eSefarad Noticias del Mundo Sefaradi
Keridos amigos,
Teniya la entisyon, para mi ultima emisyon antes de las vakansas, de azerla sovre la istorya de los vapores de Cherbourg. Ama resivi aki mismo dos repuestas a mi emisyon sovre los dkudyos i la omoseksualidad, tuve el diya mismo de mi emisyon, ama despues, dos konversasyones kon hahamim, i al kavo tuve de kualo azer una mueva emisyon en kontinuasyon de la de antes.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
DJUDYOS I OMOSEKSUALIDAD
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya. http://www.radioj.fr/node/145
La semana pasada, komo munchas vezes, la radyo, por modo de los haberes ke turaron un poko mas ke es el uzo, me dyo la palavra dos minutos atras de mi tyempo, de tal manera ke no pude eskapar enteramente mi emisyon, ke era sovre djudyos i omoseksualidad. Lo ke me kedava de dizir era poko, era solo lo sigyente:
Los liberales son muy avyertos, i en vedra azen komo si los pesukim ke vos meldi no egzistiyan. Pensan a azer kazamyentos relijyozos entre ombres omoseksuales…
Yo, ke no so haham, ni omoseksual, veo esta kuestyon un poko de afuera. Entyendo muy byen la sufriensa de los omoseksuales, i entyendo muy byen ke sean achetados. La sola koza ke no entyendo, es el byervo pride, en la Gay pride. Deke ser orguyozo de ser omoseksual?
Ansina teniya de eskaparse mi emisyon de la semana pasada. Ama despues del djueves pasado, tengo varyas kozas de adjuntar: dos haberes, dos repuestas, i un penseryo.
Primer haber: los liberales no pensan solo de azer kazamyentos relijyozos entre dos ombres, komo lo dishe, en vedra ay munchos lugares ande ya se izo. Despues de mi emisyon oyi ke ya se izo a lo manko una vez en Fransya, ama ya se aze tambyen en Amerika, i se izo en 2012 en Israel, asigun lo eskrivyo Avraham Burg en Haaretz.
http://www.courrierinternational.com/article/2012/07/05/un-mariage-juif-et-gay
Sigundo haber: alhad pasado, 26 de djunyo, Yishaï Shlissel, el djudyo sufu ke aviya kuchiyado syete personas el 30 de djulyo del anyo pasado 2015 en la Gay Pride de Yerushalayim, firyendo sesh i matando una mansevika de 16 anyos, Shira Banki, a sido kondenado a prezo para syempre, kon 31 anyos siguros.
Kale dizir ke este mismo asasino veniya de salir de prezo unas kuantas semanas antes de su matansina, syendo ke aviya sido kondenado a diez anyos de prezo por la misma koza, salvo ke en los tres ke aviya kuchiyado la primera vez, no uvo ke muryeron.
Los dos hahambashis de Israel, por siguro, aviyan kondenado sin ambiguidad la aksyon de Shlissel.
Agora las dos repuestas:
Komo lo oitesh, yo aviya eskapado mi emisyon demandandome deke el byervo pride, en Gay pride? Deke ser orguyozo de ser omoseksual?
Arresivi dos repuestas a esta kuestyon en Ladinokomunita:
En primero fue Carlos Yebra Lopez, espanyol de Saragossa agora morando en New york:
« Es enteresante tu demanda verso la fin: deke avlar de gay PRIDE? deke ser orguyozo de ser omoseksual? Esto d’akodro ke no tyene senso avlar de un orguyo omoseksual i dospues dizir, komo Alain Beit (prezidente de la asosiasyon djudiya omoseksuala Beit Haverim) ke «la omoseksualidad no es un eskojimyento, sino una identidad». Normalmente, sintir orguyo implika la libertad de eskojer el motivo de muestro orguyo (ama tambyen podemos sintir orguyo de una erensya, komo muestra famiya o muestro pais, los kualos no eskojemos). En todo kavzo, kreygo ke kale topar el senso de dizir Gay Pride (orguyo omoseksual) komo reaksion frente a una tradisyon de diskriminasyon kontra la omoseksualidad komo algo vergonsozo (ke kale guadrar en sekreto). Orguyo seriya aki lo kontrario de verguensa (shame) i ansina «gay pride» sinyifika «deskaro omoseksual » (homosexual shamelessness), lo kualo parese una repuesta lojika frente a la diskriminasyon avergonzante (shame game).»
