eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Yossi Stern
(Bakon Hills, Ungaría, 1923 – Yerushaláyim, 1992)
De Nofimgallery i SafraiGallery
Yossi Stern, pintor i desinator israelí, nasió en Ungaría, i kuando tenía 10 anyos i ya desinava, su famiya se transferó a Budapest. En el 1939, kuando se enfuertesió la bestialidad de Hitler, el djoven pintor se embarkó para Palestina en una vieja nave, ma a su arivo fue deklarado imigrante ilegal i fue mandado en un kampo de prizioneros por 6 mezes. En el 1943 fue deskuvierto su talento i entró en la eskola de arte Bezalel en Yeushaláyim, ande se izo después maestro de arte gráfika. En el 1949 se fue a Londra a estudiar en el «Royal College of Art». El lavoró en munchos jurnales komo fotograf i illustrador. En el 1967 resivió un importante premio de la UNESCO, i después otros varios premios.
Yossi Stern es rekonosido en Israel komo uno de los artistas mas yenos de vida. El es famozo sovre todo por sus illustrasiones, su gráfika i sus desenes de kolores. Sus desenes están exibidos i aparesen en munchas publikasiónes. Sus sentro es el ombre i su mundo, i mas presizamente el ombre en el mundo israelí kontemporaneo. Akodraremos su famoza ovra de omaje sovre el Eroízmo de la Armada de Israel en la Gerra de los Sesh Días. En sus ovras se topa además una abundansia de temas djudiós: el Shabat, las Fiestas, el Bar-Mitsvá, el matrimonio, los klezmeres, el león de Yeudá. Yossi Stern tinía el talento de krear a la minüt un kuando entero, de una linya trasada por la mano de una otra persona.
Matilda Koen-Sarano
