eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar de mi lavoro el haham Farhi, i tambyen Tito Jacob, el kunyado de Liliane.
Saludos a todos
Edmond Cohen
Paris, Fransya
ANGEL PULIDO, HAÏM VIDAL SEPHIHA, MARTINE LEMOINE
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo lo ize la semana pasada, vos akodro ke los atelyes de konversasyon de la asosyasyon Vidas Largas empesaran por de muevo el martes 13 de novyembre a las dos i medya. Ama kale azer dikat: no se tendran mas en el lokal ande estavamos el anyo pasado. Se van a tener al mismo adereso ande estavamos antes, kijo dizir en el Centre Communautaire, 119 rue Lafayette, Paris (10°) métro Poissonnière o Gare du Nord.
El lunes pasado resivi una yamada al telefon de la senyora Martine Lemoine, ke fue una eleva del profesor Sephiha, izo su teza sovre Angel Pulido, i izo la traduksyon al kasteyano del famozo livro del profesor Sephiha intitulado en franses L’agonie des judéo-espagnols, ke fue publikado por la primera vez en 1977 en franses i topo un tal sukseso ke tuvo a lo manko dos muevas edisyones en franses mas despues. Esta vez sale, komo vos dishe, en kasteyano, i es oy una buena okazyon de avlarvos tan de este livro komo de Angel Pulido, a traves el lavoro de Martine Lemoine. Komo ya lo savesh, keridos oyentes, ay un atadijo entre Angel Pulido i el djudeo-espanyol, porke se puede dizir ke el es ke izo konoser los sefaradim al puevlo espanyol, i me kedo siguro ke sin Angel Pulido, Primo de Ribera no uvyera rekonosido en 1924 la nasyonalidad espanyola a los sefaradim ke lo keriyan, sin saver ke unos kuantos anyos mas despues, en las oras pretas de la okupasyon almana, esta nasyonalidad espanyola salvariya la vida de los sefaradim ke kijeron i pudyeron aprovechar esta ley.
Empesaremos, komo syempre, por el empesijo: kyen fue Angel Pulido (1852 – 1932)?
Angel Pulido nacio en 1852 en Madrid kon una kondisyon muy modesta, sus padre i madre syendo venidos en Madrid desde Asturias para avrir una botikita de vinos en la kaye de las Infantas.
Ama este ijiko, sezudo i despyerto a la vez, izo estudyos briyantes de medikeriya i salyo doktor en medikeriya.
Desdel empesijo se amostro komo un luchador para las kozas en las kuales kreia. Tuvo vida entera un karakter independyente i libero. No solo libero de la djente, ama tambyen libero de las ideas.
Martina Lemoine mos konta ke su dicha era: « La vida es esfuerso. Para deskansar, la tumba! »
Milita en el partido liberal de Sagasta en los anyos 1880. No tengo oy la entisyon de azervos entrar en las komplikasyones de la politika espanyola en el kavo del siglo 19, solo kale a lo manko ke sepash ke Pulido es a la vez un gran syentifiko, ke va entrar en la Real Akademia de medikeriya en 1884 (dunke a 32 anyos) i va mismo ser Sekretaryo Perpetuo en 1912, a la edad de 60 anyos.
Komo ombre politiko, va ser elejido deputado i despues senador. Se va amostrar liberal de ideas i va votar leyes penales mas dulses, o en favor de la liberasyon de la mujer.
Komo ombre de medikeriya, va okuparse de organismos sanitaryos, para luchar por la sanedad publika, en las sivdades komo en los kampos, la ijyena en los ospitales, luchar kontra el paludismo, el kolera, la malnutrisyon, la tuberkuloz. Se okupa de antropolojiya, jinekolojiya, psikyatriya.
I su lucha va por la proteksyon de los flakos: syegos, hazinos del meoyo, kriaturas abandonadas, mujeres prenyadas ke lavoran, ets.
Publika unos dos mil artikolos syentifikos en varyas revistas, i esto todo seriya bastante para ke mos interesemos a esta persona.
