eSefarad Noticias del Mundo Sefaradi
Pranso ande el sultán
And’avía de ser de un sultán ke tinía tres konsejeros: uno kristano, uno muzulmano i uno djidió. Los dos primeros se enselavan muncho del djidió i kerían meterlo en negra luz delantre del sultán ke lo kería bien.
Una noche el sultán los envitó a un kumbite i les aprontó a komer kozas maraviyozas. Al djidió ke era rabino le izo aprontar kumidas kasher, koza ke izo inyervar a los otros dos konsejeros. Durante el pranso el sultán estuvo aziendo traer las kozas mas savrozas en grande kantidad: poyos i aves, karneros, pishkados alavados, tortas i dulsurias, vinos i biviendas.
El sultán estuvo diziéndoles: «Gostá i d’esto! Komé i de esto!» I los tres konsejeros komieron i komieron asta ke no pudieron mas.
Akeya ora el sultán izo traer fruta: mansanas, peras, pertukales, bananas, ananas, serezas, melón, karpuz… Kualo mas?
Les disho el sultán a los konsejeros: «Servivos, por favor!»
Eyos disheron: «No podemos mas komer. Estamos artos!»
El sultán empesó a fosarlos i kuando vido ke no keren komer mas se aravió muncho.
Viendo esto, el rabino tomó una pera, la mundó i empesó a komérsela.
Los dos konsejeros se araviaron muncho i empesaron a gritar: «Tú sos mintirozo! Dishites ke no puedes mas komer i estás komiendo. Es ke keres azerte ermozo a los ojos del sultán!»
«No!» les disho el rabino, «Agora vos vo amostrar una koza. Traé un sako de patatas yeno asta el bodre.»
Se lo trusheron pishín. «Agora traeme una papelera de pinyones.» disho el rabino.
Kuando se la trusheron, él vazió la papelera de pinyones adientro el sako de patatas.
Los pinyones entraron i se desparesieron.
«Vitesh?» disho el rabino, «Entre las kozas grande i pezgadas ke komimos, ay un lugarsiko ande pueden entrar pedasikos de fruta.»
Los dos konsejeros se kedaron kon sus mokos enkolgando i el sultán lo aplodisió i le dio un sesto de fruta rara, ke se lo yeve a su mujer.
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
