eSefarad Noticias del Mundo Sefaradi
Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
MARTIN BUBER
(Viena, Austria, 1878 – Yerushaláyim, 1965 )
De Wikipedia
Martin Buber, filozof, traduktor i edukator nasió en Viena en el 1878 en una famiya djudía, i resivió una edukasión plurilingual: la mosa de su kaza avlava yidish i almán. El se ambezó el ebreo i el fransés en su chikés, i el polonezo en la eskola segondaria.
En el 1892, Buber tornó a morar en Lemberg en la kaza de su padre. Una kriza relijioza lo izo kortar kon los kostumbres del djudaízmo. El empesó a meldar Kant, Kirkegaard i Nietzsche, del kual fue sovretodo enfluensado. En el 1896 se fue a Viena a estudiar filozofía, istoria, filolojía i estudios djermánikos). En el 1898 él se adjuntó al movimiento sionista, i empesó a partisipar a los kongresos sionístikos.
En el 1899 se kazó kon Paula Winkler, eskritora sionista no-djudía ke después se konvertió al djudaízmo. Herzl i Buber se toparon en dizakordo sovre la nesesidad de la kultura djudia en un futuro estado. En el 1902 Buber se izo el editor de semanal «Die Welt», el organo sentral del movimiento sionistiko i en el mizmo tiempo se aserko al movimiento hasidiko.
En el 1906 el publiko una koleksion de kuentos sovre Rabi Nachman de Breslav. Dos anyos mas tadre publiko «Die Legende des Baalschem» el fondador de los hasidim. Del 1910 al 1914 el estudio los mitos i publiko una edision de tekstos mitikos.
Durante la Primera Gerra Mondial el se izo el editor del jurnal mensual «Der Jude» asta el 1924. En el 1923 Buber eskrivio su famoza teoria sovre la existensia «Ich und Du» (I and Thou, en ingles). En el 1925 el empeso kon Franz Rosenzweig la traduksion de la Biblia en alman. En el 1930 se izo profesor onorario en la Universidad de Frankoforte sovre el Meno.
En el 1933 las autoritas nazistas le defendieron de dar sus konferensias. I en el 1935 fue ekspulsado de la universidad. Entonses el fondo el Ofisio Sentral para la Edukasion Djudia de los Adultos porke el governo nazista defendio a los djudios de resivir la edukasion publika.
A la fin en el 1938 Buber desho la Almania i se establesio en Yerushalayim., ande resivio la profesura en la Universidad Ebrea, dando konferensias de antropolojia i de etroduksion a la sosiolojia. El se izo miembro del grupo «Ichud» ke keria un estado binasional para arabos i djudios djuntos en Palestina, ke el via komo kuplimiento del sionizmo, mas ke un estado solo djudio.
En el 1946 el publiko «Paths in Utopia», ande ekspozo en manera detalyada su vizion sosialista komunitaria. Despues de la Sigunda Gerra Mondial el izo un tur de konferensias en Evropa in en U.S.A. En el 1951 resivio el premio Goethe en la Universidad de Hamburg, i en el 1953 el Premio de Paz del «German Book Trade».
En el 1958 Buber pedrio a su mujer Paula, i en el mizmo anyo resivio el Premio de Israel. En el 1963 el gano el premio Erasmus en Amsterdam. En el 1965 el murio en su kaza de Talbiye en Yerushalayim. La enfluensia de Martin Buber se ekstende en el kampo de la psikolojia sosial, la filozofia sosial, el anarshizmo filozofiko i el existensializmo relijiozo.
Matilda Koen-Sarano
