eSefarad Noticias del Mundo Sefaradi
Israel es un payiz maraviyozo, el mundo se ensela del progreso ke el izo en los dalkavos 80 anyos i de la manera ke se save defenderse, ma malgrado esto el tiene munchos, si munchos problemes.
El israeliano no manka nunka la okazyon de kritikar o de kesharse de lo ke no le konviene, aviertamente en publiko. Basta de ver lo ke yamamos los ‘parlamentos’ en los kafes onde se arekojen ombres komo mujeres para kritikar entre eyos komo ekspertos el seko i el vedre de la politika, de kesharsen de la karestriya, del trafiko, del aspekto de la vida i mas i mas. A eyos les parese ke son grandes ekspertos en todo modo de sujeto ke trata del avenir del payiz.
El governo aktual de Bibi ke no es visto komo muy apropiado, no save mas komo responder a todas las keshas ke resive en estos momentos de gerra. Lo ke mos akodra, lo ke avia dicho Golda Meir a Richard Nixon en una de sus vijitas a la Kaza Blanka. “Vozotros sosh el prezidente de 150 milyones de amerikanos, yo so el primer ministro de 6 milyones de primer ministros”.
Vos dare un eshemplo esmovyente. El shekel gana de valor kada dia ke pasa en raporto a las otras monedas internasyonalas.
Se demandan los kritikadores del charshi, kuanto tiempo esto kontinuara?
Es bueno ke el shekel se enforteska tanto?
Kualo va ser muestras eksportasyones kon una moneda tan alta, komo las industrias van a poder vender sus produktos?
Mal grande ke ovliga la Banka de Israel a vender dolares para ke abashe de su valor deklaran los ofisiales. Dingunos de eyos no se renden kuanto ke un shekel fuerte es en favor del sivdadino israeliano ke paga mas barato los produktos ke emplea kada diya ke vienen de afuera.
En entrando al anyo 2026 este mizmo puevlo devra saver los problemes importantes ke lo asperan.
GAZZA: Oy Gaza es separado en 2, una partida esta dainda en la mano del Hamas el kual refuza de dezarmarse, lo ke krea problem de pueder nominar un governo lokal ke dirijara la banda.
En despartes organizar una fuersa internasyonala ke devra mantener la seguridad de la frontiera kon Israel i ke se okupara de formar una mueva polisia.
Estas serán las difikultades ke se devran resolver kon el prezidente Trump de una vanda i kon los payizes arabos de la otra, sin la entervasyon de la Turkiya. Sera una ovligasyon de pueder espartir el Hamas de la povlasyon de Gazza. Si esto no es echo, el Hamas simplemente kontinuara a dirijarla, komo fue el kavzo despues de las gerras pasadas.
LIBANO: El Libano reprezenta el semejante problem de Gazza. El Hezbollah refuza de dezarmarse, malgrado ke el governo Libanezo se okupa de este problem sin pueder reushir, ma se esforsa a tener progresos.
Es ke se le puede azer konfiensa?
No dizen los komandantes del Tsahal. No se save si el Hezbollah se travo enteramente del sud del Libano i si kere veramente entregar su armamiento a la armada libaneza. Es ke una intervesyon militara de Israel para dezarmar el Hezbollah será programada kon el prezidente Trump en 2026?
Por el momento el Hezbollah se mostra kon gaava (arrogansya) bazandose sovre su enfuensya politika al seno del governo Libanezo.
SIRIA: Israel eskojo de no ser amigo del pueder muevo en Siria i de kolaborar kon el en 2025. Israel demanda a ke el sud de la Siria sea demilitarizado i ke el se deklaro protejador de la minoridad Druza ke bive serka de la frontiera israeliana. Israel además deklara ke este estado devra ser valivle por un tiempo indefinido para las 2 partes.
En el anyo aktual se pensa ke Yerushalayim nesesita de dechizar si kere azer un kompromiso kon Damas o tener una relasyon yelada komo la del anyo pasado.
Por seguro tanto ke un akordo no será echo el monte Hermon entero kedara sovre el kontrol de Israel. Despues de la vijita de Benjamen Natanyahu en los Estados Unidos sovre la presyon de Donald Trump una delegasyon israeliana se topa en Paris para negosiyar kon el ministro del eksteryor siriano un akordo de tregua entre los dos payizes. Veremos lo ke va salir.
IRAN: Los mollahes kontinuan kon sus misiles balistikos a menazar Israel. Trump dalkavamente sinyalo ke da apoyo a Israel a defenderse. Ma no olvidar ke al 12en diya del atako sovre las instalasyones de produksyon de enrekisimiento del uranium Trump lo arreto, visto ke el se deklaro kontra el prensip de kontinuar la gerra.
Kon los protestos del puevlo iranyano ke kontinuan dezde semanas no se save al final si un trokamiento de governo será posivle.
Si no, el problem iraniano es un grande problem para Israel.
YEHUDA I SHOMRON: El ‘challenge’ de afrontar un terror organizado persiste. Muevamente Tsahal formo una divizyon de soldados la kuala es responsavle de kontrolar la frontiera kon la Jordaniya.
El buto es de mirar a arestar el trafiko de armas en los territoryos de Yehuda i Shomron. Tsahal no desha a ke el inimigo palestiniano alevante la kavese. Malgrado esto, la situasyon de Mahmud Abbas i la lucha ke se organizara por su segido puedera krear bastante truvyos en la zona.
SINAY: Mizmo problem de Yehuda i Shomron, onde kon drones se dezvelopo un trafiko de armas proviniendo de Mitsrayim.
Esto representa un grande peligro sekuritaryo. La polisia se esta organizando en el Negev para mirar a kontrolar el trafiko de armas entre los beduinos de las 2 partes de la frontierra.
Diya no pasa ke drones no son abatidos yenos de plomos M-16 i M-4.
APROVIZYONAMENTO DE ARMAS: Israel mira en los anyos futuros a ser mas independiente en la fabrikasyon del armamento ke nesesita.
El no kere mas ser dependiente de los evropeos i mira de renforsar su kolaborasyon kon los Estados Unidos. Esta pronto a envestir miliardas no solo para produizir armamento klasiko ma krear muevos sistemas de defensya ke lo ayudara en kavzo de konflikto a defenderse sin tener demenester de la asistensya de payizes ajenos.
Israel mira a dezvelopar en kolaborasyon kon los Estados Unidos sistemes de defensya i de realizar un muevo memorándum afin de resivir un ayudo de 3 miliardas por anyo.
Israel en los anyos venideros resivera 25 F-15s de Boeing de una valor de 8 miliardas de dólares, aviones de bombardamiento ultra perfeksyonados.
Dr. Selim Salti