La sigunda repuesta me vino de David E. Olivera, bivyendo en tambyen en los Estados Unidos, en Long Beach, Kalifornya:
» Meldi la emisyon del sinyor Edmond Cohen. Esta es la primera vez ke avia meldado en djudio sovre la omoseksualidad. Yo, syendo mansevo djudio i omoseksual, me gustaría aresponder la pregunta del sinyor Cohen ke izo a la fin de la emisyon: «Deke ser orguyozo de ser omoseksual?»
«Esta es la mi respuesta: En tyempos pasados, el tener sentimientos por otra persona del mizmo seks era mal visto, estigmatizado, i ridikulizado. Los demás azian sentir al ombre o a la mujer omosekuales avergonsados de tener estos sentimientos. Muncha djente omoseksuala bivian dobles vidas; o se apartavan; o, en kavzos negros, se suisidavan. La sosiedad i el governo diskriminavan kontra eyos, asta ke en Mueva York, el 28 de junyo 1969, los disturbios de Stonewall (Stonewall riots) tomaron lugar. Dezde entonses, los omoseksuales salyeron del armuar/armario/dolap i disheron «no mas diskriminasyon! no mas violensya! no mas sentirmos avergonsados porke vozotros no mos entendesh!» Es por esto, ke «gay pride», es orguyo de finalmente sentirmos en paz kon mos mizmos, i no sentirmos avergonsados».
Estas dos repuestas me paresyeron bastante interesantes para ke vo las aga konoser. Despues a kada uno de azerse su opinyon.
I agora mi penseryo. Kale ke sepash ke djusto despues de tener echo mi emisyon de djueves pasado, me korri al ofisyo de los shiva de una amiga kara, ke se paso en el kal del MJLF (Movimyento Djudyo Liberal de Fransya). El haham era Yann Boissière, i komo yo saliya de mi emisyon, le avli de eya, atorgandole ke me topava un poko estrecho, syendo ke yo no saviya lo ke diziyan los komentadores sovre los pesukim de Vayikra sovre la omoseksualidad maskulina.
El haham Boissiere me respondyo ke djustamente aviya eskrito un artikolo en repuesta a la emisyon del haham Sitruk, akonsejandome de meldarlo, i adjuntando ke kaliya konsiderar los dos pesukim de Vayikra komo si no egzistiyan mas, los tyempos tenyendo kambyado.
A la tadre de este mismo diya (bastante okupado por un retirado, i no vos konti lo ke ize la demanyana) me fui a oir un kurso del haham liberal Daniel Farhi, padre de Gabriel Farhi, el ke izo la konferensya ke se puede mirar sovre Akadem, i de la kuala vos avli la semana pasada. Le avli de esto todo, i el me disho mas o menos la misma koza ke Yann Boissière: no son los liberales, sino los hahamim de la Mishna los primeros, ke sin trokar los byervos de la Ley, sea la komentaron komo si diziya otra koza, sea izyeron komo si lo ke era eskrito no lo era. Egzemplos: la kondenasyon a muerte esta eskrita munchas vezes en la Ley, ama los hahamim eskrivyeron ke un Tribunal ke pronunsyariya una kondenasyon a muerte kada setenta anyos devriya ser yamado tribunal matador. De la misma manera, el Talmud mos dize ke la ley del talyon eskrita en la Tora se deve entender kon pagamyento de una indemnidad: en vez de el ojo del ke arrevento un ojo, este deve pagar a su viktima el ekivalente del ojo pedrido. Me parese muncho mijor para los dos, el arreventador i su viktima, ama no es lo ke dize la Tora. I ay munchos otros egzemplos ke no tyenen nada de ver kon los hahamim del movimyento liberal i ke vyenen de muncho antes, de los hahamim del Talmud.
