eSefarad Noticias del Mundo Sefaradi
Keridos amigos,
La Gay pride de Tel Aviv solevanto patirdi en Paris, i por esto pensi de avlar en mi emisyon de amanyana djueves de la omoseksualidad ande los djudyos
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
DJUDYOS I OMOSEKSUALIDAD
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya. http://www.radioj.fr/node/145
Antes de empesar mi emisyon de oy vos kyero dar unos kuatro haberes ke puede ser ya konosesh, ama si no los konosesh, me parese bueno ke los sepash:
En primero dos byervos sovre la muerte, el 3 de djunyo, a la edad serka de 94 anyos, de Pierre Grimblat, ombre de televizyon nasido en Paris en 1922, kijo dizir un anyo antes de Shimon Peres. Deke vos avlo de Shimon Peres? Porke si mirash dos fotos resyentes del uno i del otro, no savesh kyen es Grimblat i kyen es Peres.
Su padre, vendedor de diskos i elektrisidad, era de Polonya, su madre de Vyena en Austria. En 1942, tyene 20 anyos, se eskonde en una famiya kristyana en el sur de Fransya, ama en 1943, es aferrado en Cannes kon una validja yena de armas i de falsos papeles. Djuzgado en Nice por un Tribunal de la Milisya franseza, es kondenado a muerte i echado en prezo durante tres mezes, ama despues se ve liberado por los Italyanos.
A poko a poko, se va azer produktor i realizador para la televizyon, i su vida entera, a parte de kazarse 5 vezes, va ser konsagrada a su lavoro. Sea realiza, sea produse un alay de filmos i emisyones para la radyo i la Televisyon.
Otro negro haber, la muerte, este 20 de djunyo, de Jean Carasso, el fundador, entre otras kozas, de la gazeta La Lettre Sepharade. Una vez, en 2005, syendo ke yo aviya kontado en Ladinokomunita lo ke aviya sido mi 8 de mayo 1945, el me aviya eskrito komo se paso el suyo. I a esta okazyon, si me akodro byen, diziya ke teniya 20 anyos a esta epoka, lo ke me da a pensar ke nasyo en 1925 i ke agora teniya 91 anyos.
Siguro ke Jenny Laneurie, prezidente de la asosyasyon Aki Estamos, les amis de la Lettre Sepharade, mos kontara sovre este defunto muncho mas ke yo lo puedo azer, yo ke no lo konosi tanto, afillu si de vez en kuando me eskriviya un email a propozito de kozas ke yo aviya dicho o eskrito aki o aya, i por siguro yo le respondiya, i ansina tuvimos un dyalogo, del kual, malorozamente, no keda nada: entre los bugs i los piratos, toda mi korespondensya elektronika, ke sea kon el o ke sea kon otros, se destruyo.
Asigun lo ke me fue dicho, su enterramyento deve tenerse agora mismo, en mismo tyempo ke vos esto avlando de el. Ke su alma deskanse en paz.
Treser haber, un poko mas vyejo, syendo ke es koza ke meldi en la gazeta J Forum del 15 de marso, mas vyejo ama yene interesante: en un artikolo de Debkafile adaptado al franses por Marc Brzustowski, mos ambezamos ke Israel a empesado de aprovar una mueva arma sekreta para topar i destruir los tuneles del Hamas i del Hezbollah. Esta arma, asigun «fuentes oksidentales», seriya kapache de topar un tunel, i de embiyarle un misil para destruirlo. La arma es ekipada de kaptadores sismikos kapaches de topar las vibrasyones basho de la tyerra, topar de ande vyenen, antes de destruirlas.
Asigun estas mismas fuentes, esta arma podriya permeter a Israel de destruir las instalasyones atomikas enterradas por los Iranyanos.
El portaboz del Pentagone Christopher Sherwood a deklarado ke los Amerikanos an salido 40 milyones de dolares para realizar esta arma en 2016 kontra «los tuneles ke amenasan tan los Estados Unidos komo Israel».
