eSefarad Noticias del Mundo Sefaradi
La mujer feya
Matilda Koén-Sarano
Avía una vez una ijika de buena famiya, ke era muy de muy feya.
La madre la kería muncho bien i la mirava bueno, i le dio orden ke nunka se mire al espejo. I ansina kedó.
La chika no se opozó a la demanda de la madre, afilú ke eya ya se murió.
Pasaron los anyos, la chika s’izo grande, ma su “ermozura” no se trokó (ke mal te kere).
Ma komo dize el refrán “El mazal de la feya la ermoza lo dezeya”, eya se kazó kon un mansevo lindo i riko, ke la kería muncho bien.
Pasaron los anyos i le nasieron tres ijas, ke salieron “ermozas” komo la madre. Ma eya no les disho a las ijas ke nunka tienen de mirarsen al espejo.
Entonses pasaron los anyos, i la mujer feya estava kontente de su vida i de su famiya.
Un día se fue a kaminar en el kampo. El día estava maraviyozo, los árvoles estavan enfloresiendo, i los pásharos estavan kantando. Era un día orozo.
Kaminando, kaminando, eya arivó a un chay. S’abokó para lavarse la kara. Eya ke se mira a la agua, vido su kara. Le vino oras negras, i de la mufina desidió de matarse. Se asentó debasho de un arvolés i empesó a yorar.
Pasó por ay una mujer muy ermoza, la vido i le demandó: “Deké stas yorando?”
La mujer feya le kontó todo lo ke le pasó.
Le disho la mujer ermoza: “Ay, bova! Yo sé tú. Yo sé tu ermozura! Tu marido, kuando te mira a ti, me ve a mí”.
La mujer ermoza le repetó estos biervos unas kuantas vezes i se fue.
Akeya ora entendió la mujer feya deké le defendió la madre de mirarse al espejo.
Es ke la ermozura está en los ojos de ken te mira.
Kontado por SIMA SPACHISKI – 2000
Notado i redaktado por MATILDA KOEN-SARANO
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