Esto dicho, al diya despues, me fui a meldar sovre internet lo ke aviya eskrito Yann Boissière, en el Huffington Post. I syendo sovre el Huffington Post, vide ke la haham liberala Pauline Bebe aviya eskrito eya tambyen un artikolo muy rezyo kontra las palavras del haham Sitruk.
En pokos byervos, vos diré ke estos dos hahamim liberales dizen, komo el haham Farhi, el tambyen liberal, ke las palavras de la Tora deven ser meldadas kon los ojos de oy, i no kon los ojos de la epoka ande fueron eskritas.
Pauline Bebe eskrive, por egzemplo:
«Kuando los hahamim (del Talmud) toparon ke una ley era endjusta, tuvyeron el koraje de azerla evoluar porke kaliya asegurarse ke la alaha, la ley djudiya, keda etika».
«Rashi sovre Berahot (20a) diziya:»En munchos kavzos los hahamim an permetido de arrankar las palavras de la Tora kuando es kuestyon de kevod aberiot, del onor devido a toda persona kriada por el Dyo».
Yann Boissière eskrive:
«Ya es tyempo ke la sosyedad sivil sepa ke la erudisyon djudiya de oy konsidera ke este pasuk se toma kontra la omoseksualidad rituala, las relasyones vyolentas entre non iguales, i la umilyasyon i el despresyo, en otros byervos ke se toma kontra todo salvo la omoseksualidad tala ke la entendemos. I mismo si era…Mijor ke la kirurjiya erudita i la papa interpretativa, kreo, simplemente, ke tenemos de tomar muestras responsabilidades frente al teksto.»
«Puede ser ke el pasuk kondena la omoseksualidad. Ama esprime un estado de konosensya, una mentalidad ke no konosemos mas komo syendo los muestros. Seamos klaro: ke no keremos konoser komo los muestros.»
«Una autentika tradisyon djudiya grita alto i fuerte: es la omofobiya – i no la omoseksualidad – ke es una aborrisyon!»
Por siguro, no vos meldi todo lo ke eskrivyeron los dos hahamim Bebe i Boissière, ama kon lo poko ke vos trasladi, ya tenesh una idea jenerala de lo ke disheron.
Yo, por mi parte, no so leshos de pensar komo eyos i komo el haham Daniel Farhi. Ama yene tengo una shupe, en vedra no sovre la kuestyon de la omoseksualidad en partikolar, ama sovre la kuestyon muncho mas jenerala de la manera de meldar la Tora.
De una parte dizimos ke la Tora es la palavra del Dyo. No es Moshe ke eskrivyo la Tora, sea es el Dyo el mismo kon su dedo, sea avlo a Moshe por dizir tal i tal koza. I vinyendo del Dyo, ke no se yerra i ke no dize mintira, la Tora es venerada komo santa. Despues de la meldadura de la perasha bendizimos el Dyo ke mos dyo «Torato torat emet»: su Ley, ley de vedra. La vestimos komo una reyna kon korona, i kada uno vyene a bezarla kon venerasyon.
De otra parte, es koza sigura ke, komo lo akodran kon razon los hahamim liberales, ay partes de la Tora ke nunka fueron tomadas «al pye de la letra», komo dizimos en franses. Pauline Bebe da komo egzemplo la lapidasyon del «hijo atorcedor y rebellador», ama ay munchos otros egzemplos.
A una mujer amerikana ke aviya sitado el Levitiko (Vayikra) para probar ke la omoseksualidad era una aborrisyon, un ombre embiyo una letra avyerta dizyendo:
«Tengo menester de konsejos en kuanto a otras leyes biblikas.
«Por egzemplo, kyero vender mi ija komo syerva, komo indikado en Shemot, XXI, 7. Asigun vos, ke seriya el mijor presyo?
«Vayikra tambyen, XXV, 44, ambeza ke puedo tener syervos, ombres o mujeres, a la kondisyon ke sean merkados en las nasyones vizinas. Un amigo pretende ke esto se puede aplikar a los Meksikanos, ama no a los Canadyanos. Puedesh darme luzes sovre este punto? Deke no puedo tener syervos canadyanos?
