eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 16
Ambezaron muestros maestros: Una matrona demandó a Rabí Yosé Ben Halafta lo sigiente: «En kuantos días kreó el Santo Bindicho El su mundo?»
Respondió el Rabino: «En sesh días, komo está eskrito: Porké en sesh días izo Y. los sielos i la tierra (Ex. 20,11)».
Eya le demandó: «I ke aze a partir de este día?»
Le respondió el Rabino: «Forma kuples, (i dize): – La ija de Fulano para Sistrano, i el mazal de Fulano para Sistrano».
Entonses eya respondió: «Yo también puedo azer esto, i en un minuto puedo akuplar a todos los sirvidores i sirvidoras ke tengo».
Le disho Rabí Yosé: «Si esto es tan fasil a tus ojos, al kontrario para el Santo Bindicho sea es difisil komo la separasión de la Mar Kolorada».
Ke izo eya? Tomó mil servidores i mil servidoras i los metió en rango, diziendo: «Fulana para Sistrano i Fulano para Sistrana», i los akupló en una noche.
La demanyana sigiente se prezentaron delantre de eya, uno kon la kavesa aharvada, otro kon un ojo kitado, otro kon un pie roto. Uno dizía: «Yo no kero a ésta» i otra dizía: «Yo no kero a éste».
Eya embió a bushkar a Rabí Yosé i le disho: En verdad vuestra Torá es buena i dinya de alavasión, i todo lo ke dishites, lo dishites kon razón».
El le disho: «No te dishe ke si a ti esto te paresía tan fasil, al Santo Bindicho El le parese tan difisil komo la separasión de las aguas de la Mar Kolorada? Lo ke El Santo Bindicho El no aze es akuplarlos kon la fuersa, si no ke es para sus bien, komo está eskrito: El Dio, ke a los solitaries aze morar en kaza, ke kita kon bien a los kaptivos. Ke kere dizir: Yorando i kantando. (Sal. 68, 7). El ke kería, entonava kantigas i el ke no kería, yorava».
«Además» disho Rabí Yosé, «el Santo Bindicho El se asenta i aze eskaleras por las kualas aze suvir a uno i abashar a otro, umilia a uno i ennaltese a otro. Esto es lo ke está eskrito: Komo el Dio es el djuzgador, a éste umilia i a éste ennaltese (Sal. 75, 8)».
Fuente foto rabino: UCL LIBRARY
