no era mi mujer ni saviya ke me konoseriya un diya, fue lo mismo la primera vez ke tomo su lavoro de profesora, bashika i vestida kon un duffel coat kolorado. Izo autostop para ayegar en los tiempos al liseo, i el arabadji ke la yevo al liseo la tomo por una eleva i le disho: « Ayde meneate, o sino te van a gritar! »
Agora, afillu si mi mujer tyene 10 anyos de manko de mi i me echa mi vejez a la kara, agora la djente se alevanta para darle su sityo a eya tambyen …i esto es un poko mi vengansa!
Al djueves ke vyene si kyere el Dyo!
Edmond Cohen
