Las Notas de Matilda – Poezia: Don Kishot

Don Kishot

 
Don Kishot de los mulinos
Siempre stas en los kaminos,
La djustisia vas bushkando,
Sólo dertes stas topando.

En la mano tienes lansa,
A tu lado Sancho Pansa.
De la Mancha tú provienes,
Miles d`aventuras tienes.

Tú la vida stas pasando,
Gloria, amor tú vas bushkando.
Toda la kavayería
Renovar vas en un día?

Tu armadura, kavayero,
Yevar deves al fierrero,
Porké sta frojenteada,
Ahajada i burakada.

Briareo el djigante
Matarás en un instante?
Mulinar kon la tu spada,
Tú verás, no sierve a nada.

Tu mazal es tu eskudero,
Ke haham es verdadero.
Kon su mano a ti tendida
Siempre salva la tu vida.

La mujer de tus esuenyos
Es pastora de revanyos.
Dulsinea del Tobozo
Va kererte komo espozo?

Ayde, bovo, torna a kaza.
Tu kavesa ay repoza.
Kale ke te milizines
De tu mundo de iluziones.

De Cervantes sos figura
K`asta oy al mundo tura.
Riyir azes i yorar.
No podemos t`ulvidar.

Matilda Koén-Sarano, Yerushaláyim, 8.8.2005

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…