Las Kompaniyas israelyanas lavorando sovre esta invensyon son Elbit i Rafael.
Ishalla ke Israel no tenga nunka menester de estas armas, ama yene es bueno ke las tenga…
Kuatren haber: despues de la Unesco, ke voto el 16 de avril una rezolusyon kontra Israel, de la kuala ya vos avli aki mismo aze poko, es la OMS (Organisasyon mundyala de la salud) ke voto eya tambyen, el 24 de mayo, una rezolusyon negrinyada kontra Israel. 107 paizes votaron la rezolusyon, inkluyendo Fransya, Ingletyerra i Almanya. Kontra votaron solo ocho paizes: Israel, por siguro, i syete otros inkluyendo Estados Unidos, Canada i Australia. 8 paizes se abstuvyeron. 58 no tomaron parte al voto.
La rezolusyon tyene por titolo: «Situasyon sanitarya en el territoryo palestinyano okupado, inkluyendo Yerushalayim-este, i en el Golan syriano okupado». Fue propozada por el Koweit, «en nombre del Grupo arabo», i la Palestina.
El teksto de esta rezolusyon se puede topar sovre internet, yo la topi en franses. Sovre Google, kale bushkar OMS 24 mayo Israel: http://apps.who.int/gb/ebwha/pdf_files/WHA69/A69_BCONF1-fr.pdf
Asigun esta rezolusyon, los palestinyanos son mal kurados en los territoryos okupados, i la okupasyon ansi ke «las vyolasyones de los derechos del ombre» tyenen insidensyas sovre la salud «mentala, fizika i environementala» de los Palestinyanos.
No tengo menester de dizir ke Israel es el solo pais del mundo akuzado por esta organizasyon de la ONU. No tengo tampoko menester de adjuntar ke no se avla de los feridos o hazinos palestinyanos, inkluyendo personas de las famiyas de Abbas o de Haniyeh , kurados en los ospitales israelyanos.
Lo ke me da asko, no es tanto ke los arabos prezenten tala rezolusyon, es ke sea votada sin nada trokar por paizes ke se dizen amigos de Israel. Ke los arabos se preokupen de la salud de los Palestinyanos, deke no? Ama antes de votar, uvyera sido interesante de mezurar la esperansa de vida de los palestinyanos okupados komparada a la de los otros arabos: palestinyanos non okupados, o de los arabos autores de la rezolusyon.
Esto dicho, puedo agora venir a mi emisyon de oy, ke kyero azer sovre djudyos i omoseksualidad.
La kuestyon del djudaismo i de los djudyos frente a la omoseksualidad es una muy vyeja istorya, ke tuvo reperkusyones aki mismo, en esta radyo, aze poko. Desde munchos anyos, el haham Joseph Sitruk, ke fue hahambashi de Fransya entre 1987 i 2008, ama ke tuvo de kedarse por modo de hazinura, vyene avlar a esta radyo el vyernes demanyana, en jeneral para komentar la perasha de la semana, ama tyene por siguro la libertad de avlar de lo ke kyere.
I el vyernes 3 de junyo, el haham Sitruk vino avlar de la Gay Pride ke deviya tenerse el mismo diya en Tel Aviv. Lo ke disho, no lo topi sovre el sityo de Radyo J. Si bushkash la kronika del haham Sitruk, toparesh la del 20 de mayo i la del 10 de junyo, ama nada entre las dos. http://www.radioj.fr/node/150
Lo ke disho el haham Sitruk, lo meldi en un artikolo de Laetitia Enriquez en la Gazeta Actualité Juive del 9 de junyo.
Ansina avlo el haham Sitruk: «La Tora yama la omoseksualidad aborrisyon i la konsidera komo una desfecha de la umanidad. La sekana me parese bastante importante para ke todos griten sus dezakodro frente a una tal ofensa»…. «Esta inisyativa es una tentativa de eksterminasyon morala del puevlo de Israel»… «Auguro ke todos los oyentes eskucharan mi yamada al ayudo i arresponderan de manera radikala a una tala aborrisyon».
