eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 196
Ambezaron muestros maestros: Avía una mujer en Sidón ke se kedó diez anyos kon su marido sin tener ijos.
Se prezetaron delantre de Rabí Shimón Bar Yohay kon la entansión de divorsiar.
Les disho él: «Por vuestra vida! Komo kompartitesh la komida i la bevida (en estos todos anyos), vos vash a separar en lo ke se refiere a la komida i a la bevida».
Le disho el marido a la mujer: «Toma lo ke keres de lo ke tengo en kaza i vate a la kaza de tu padre».
Ke izo eya? Izo un gran kumbite i le dio a komer i a bever a su marido, i lo emburrachó bien bien. Izo senyas a sus servidores i servidoras i les disho: «Tomaldo i yevaldo a la kaza de mi padre».
Lo tomaron i lo yevaron a la kaza de su padre.
A media noche el ombre se despertó del esuenyo i demandó a su mujer: «Onde estó?»
Eya le disho: «Tú no me dishites: – Kualker koza ke dezeas de lo ke ay en mi kaza, tómala i yevatela a la kaza de tu padre? – Yo no tengo al mundo otra koza ke dezeo mas ke ti».
Kuando oyó esto Rabí Shimón Bar Yohay rogó por eyos, i eyos se mantuvieron unidos.
El Santo Bindicho El se akodra de las mujeres eskosas i los djustos rogan por eyas, i El aksepta sus orasión.
Fuente foto rabino: UCL LIBRARY
