eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre » LOS KALES D’ESTAMBOL» en partikolar sovre “LOS KALES DE LAS IZLAS”, aki mos va a komentar sovre todas las sinagogas de los distintos kuartieres de esta antika sivdad, las desparesidas i las aktuales.
LOS KALES DE LAS IZLAS: LOS KALES DE LAS ADAS
Kuando en Estambol avlan de las Adas, se referan a las maraviyozas izlas en la mar Maramara ke son lugares muy apresiados en los kualos una grande parte de los istanbollis, partikularmente, la povlasion djudia de la sivdad, pasan los mezes del enverano.
Entre las mueve izlas ke ay en la mar Maramara, las 4 de las kualas trataremos en esta rubrika son las mas konosidas.
Antes de eskrivir sovre los kales, vos kero traer una kurta istoria de lo ke eyas reprezentanvan en la antiguidad i de lo ke reprezentan en los ultimos 100 anyos i asta oy.
La istoria konta ke en la antiguidad estas izlas fueron atakadas mas de una vez por pirates ke durante la epoka del Imperio Romano eyas fueron testigos aterribles trajedias.Munchos fueron los miembros de la famiya imperiala, entre eyos princhipes 
tambien, ke fueron exilados ayi i matados despues ke fueron torturados duramente.
Estas izlas fueron konkistadas por Fatih Sultan Mehmet (Sultan Mehmet el Konkistador) el 17 de Avril 1453, kurto tiempo antes de la konkista de Estambol. En segito a esto el Imperio Otomano desidio de liberar a los aprezados i djunto kon eyos traer a la sivdad a los pokos moradores ke bivian ayi.
Durante el reyno de Imperio Otomano, estas izlas kedaron vazias 
asta la metad del siglo 19, i es solamente en 1839, en segito a la proklamasion del Ferman del Tanzimat, de las refomas ke fueron echas en diversos kampos del Imperio, ke fue rekonosido el derecho de merkar terrenos en estas izlas, a suditos ajenos tambien. Los fransezes fueron los primeros a yegar i fraguarsen ayi kazas i son eyos ke las yamaron, ke les dieron el nombre de «Les Îles des Princes».
Kon el tiempo estas adas, ke tienen una ermozura eksepsional, kon sus boskes, muntanyas i kolinas kuviertas de flores, en los mezes de la primavera i enverano, i la mar ke es siempre blu i ke los turkos yaman Mavi Marmara, ke las entornan se transformaron en sitios de vakansas i rekreasion muy apresiados i preferados asta oy dia komo lugares de kampanya para los abitantes de Estambol.
Las kuatro izlas son: Büyükada (la izla grande) i kon su nombre antiguo Princhipo; Heybeliada ke era yamada Halkis; Burgazada, kon su otro nombre Antigoni i la ultima i mas chika de eyas, Kinaliada ke era i es yamada asta oy por los gregos Proti.
LA SINAGOGA DE LA BÜYÜKADA
HESED LE AVRAAM
Tomando en konsiderasion el grande numero de djudios ke empesaron a vinir en los mezes del enverano a la Büyükada, se konsintio tambien el menester de konstruir una sinagoga para los servisios relijiozos.
La sinagoga fue konstruida sovre el terreno de Avraam Arslan Efendi ke lo aregalo a la komunidad. En sinyo de apresiasion i rekonosimiento por este djesto el kal fue yamado Hesed le Avraam.
Antes de su konstruksion, los djudios de la Büyükada azian las orasiones de shabat en una kaza alkilada por Merkaducho Mutal, ma el patron de kaza, ke no pudo mas suportar el bruido echo por los fideles durante las tefilot los arondjo de ayi.
Eliya Karako, uno de los miembros de esta komunidad, arekojo los Sifrei Tora i yamo a los fideles a su kaza. La idea de fraguar una sinagoga nasio ansi. La fragua del kal pudo ser realizada grasias a la kontribusion personala de kada uno i uno de los djudios ke vinian a la izla para pasar los mezes del enverano.
La sinagoga Hesed le Avraam fue avierta a los servisios del publiko el primo del mez de Septembre 1904 kon una somptuoza seremonia. La fasada del kal avia sido ornada kon las bandieras turkas i su interior kon tapetes de valor i kon flores. A la seremonia de aviertura avian partisipado el sekretario del Gran Rabino de Turkia, Moshe Levi, el mayor de la izla Necip Bey, miembros del Bet Din ansi ke notables de la komunidad djudia de Estambol.
Esta sinagoga es muy aktiva asta oy dia i los djudios de la Büyükada ke forman la mayoria de la povlasion de la izla en los mezes de enverano, pasan ayi jeneralmente las fiestas de Rosh Ashana i Kipur i a vezes la fiesta de Sukot tambien.
En esta sinagoga tienen lugar, entre otras, seremonias relijiozas atadas a las fiestas ansi ke de Bar Mitsva i Bat Mitsva.
En el ultimo mez de Ramadan, mez de ayuno de los muzulmanos, fue dado en la sinagoga Hesed le Avraam un pranso de «Iftar» de kortadura de ayuno. A esta sena, ke esta ya es la segunda vez ke fue realizada por el Komite Exekutivo de la izla, partisiparon entre otros, el Gran Rabino de Turkia, Rav Isak Haleva, el eks Prezidente de la komunidad Silvyo Ovadia, el Mayor de las izlas i otros notables mas.