«Tengo un vizino ke kyere lavorar diya de shabat. Shemot XXXV, 2 dize klaramente ke deve ser matado. Es ke so ovligado de matarlo yo mismo?
(…)
«Uno de mis amigos pensa ke afillu si komer frutas de mar es una aborrisyon (Vayikra XI, 10), la omoseksualidad es una aborrisyon peor. Yo no so de akodro. Puedesh ayudarmos?
«La mayoriya de mis amigos se azen kortar los kaveyos, inkluyendo alrededor de las syenes (tempes, temples), i esto es proibido por Vayikra (XIX, 27) Komo deven morir?
«Un ultimo konsejo: mi tiyo no respekta lo ke dize Vayikra XIX, 19, sembra dos modos de kultura diferentes en el mismo kampo, su mujer yeva fostanes echos de varyos teshidos, algodon i polyester. Ademas, pasa sus diyas a maldizir i a blasfemar. Es ke es menester de ir al kavo de una prosedura pezgada de arrekojer todos los moradores del kazal para lapidar mi tiyo i mi tiya, komo lo komanda Vayikra XXIV, 10 a 16? No seriya mijor de kemarlos bivos en una reunyon familyala privada, komo se aze kon los ke durmen kon paryentes serkanos, komo dicho en el livro sagrado, XX, 14?
De muevo mersi por akodrarmos ke la ley del Dyo es eternal i inalteravle.»
Muncho antes de este burlador, Voltaire eskrivyo kozas similares.
Komo me disho el haham Daniel Farhi, si los hahamim no adaptavan la meldadura de la Ley a los tyempos aktuales, seriyamos komo los muzulmanos de Daesh ke kyeren aplikar la ley muzulmana tal i komo fue eskrita al empesijo de la Edad Medya.
Esto todo es muy klaro, i lo entyendo muy byen.
La sola shupe ke tengo es la sigyente: Es muy byen ke los hahamim no sigan la Ley al pye de la letra. Ama si mos aleshamos del teksto, kyen mos va dizir asta ande puedemos alesharmos? El uno va dizir asta aki, el otro va dizir asta aya…Komo diziya Pierre Dac (otro djudyo): «Une fois qu’on a passé les bornes, y a plus de limites!» (una vez ke pasates las fronteras, no ay mas limitos).
I si todos los hahamim se meten en djuntos i votan, komo azen los katolikos en un konsilyo, es muy byen, ama la ley va ser umana, trokar azigun los ombres i los tyempos, i kualo es lo ke le vyene del Dyo?
Los konsilyos fueron mas leshos: dechidaron ke todo modo de kristyano ke no sera de akodro kon lo ke disho el konsilyo sera konsiderado komo eretiko i kemado bivo.
Para aboltar a los djudyos, tomaremos un egzemplo: Pauline Bebe mos da a entender ke el omoseksual es una kriatura del Dyo komo los otros, i no devemos azer diferensya. Lo ke aze no es una aborrisyon. So de akodro. Ama agora ke vamos a dizir para las otras aborrisyones del mismo kapitulo de Vayikra, la zoofiliya, por egzemplo? Es ke vamos va dizir ke la zoofiliya no deve tampoko ser kondenada, i ke la aborrisyon, es la «zoofobiya»?
Lo ke esto dizyendo no es muevo. Del tyempo de los reyes hashmonaïm, kuando los djudyos teniyan un estado i un Templo, aviya los Saduseanos, ke keriyan solo la Tora tal i komo era, i los Farizyanos, ke la interpretaron todo en dizyendo ke era ley de Moshe, ama orala, no eskrita. I ke, eskrita o orala, es una sola i mizma ley.
Son los Farizyanos ke kedaron solos kuando, en 70, el Templo fue destruido, i ke inventaron un djudesmo sin sakrifisyos i sin Bet Amikdash, permityendo ansina a muestra relijyon de sovrebivir.
Ansina se eskapa mi emisyon de oy. No vo azer emisiyones en djulyo i agosto; oiresh redifuzyones. Ama si kyere el Dyo, me oiresh de muevo en direkto el djueves primo o 8 de septyembre. Dainda no se. Buen enverano a todos!
Edmond Cohen
Paris Fransya