Ama para mozotros, djudyos sefaradim, ya savesh ke ensima de todo lo ke dishe, este senador Doktor Angel Pulido deskuvriyo en primero el djudaismo, vijitando un kal en Berlin diya de vyernes a la tadre, komo lo konto Martina Lemoine en radio Sefarad. Pulido fue admirativo de la ermozura no solo del kal, ama sovre todo de la liturjiya i de las bozes del hazan i de los koros de kriaturas kantando teilim. Despues, viajando Pulido deskuvrio tambyen muestra egzistensya en el imperyo osmanli, muestro atadijo a la lingua espanyola despues de tantos siglos, i lucho de este diya para dar a kononosermos del puevlo espanyol i promover el ritorno de los djudyos a la Espanya ke los aviya echados afuera.
En su livro « Espanyoles sin patria La raza sefardi » Pulido mos konta en kuales sirkonstansyas enkontro, el 24 de agosto 1903 en un vaporiko sovre el Danubio entre Belgrado i Orsova, a Enrique Bejarano, direktor de una eskola djudiya espanyola de Bucarest, i su mujer. Pulido fue esmovido de ver – es Pulido ke lo eskrive en kasteyano – « su amor de la tierra hispana, que hubo de expresar con emocion lacrimosa i frases de extremada delicateza i ternura, como atestiguando un culto religioso y secularmente conservado »… Bejarano se abolta verso su mujer i Pulido lo oye dizirle: « Ves como la Providencia nos atiende y consuela? Hoy nos proporciona la ventura de ir en este barco y conocer a estos senyores, que son de Espanya, de nuestra querida madre patria, y hacernos sus amigos. Ves que bueno es Dios? »
Meldando esto, me akodri ke en el foro de ladinokomunita, meldi alguno ke pensava lo mismo: Espanya es muestra madre patria. A mi me parese ke pokos son oy los djudeo-espanyoles ke tyenen tal amor para la Espanya. En franses se dize cocu battu content (kornudo aharvado satisfecho). Pulido el mismo se enkanta delantre esta « injustificada veneracion por la tierra hispana » – es Pulido ke avla!
I por tanto mos konta ke tuvo relasyones epistolares kon un alay de djudeo-espanyoles al derredor del Mediterraneo, i ansina eskrive Pulido en su kasteyano: « Por vida quedaran gravados en mis recuerdos la paternal bondad de Lorenzo Ascher, y las melosas lisonjas y delicadezas de Enrique Bejarano, ambos de Bucarest; la obsequiosa solicitud de Moises Abravanel, de Salonica; la despierta y peritisima colaboracion de E. Carmona, de Tetuan; la profunda sabiduria literaria de Jose Benoliel, de Lisboa; el gallardo espanyolismo y portentosa cultura de Jacques Danon, de Andrinopolis; la secilla bondad y pericia pedagogica de Moises Fresco, de Constantinopla; la distinguida cortesia de Salomon Levy, de Oran; la juvenil gentileza y selecta cultura de Benko S. Davitscho, de Belgrado; la espontanea solicitud y practica pericia del elegante escritor Abraham Z. Lopez Penha, de Barranquilla, y de Alberto Cazes, de Estambul; la selecta, noble y prestigiosa ilustracion del renombrado historiador Enrique Leon, de Biarritz; la sugestiva forma literaria de Abraham A. Cappon, de Sarayevo; la inagotable bondad y entusiasta ayuda de Jose Farrache, de Madrid; las eruditas exposiciones de Jose Romano y Rafael Cohen, de Esmirna; la precisa y correcta repuesta de S.I. Pariente, de Beyrouth; la practica y rebuscada informacion de Jose Elmaleh, de Gibraltar; las muchas atenciones, en fin, de Spagnolo, de Alejandria; Mitrany, de Andrinopolis;los Salcedos y Pereires, de Bayona; Canetti, de Calarasi; Rousso, de Constantinopla; Franco, de Demotica; Antebi, de Jerusalen; Danan, de Lorenzo Marques; Levy, de Londres; Garson, de Manchester; Salem, Nehama, Levy y Arditti, de Salonica; Franco y Romano, de Esmirna; Pisa, Laredo, Pinto, Pimienta y Benoliel, de Tanger… »
Vos ize una meldadura bastante larga, i puede ser vos enfasyatesh, ama por siguro vos pensatesh dos kozas: la primera, ke Pulido pudo topar djente de todas partes, la sigunda, malorozamente, es ke esto no seria mas posivle oy, a penas un siglo despues. Ke eramos, en ke hal estamos oy…
Ama esto es lo ke vamos a ver un poko mas despues, kuando vamos a ayegar a la sigunda parte de mi emisyon, konsagrada a la edisyon espanyola del livro del profesor Sephiha, empesado en 1977, i ke ya se yamava La agonia de los djudo-espanyoles. Ama dainda no estamos en esto; dainda estamos en el empesijo del siglo vente, pasado, ande aviya djudeo-espanyol avlantes en todas partes.