Esta deklarasyon a la radyo no kedo sin repuesta. El alhad 5 de djunyo, Alain Beit, prezidente de la asosyasyon djudiya omoseksuala Beit Haverim, eskrive sovre internet en la gazeta The times of Israel, para, asigun lo ke eskrive, «azer parte de su profunda indignasyon kontra las palavras intolerantes i omofobas del Haham Sitruk «.
Alain Beit, a propozito de la manera radikala de arresponder demandada por el haham, demanda el mismo: » A kuala «radikalidad» pensa el haham?
«Kuchiyar a una mansevika, komo fue el anyo pasado en Yerushalayim?
«Echar los gays por ensima de un presipisyo?
«No estamos mas, aki, en la ekspresyon de una opinyon politika.
«Estamos aki, klaramente, en un desviyo integristo».
Despues Alain Beit ataka al haham, dizyendo ke «no aze onor a las luzes del djudezmo», ke el solo me mos djuzgara a todos sera el Dyo, i ke «la omoseksualidad no es un eskojimyento sino una identidad».
Despues se toma kontra Radyo J, demanda ekskuzas, sino la va atakar en djustisya.
Sovre kualo el prezidente de Radyo J, Serge Hajdenberg, i Guy Rozanowicz, sekretaryo jeneral, responden el mismo diya ke el haham Sitruk avla kon libertad sovre la radyo, ama el Prezidente Hajdenberg deklara desolidarizarse enteramente de las palavras del haham ke kondena kon firmeza, i el sekretaryo jeneral Rozanowicz konsidera ke el haham «salyo de las rayas i se transformo en gran inkizidor».
Komo vos dishe, la kronika del haham no aparese en Radyo J, ni el solo, ni mismo en redifuzyon de la manyana entera.
Ama se puede oir la kronika del haham del vyernes de despues, 10 de djunyo, ande mos dize ke nunka fue en su entisyon de echar afuera kualkyer djudyo ke sea, i ke tyende la mano a kualkyer kyere venir.
Este todo patirdi me dyo la idea de ver de mas serka esta kuestyon de la omoseksualidad ande mozotros.
Para esto me ayudi por dos vandas:
1°) Una konferensya de una ora (en franses) del haham Gabriel Farhi sovre Akadem, intitolada «L’homosexualité, un regard du judaïsme»
2°) Wikipedia en franses: «Homosexualité dans le judaïsme»
La Tora empesa por kontarnos la istorya de los moradores de Sedom, ke demandaron a Loth, sovrino de Avraham i ke se aviya amostrado ospitalyero kon dos anjeles ke tomava por ombres: «sacalos a nos y conosceremos a ellos». El Dyo va destruir a Sedom i sus moradores, ama sin dizir otra koza ke «su pecado se apesguo mucho». Parese ke el pekado es mas el manko de ospitalidad ke la omoseksualidad.
Despues el Levitiko kondena la omoseksualidad maskulina de manera muy fuerte: empesa por dizir (kapiltulo 18, pasuk 3: «como hecho de tierra de Egypto que estuvistes en ella no fagades, y como hecho de tierra de Kenahan que yo trayen a vos ahi no fagades, y en sus fueros no andedes»
I despues de tener proibido al insesto, a la zoofiliya i al adultero, meldamos en el pasuk 22: «»Ve et zahar lo tishkav mishkeve isha, toeva hi» (Y a macho no yazeras yazidas de muger, aborricion ella).
Un poko mas leshos meldamos el kapitulo 20, pasuk 13 :»Ve ish asher yishkav et zahar mishkave isha, toeva asu sheneem, mot yumatu, demeem bam» (Y varon que yaziere kon macho yazidas de muger, aborricion fizieron ambos ellos, matar seran matados, sus sangres en ellos).
A la kontra, la Tora no dize nada sovre la omoseksualidad entre mujeres.
Estos son los tekstos. Kualo se aze kon eyos?
