eSefarad Noticias del Mundo Sefaradi
Djoha era muy prove , i de vez en kuando vinia envitato a komer noche de shabbat en la kaza del gvir de su lugar. Una noche de shabbat, entrando en kaza kon el gvir después de la terfilla, Djoha dio una ojada a la kuzina , para ver kualo avian aprontado a komer. I kualo vido?
Vido enriva la meza dos platos . En el uno avia un pishkado grande i en el otro un pishkado chiko.
Se disho Djoha: » Ah, makare ke me den a mi el pishkado grande! Esto muerto de ambre! Bueno, ya disheron kidush, ya izieron netila i amotsi , i ya se metieron a komer. Entra el moso i mete delantre de Djoha el plato kon el pishkado chiko. Djoha aze una kara triste, i no esta komiendo.
– Le dize el gvir: «Ayde Djoha, deké no komes?. Ke tienes?»
– «Nada!», le dize Djoha, «No tengo gana. Esto muy triste».
– «Ma deké?» le dize el gvir.
– «Porké me akodri de mi ijo…Yo tinia un ijo ke se fue por mar i mas no torno…» le dize Djoha.
– «Ayde, kome agora!» le dize el gvir.
Ma Djoha, en lugar de komer, abasha la kavesa asta el plato, i avla alguna koza avagariko a la oreja del pishkado. Después mete la oreja al lado de la boka del pishkado, i aze ver ke esta oyendo lo ke el pishkado le esta diziendo.
– «Kualo dishites al pishkado?» le demanda el gvir.
– «Le dishi: – Tù, ke vinites agora de la mar, puede ser oyites alguna koza sovre mi ijo?- » le dize Djoha.
– «I kualo te disho el pishkado?» le demanda el gvir.
– «El pishkado me disho :» dize Djoha «- Yo sé deynda muy chiko i no puedo saver nada. Ma en la kuzina esta mi padre ke es muncho mas grande de mi. El savrá siguramente alguna koza. Ke te lo traygan aki, i demandale a él.»
Ansi trusheron el pishkado grande delantre de Djoha, i Djoha…se lo komio!
De Pocho Barqui. Fuente: «historias del Djohá y otras»