Angel Pulido kijo azer aboltar estos espanyoles sin patria, komo los yamo, a la Espanya ke los aviya echado. Komo fue oido por el puevlo espanyol? Los unos alavaron su eskopo i aprovaron de ayudarlo. Otros, mas konservadores i antisemitas, lucharon kontra sus ideas.
Me parese, por lo poko ke se, ke a la vez Pulido gano i no gano.
Por un lado, se puede dizir ke Pulido gano, syendo ke en 1924, basho la diktadura de Miguel Primo de Ribera, ke no kale konfundir kon su ijo antisemit Jose Antonio Primo de Ribera, el Real Dekreto del Directorio Militar del general Primo de Rivera, del 20 de deciembre de 1924, dyo la nasyonalidad española, no de manera ekspresa a los sefaradim komo unos kreen, ama, para tomar los byervos mismos del dekreto, a los “antiguos protegidos españoles o descendientes de éstos, y en general a individuos pertenecientes a familias de origen español que en alguna ocasión han sido inscritos en los Registros españoles”.
Mijor de nada fue.
Vos akodro ke Pulido se muryo en 1932. En 1924, dainda biviya, i esto siguro ke es basho su influensa ke pudo salir tal dekreto.
Por otra vanda, me parese ke Pulido no gano, syendo ke muy pokos fueron los djudyos ke demandaron a aprovechar este dekreto.
Los djudyos no puediyan endevinar en 1924 ke la nasyonalidad espanyola les puedriya salvar la vida vente anyos mas despues.
Ya vos konti en una otra emisyon komo el diplomato espanyol Angel Sanz Bris tomo en 1944 este dekreto komo fundamento juridiko para distribuir la nasyonalidad espanyola a syenes de djudyos ungarezos sözde sefaradim i por esto espanyoles…
Muncho se tendriya de dizir mas sovre Angel Pulido. Los ke son interesados puedran ir a meldar la teza de Martine Lemoine intitolada « Angel Pulido Fernandez un humaniste de la Restauration (1852 – 1932) » teza de 1982, kijo dizir 50 anyos despues la muerte de Pulido. Ya entenditesh ke kuando Martine Lemoine avla aki de la Restaurasyon, avla de la restaurasyon espanyola, i no de la franseza.
Me vo kedar aki kon Angel Pulido, para eskapar mi emisyon sovre el livro del profesor Sephiha L’agonie des judéo-espagnols, ke salyo en Fransya por la primera vez en 1977, i ke tuvo este anyo 2012 una mueva edisyon, esta vez en espanyol, i es djustamente Martine Lemoine ke izo la traduksyon (Hebraica ediciones. Los ke kyeren merkar esta edisyon espanyola pueden ir sovre www.libreriahebraica.com).
Se puede dizir ke este livro en 1977 fue un grito en la noche del djudeo-espanyol ke se estava muryendo en silensyo, afillu los esfuersos de unos kuantos aki i aya, Turkiya i Israel.