En el djudaismo ortodokso, ay los ke, komo lo vitesh kon el haham Sitruk, ke fue hahambashi de Fransya, kondenan la omoseksualidad, a lo manko la maskulina, afillu si no kondenan los pekadores mismos. Para un haham komo Sitruk, la omosueksualidad maskulina es una aborrisyon, syendo ke ansina la yama la Tora.
El hahambashi de Fransya de oy, Haïm Korsia, interojado por Laetitia Enriquez, la gazetera ke eskrivyo el artikolo ke vos dishe en la Actualité Juive, dize: «si el byervo aborrisyon es syerto la traduksyon del byervo ke emplea la Tora para la omoseksualidad, por lo tanto, la Tora no avla de kondenasyon umana. Kada uno deve a la kontra akojer el otro en el respekto de su intimidad, i, de manera mas jenerala, en lavorando en favor de la lucha kontra las diskriminasyones, inkluyendo kontra la omofobiya».
So un poko enkantado de meldar el hahambashi de Fransya dizyendo ke «la Tora no avla de kondenasyon umana». Si la gazetera no se yerro i si es byen lo ke le disho el haham, me demado komo el traslada los byervos mot yumatu ? La Biblia de Ferrara traslada «matar seran matados», ama es vedra ke no dize kyen va ser el matador. Si entyendo byen, asigun el hahambashi Korsia es el Dyo solo ke los va matar. Es vedra ke poko despues, meldamos el pasuk 21: «Y varon que tomare a muger de su hermano, apartada eya, descobertura de su hermano descubrio, solos seran». Ke kyere dizir «solos seran», en ebreo aririm yiiyu?
La Biblia del Rabinato traslada kedaran sin desendensya , Chouraqui traslada ils seront inféconds (seran sin pueder dar kriaturas). Para el byervo arir, el diksyonaryo de Marc Cohn traslada a la vez por solo o por sin desendensya.
Esto es la traduksyon. Kuako dizen los komentadores? Esto yo no sé. A mi me parese ke solo el Dyo puede azer ke no tengan kriaturas. Si en este pasuk el kastigo vyene del Dyo, agora se puede entender ke en el pasuk 13 (matar seran matados) aya tambyen es solo el Dyo ke mata, no el ombre. Es ke esto es lo ke kijo dizir el hahambashi Haïm Korsia? No sé…
Esto dicho, muerte o no muerte, una koza me parese sigura: la Tora kondena la omoseksualidad maskulina, a lo manko el akto, si no el sentimyento.
Despues, los hahamim, asigun sus obedensyas, azen kon esto.
En jeneral, me parese ke los hahamim ortodoksos no pueden achetar la omoseksualidad maskulina, ama se pueden amostrar induljentes, kijo dizir pedronar al ombre. Muera el pekado, no el pekador, diziya Beruria, la mujer de Rabbi Meir.
Es un fakto, lo vide en un dokumentaryo israelyano, ke los djudyos a la vez omoseksuales i sufus lo biven tan mal ke ay munchos suisidos ande eyos (vente vezes mas ke ande los otros).
El haham Gabriel Farhi mos konta en su conferensya ke konosyo a un haham ortodokso ke el mismo era omoseksual. Sus maestros lo saviyan, i portanto no le impidyeron de ser haham, a una kondisyon: ke su omoseksualidad kede sekreta. Es solo kuando el haham izo su coming out en el kal ke fue echado afuera, i se fue ande los liberales ke lo tomaron komo haham.
Los liberales son muy avyertos, i en vedra azen komo si los pesukim ke vos meldi no egzistiyan. Pensan a azer kazamyentos relijyozos entre ombres omoseksuales…
Yo, ke no so haham, ni omoseksual, veo esta kuestyon un poko de afuera. Entyendo muy byen la sufriensa de los omoseksuales, i entyendo muy byen ke sean achetados. La sola koza ke no entyendo, es el byervo pride, en la Gay pride. Deke ser orguyozo de ser omoseksual?
Al djueves ke vyene, si kyere el Dyo! Sera el ultimo antes de las vakansas del enverano, i el mes de septyembre.
Edmond Cohen
Paris Fransya
