eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
La vista del dolor
Mis karos parientes usavan a ir ande una muy famoza dantista ke tenía su klínika en Haifa en el sentro de la sivdad.
Un día le telefonó mi padre, diziéndole ke estava sufriendo muncho de los dientes i demandándole ke lo resiviera en urjensia.
Le kontó la dantista ke trokó su lugar i pasó a morar en la montanya i agora ayá está su klínika. La dantista le eksplikó a mi padre komo arivar a su mueva klínika. Ya se save ke en las kazas a la montanya ay una vista maraviyosa de la mar.
Mi padre se fue dospués de mediodía a bushkar el lugar, lo topó i entró en la kaza de la dantista.
La dantista lo resivió kordialmente, i mi padre se asentó en la siya de dantista en la klínika.
La dantista empesó su lavoro en la boka de mi padre.
A mi padre le empesó a tuyir mas muncho. Estava sufriendo, ma no disho nada.
La dantista, ke estava muy kontente de su mueva kaza, vido de la ventana el sol abashando. Eya estava tanto enkantada ke ensopitó disho a mi padre»Mira, mira la ermoza abashada del sol!»
Ma mi padre, kon la boka media avierta le disho: «….. Doktora, me estás avlando de la abashada del sol, ma yo… ya estó viendo las estreyas…
Kontado por ISRAEL MAZLIAH – 2013
Redaktado por Matilda Koén-Sarano