Algunos an kritikado el profesor Sephiha por tener avlado de agoniya, i el se defendyo dizyendo ke kaliya tomar este byervo kon su sentido en su etimolojiya grega: la lucha. A mi poko me sale ke sea en grego, en franses o en espanyol. Es para mi siguro ke el djudeo-espanyol esta agonizando en todos los sentidos de este byervo: esta muryendo, i esta luchando kontra esta muerte.
En 2005, kuando estavamos en djuntos avlando a la radyo, dishe ke la lucha kaliya azerla, ama savyendo ke de toda manera era una lucha pedrida, i el me respondyo: « Kyen puede saver? Semos el puevlo de los nisim, los miraklos… »
Es vedra ke vimos komo el ebreo renasyo kuando ya era una lingua muerta desde siglos…Kreo ke no egziste en la istorya del mundo otro egzemplo de tal renasimyento. Por esto kale luchar kadal diya, azyendo suyo esta dicha de Guillaume d’Orange: « no es menester de esperar para empesar, ni de reushir para kontinuar ».
Esto dicho, i para los ke dainda no meldaron este livro, kualo mos dize?
Por empesar, de kyen se avla? De los sefaradim? Si, ama este byervo, ke kyere dizir espanyol en ebreo, a trokado a poko a poko de sentido, i munchos yaman agora sefaradim todos los ke no son ashkenazim, lo ke es una bovedad, ama ansina es. Por esto, i para guadrar la presizyon del sentido, el autor va avlar de djudeo-espanyoles, los haliz sefaradim, kijo dizir los ispano-avlantes del norte del Maroko i del ex-Imperyo osmanli.
El livro empesa de kontar la trajika istorya de 1492, ke es el empesijo de todo (afillu si munchos djudyos ya se fuyeron un siglo antes, kon las matansinas de 1391). Los djudyos, esta vez, no se fuyen: son echados a fuera, i se van, sea en el Portugal, sea en varyas direksyones, lo mas en el Imperyo osmanli ke los akoje.
Despues el autor empesa a amostrar komo la lingua, o en vedra las linguas espanyolas se izyeron a poko a poko una lingua espesifika de los djudyos, kortada del espanyol de Espanya. Esta lingua, el autor la yama djudeo-espanyol. La palavra no es suya, ya la topamos, por egzemplo, ande Angel Pulido, admirando Bejarano komo « buen sabidor de literatura judeo-espanyola ». El esfuerso del autor va ser de distingir dos modos de esta lingua djudeo-espanyola: la lingua vernakular, avlada por la djente, ke los djudyos mismos yaman espanyol, djudezmo, djudyo, ets. I al lado de esta lingua vernakular ay la lingua kalka, komo la yama el autor. Es el espanyol arkaiko uzado para trasladar « palavra por palavra » tekstos relijyozos, i por empesar el Tanah el mismo, del ebreo, o tambyen del arameo, komo el empesijo de la agada de Pesah. Esta lingua kalka es el ladino, i no otra koza. Se yerran los ke yaman ladino el djudeo-espanyol vernakular (avlado). El ladino no se avla.
Despues el autor mos konta la istorya de estos djudyos, sovre todo los del Imperyo osmanli ke a poko a poko se dezaze para dezapareser i dar lugar a estados nasyones, inkluyendo la Republika turka.
De ayi empesa la agoniya, i por siguro la gerra i la shoa va venir apesgar el drama, aharvando no solo la lingua, ama tambyen sus lokutores.
El autor mos aze un estado de lo ke era el mundo djudeo-espanyol en los anyos setenta. La mueva edisyon en kasteyano , kon munchas notas, aktualiza este estado a lo ke se pasa oy, sovre todo en su bibliografiya muy rika ke se va asta agora.
Kale rengrasyar a la senyora Martine Lemoine a kyen devemos tan el estudyo sovre Angel Pulido komo su traduksyon de la ovra la mas konosida del profesor Sephiha ( si no la mas rika, ke es su teza sovre el Ladino).
Al djueves ke vyene, si kyere el Dyo!
Edmond Cohen
