eSefarad Noticias del Mundo Sefaradi
Sigún las sirkonstansias
Avía dos amigos: el uno djidió i el otro kristiano. Un día el kristiano envitó al djidió a su kaza.
Kuando el djidió entró, vido una meza aparejada kon todo lo bueno.
Le disho el amigo: «Ven, asenta, toma un plato i ínchilo de todo lo ke keres. Akí ay karnes, poyos, salsichas…»
Le disho el djidió: «No grasias, yo no puedo komer. Mi relijión me lo defende.»
El kristiano, muy desplaziente, se inchó su plato i komió.
Después él avrió un bokal de vino, le inchó una kupa al djidió i le disho: «Beve, por favor!»
Le disho el djidió: «No grasias, no puedo bever. Mi relijión me lo defende.»
El amigo se aravió, travó el kuchiyo, se lo metió al garón i le disho: «Beve, si no te mato!»
El djidió bevió para salvarse la vida, ma kedó araviado.
Le disho el amigo: «Estás araviado porké te menazí i te forsí a bever?»
«No,» le disho el djidió, «estó araviado porké no lo izites antes, kuando me envitates a komer!!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Muy komik, Matilda!
Saludos,
Rachel