eSefarad Noticias del Mundo Sefaradi
Kada martes, Matilda Koen Sarano mos konta sovre Personalidades de Israel.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
El Rav Ben Tsión Meir Hay Uziel
(1880-1953)
El primer Rishón Letsión del Estado de Israel, fue uno de los rabinos sefaradís sovresalientes en la primera metad del siglo XX.
El era ijo del Rav Yosef Refael Uziel ke era prezidente del Tribunal Rabíniko de la komunitá sefaradí. Se izo guerfano de padre a la edad de 14 anyos. A la edad de 20 anyos fue nominado rabino en la Yeshivá «Tiferet Yerushaláyim», i mas tadre fondó otra Yeshivá para los estudiantes sefaradís, la Yeshivá de «Mahziké Torá».
En el 1911 fue nominado rabino de la komunitá sefaradí de Yafo. Durante la primera Gerra Mondial fue exiliado por los turkos a Damasko, a kavza de su aktividad públika i sus protestas kontra la persekusión de los djudiós, ma le fue permetido de tornar a Israel antes del arivo de la armada británika.
En el 1921 fue nominado rabino de la komunitá de Salonik, ke tinía sesenta mil djudiós. Durante este periodo, él operó para el renforsamiento de la Torá, komo para la difuzión de la lingua ebrea i el sionizmo. El yamó a la djuventud djudía a azer su aliyá a Israel, antes ke la situasión de los djudiós peoreara. En el 1923 torno a Israel a la karga de gran rabino sefaradí de Tel-Aviv-Yafo. Del 1939 asta su muerte él tuvo la karga de Rishón Letzión (Gran Rabino Sefaradí) de Eretz Israel. Asta la fondasizin del Estado, el Rav Uziel era miembro del Vaad Leumí, i partisipó a enkontros, en el kuadro de los kualos fue fondada la Adjensía Djudía. El reprezentó también la puevlasión djudía delantre del governo britániko i delantre de la ONU.
Después de la fondasión del Estado de Israel él se izo el Gran Rabino del Estado de Israel. El publikó munchos volumes de artíkolos i de Responsa.
Todo el tiempo ke fue en karga operó para mijorear el status i la edukasión de los sefaradís. El fue konsiderado liberal en konfronto a otros rabinos de su tiempo, i entre otras apoyó el derecho de voto para las mujeres.
En su testamento eskrivió» …konservá kon grande atansión la paz del puevlo i del Estado… Amá la verdad i la paz».
Matilda Koen-Sarano
