eSefarad Noticias del Mundo Sefaradi
Amor i dolor
El amor para mí es dolor.
El amor tien’en sí sufriensia.
Sin amor mas no ay existensia
I la vida no tiene savor.
La razón nunka vas demandar,
K’el amor dar no save repuestas.
Save sólo azerte rekuestas,
De ti todo azerse donar.
Si un día tú keres fuyir,
El amor nunka siente razones.
El te serra en las sus preziones.
A dinguno no desha salir.
El ke kere bivir sin amor
Superar deve un’amargura
K’en el mundo no topa su kura.
Renunsiar a l’umana kalor.
Es serrarse adientro de sí,
Izolarse ‘n un mundo pidrido,
D’emosiones bushkar el olvido.
Avagar es desharse murir.
Matilda Koén-Sarano, en kamino de Yerushaláyim a Tel-Aviv, 29.4.2002
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
