eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 18
Ambezaron muestros maestros: Preguntó la reyna Cleopatra a Rabí Meír lo sigiente: «Sé ke los muertos resushitarán, komo está eskrito: I floreserán los sivdadanos komo la yerva del suelo (Salmo 72, 16), ma kuando se alevantarán de sus tombas, se alevantarán kon sus vistimientas o dezmudos?»
Le respondió Rabí Meír: «Se alevantarán kon sus vistimientas»
Izo una dedusión, illustrándola kon un grano de trigo. Komo este grano de trigo, ke es enterrado dezmudo, sale de la tierra kon munchos vestidos, kon mayor razón los djustos, ke fueron enterrados vestidos, saldrán vestidos.
Fuente foto rabino: UCL LIBRARY
