eSefarad Noticias del Mundo Sefaradi
Keridos amigos i amigas.
Yo siempre bushko bvivir en sivdades al bodre de la mar. Me plaze muncho nadar,kaminar i azer paseos en vapor, treno i bus para trokar un poko la plaka. Esto tiene ke azer sin duda kon la sivdad ande me engrandesi.
Oy tomando el vapor del debarkader de Sydney indo a Manly i a Watson’s Bay me vino la idea de preparar una poesia sovre Istanbul i Sydney ande paso kaji toda mi vida.
LOS PASEOS EN VAPOR
Lo ke me plaze mas en la Sivdad de Sydney es ir a Manly i Watson’s Bay en vapor, respirando el aire de la mar me siento komo un rey. Los viajes en vapor ya tienen buena savor.
Me asento en la kuvierta mirando al Ponte i a la Opera. Me harvan al ojo estos altos edifisios i razga sielos. En kada lado se ve muncha verdura i la naturaleza. Estas vistas me azen pensar a los tiempos pasados.
Indo atras a mi chikez se desperta en mi la memoria de otra sivdad, Istanbul, kon sus vapores indo a las Islas i al Bosforo, kon una vista de miles de mezkitas, kasteyos i palasios, en realidad i todo esto kaye leshos de aki,al otro lado del mundo.
En munchos sentidos las 2 sivdades son paresidas kon sus playas, mares i kolinas ke dominan el paisaje. Lo ke no ay aki, son los bazares, hamames i las mezkitas. En un klima subtropikal,de otra manera se visten la djente..
Una sivdad kaye en el korason del Mundo Islamo Turko. La otra sivdad es Kristiana i representa mas el Oksidente. En estos 2 mundos diversos bivi siempre komo un Judio, pasando 24 anyos en Istanbul i 52 anyos en Sydney.
MI VIDA SE PASO AZIENDO PASEOS
EN MAR,TIERRA I LOS SIELOS.
INDO A TODAS PARTES DEL MUNDO.
Shimon Geron
Kapitan d’Estambol
SYDNEY 2014
Fuente: Ladinokomunita
