eSefarad Noticias del Mundo Sefaradi
Salonik
No kero, Salonik,
No kero ver tus kayes,
Tus palasios, tus botikas.
No kero ver tu mar
De la kolor del sielo,
Tus luzes ensendidas.
Kualo son estas rizas,
Estas palavras, estos kantes?
Eyos vienen a mí
Kon una kola de yoros.
Para mí tú sos
Una sivdad de muertos,
Un rekordo de vida
Ke nunka va tornar,
Ke spira a mí derredor
I no me desha repozo.
El eko de tu lingua,
Trayida de Espanya,
Se siente deynda en el ayre
I me aze estremeser.
No puedes, Salonik,
No puedes darme atrás
Mi puevlo, mi lingua,
Mi alma, tu alma.
La dolor está adientro de ti.
Salonik, tu alegría
No es verdadera.
Tú no me puedes enganyar.
MATILDA KOEN-SARANO – Salonik – 16.4.2000
(del livro «Ritmo Antiko» de Matilda Koén-Sarano, Yerushaláyim 2005)
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Esta hermosa poesia que aqui nos brinda la Kerida y siempre Admirada; Matilda Koen Sarano, tiene la virtud de retrotraerme en el tiempo,y situarme de nuevo en las calles de Salonik, que años atras visitára, embuido entonces de esa misma melancolia que tan bien sabe ella describir, y de identica sensacion de pérdida perceptible de una huella única y reconocible, como fue aquella que dejó con su impronta la longeva y nutrida presencia sefaradi …¿simples añoranzas? tal vez …