eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre “LOS KALES D’ESTAMBOL”, aki mos va a komentar sovre todas las sinagogas de los distintos kuartieres de esta antika sivdad, las desparesidas i las aktuales.
EL KAL BET ISRAEL DE SHISHLI METUKAN
Los problemas demografikos de Estambol no avian tadrado de tokar a la povlasion djudia de la sivdad tambien. En los anyos 50 del siglo 20 los djudios ke bivian en kuartieres komo Galata, i otros mas, avian empesado de manera graduala, a pasar a bivir a kuartieres komo Taksim, Nishantash i Shishli.
En efekto la istoria de esta sinagoga empesa en los anyos 20 del siglo pasado. La una parte del edifisio ke orijinalmente, era una fabrika de ilos, sirvio de garaj i la segunda parte fue transformada en sinagoga.
Segun los rejistros del Gran Rabinato, el 21 del mez de Tamuz 1940 tuvo lugar ayi la boda de Yomtov Robert Behar i Roza Zimbul Allevi, ma a la vista ke ayi tuvieron lugar bodas ainda antes de esta data.
En segito a la puja de la povlasion djudia en Shishli i sus entornos, en 1951, el Komite Exekutivo de la Komunidad Djudia avia tomado la desizion de anchear el kal ke ya existia.
En una seremonia ke tuvo lugar el 25 de Enero 1952, enkavesada por el rabino de Shishli, Moshe Benhabib, fue pozada la piedra triangular. En esta mizma seremonia fue desidido tambien de yamar a la mueva sinagoga Bet Israel.
Grasias a los esforsos echos por los arkitektos, Aram Deregobyan i Jak Pardo, ke lavorando endjuntos adelantaron este proyekto, restaurando el edifiso ke ya existia, adjustandole kolonas i una kupol ansi ke ancheando la azara, la galeria de las mujeres, i dando a esta sinagoga el aspekto ke lo meresia, el kal pudo ser avierto al publiko en las fiestas de Rosh Ashana i Kipur de este mizmo anyo. En el anyo 1961, fue adjustado a la sinagoga un «mikve», para el banyo ritual.
En segito al atako terorista al Kal Neve Shalom, el 6 de Septembre 1986, en el kual avian topado sus muerte 22 de muestros korelijionarios, durante las orasiones, todas las seremonias komo bodas, bar mitzva i funerales tuvieron lugar en el kal de Shishli, durante un anyo, asta la reaviertura, demuevo, de la sinagoga Neve Shalom a los servisios del publiko.
Malorozamente el kal de Shishli tambien fue testigo a un atako terorista , el 15 del mez de Noviembre 2003 durante el kual fueron matados 6 miembros de la komunidad djudia d’Estambol.
A los funerayes ke tuvieron lugar en el simeterio djudio en Ulus, avian partisipado unas 3000 almas i entre eyos reprezentes de alto posto en el governo turko i el Prezidente del Parlamento israeli, entonses, Reuven Rivlin.
