Las Notas de Matilda – Kuentos: Una lisión a la nona

Una lisión a la nona

Shlomi de kuatro anyos torna del gan de kriaturas i topa a la nona ke vino a pasar el shabat kon la famiya de su ija.

Le dize: «Shalom, nona!»

-«Shalom, kerido, ven dame un bezo» le dize la nona.

Shlomi va i le da un bezo.

-«Komo fue oy en el gan?» le demanda la nona.

«Bueno» le dize Shlomi.

-«Te agrada ir al gan?» le demanda la nona.

«Sí!» dize Shlomi.

-«Kualo izitesh oy en el gan?» le demanda la nona.

«Nona» le dize Shlomi, «tú deves saver todo?»

Kontado por MATILDA KOEN-SARANO – 2015

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino