eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Moritz Daniel Oppenheim
(Hanau, Almanya, 1800 – Frankoforte sovre el Meno, 1882)
De Wikipedia
Moritz Daniel Oppenahim es konsiderado el primer pintor djudió de la edad moderna. Su lavoro está embevesido de sus raízes kulturales i relijiozas, en un tiempo, onde munchos de los djudós almanes deskojeron de konvertirse al Kristianizmo. El kedó «favorable al prezente», sin niegar el pasado.
El resivió sus primeras lisiones de pintura por Westemayer en Hanau, i a la edad de 17 anyos entró a la Akademia de Artes de Mónako. Mas tadre se fue a París i a Roma, ande estudió kon los mas famozos maestros de pintura de akel tiempo. En Roma estudió la vida djudía del geto i izo skizas sovre varias fazas de la vida familiar i relijioza, en preparasión de un ancho kanovacho ke pintó a su retorno en Almania.
En el 1825 se establesió en Frankoforte i poko después exibió su pintura «David tanyendo delantre de Shaúl», para ver la kuala un gran número de admiratores vino de todas las parte de Evropa. En el 1832, sovre rekuesta de Goethe, Karl Fridrih, gran duke de Saxonia-Weimar-Eisenach, le otorgó el títolo onorario de profesor.
Los estudio de Oppenheim sovre la vida djudía, sus pinturas sovre el emperador Josef II i Moses Mendelssohn, sus retratos de la vida de Ludwig Börne i otros djudiós notables sus kontemporáneos, establesieron su fama de uno de los mas emportantes pintores djudiós del siglo XIX. «EL retorno de volontario djudió» es su ovra mas famoza.
