Las Notas de Matilda – Kuentos: Torta de suenyos

Torta de suenyos

Avía tres ladrones: el uno era kristiano, el sigundo era muzulmano, el treser era djidió: era Djohá. Era un periodo de karestía i los estavan muy ambiertos. Bushkaron, bushkaron, arivaron a una patisería. Ayá toparon sólo un pan de Espanya.

Disheron: «Lo divizaremos en tres!» ma kada uno lo kiría entero para sí.

Después disheron: «Iremos a durmir i ken de mozotros va sonyar el sonyo mas ermozo, va tomar la torta entera.» Bueno, se fueron a echar.

A la demanyana se alevantaron,  se ansentaron i disheron: «Ke konte el kristiano.»

El kristiano kontó: «Yo estava durmiendo un esuenyo muy ondo, kuando vino un ándjel i me disho; – Ven kon mí al sietén sielo, ayá el Hristós te está asperando. I ariví ayá, me asentaron al lado del Hristós i los ándjeles kantaron salmos la noche entera.

Ermozo sonyo, eh? Ay mas ermozo de esto?»

«Sí,» disho el muzulmano, «mi sonyo es mijor. Yo estava durmiendo un esuenyo muy ondo, kuando vino ande mí un hodja, me disho: – Ven kon mí al ochén sielo, ayá Muhamed te está asperando. Me tomó por la mano,  me yevó al lado de Muhamed, me asentó al lado de él i la noche entera vidi las 72 vírjines baylar. Ermozo sonyo, no?»

Disheron los dos: «I tú, Djohá, kualo te sonyates?»

Disho Djohá: «Yo estava durmiendo un esuenyo muy ondo, kuando me se aparesió delantre un viejo kon la barva blanka, ke me disho: – Tu amigo kristiano está en el sietén sielo. Tu amigo muzulmano está en el ochén sielo. Eyos se están ayá sintiendo tanto bien ke no van a tornar mas. Por esto alevanta i kómete la torta!»

I yo me alevantí i me komí la torta, i no ay mas torta!

Kontado por MATILDA KOEN-SARANO – 2015

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino