Las Notas de Matilda – Poezia: PAPIYONES BLANKOS

PAPIYONES BLANKOS

A Aharon

Papiyones blankos, papiyones mavís
Korren livianos serka de mí,
Flores de oro enriva del vedre,
Ande muestr’ojo leshos se piedre.

Klaro sta ‘l sielo, mos keynta el sol.
Dizen tus lavios palavras de amor.
A la solombra d’un árvol antiko
Siento mi sprito azerse mas riko.

Miro las nuves blankas bolar,
Siento tu mano la mía tomar.
A tu sunriza yo torno serena;
Kon ti m’ulvido de toda mi pena.

Mizmo si el sol ya va tramontar,
Mi korasón no te kere deshar.
Ah, kuantos anyos de vida daría,
Si en este punto kedar yo podía!

Matilda Koén-Sarano, De Chiavenna a Madesimo (Italia), 1.8.1993

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…