eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 158
Ambezaron muestros maestros: Disheron los savios: «Todo el ke kome i no se lava las manos es kulpavle».
Esto ambezaron a muestros maestros respekto al lavarse las manos: «Antes de la komida es un presepto, i después de komer una uvligasión».
Disheron muestros maestros: «Akontesió en el tiempo de las persekusiones relijiozas ke avía un lokandier ke kozinava karne de puerko i karne permitida, en manera ke no dava a konoser a dingunos ke era djudió, i tenía el uzo de azer asentar a kada uno ke entrava. Si no se lavava las manos, savía ke era pagano, i le servía karne de puerko. Ma si se lavava las manos, savía ke era djudió, i le servía karne permitida.
Una vez entró un djudió a komer ayí i no se lavó las manos.
El lokandier le sirvió karne de puerko, i él se la komió.
Kuando fue a azerle el kuento le disho: «Komites un pedaso ke vale diez minas (parás)».
Disho el otro: «Ayer komí por ocho i oy me demandas diez!»
Le respondió el lokandier: «Esto era puerko».
El ombre empesó a trembler, se estremesió entero i esklamó: «Addió, yo so djudió i tú me das komida de puerko!»
Le disho el lokandier: «Kuando vidi ke no te lavates las manos, pensí ke no eras djudió».
Deves saver: «Las primeras aguas le azen komer karne de puerko, i las últimas le kitan la vida».
Fuente foto rabino: UCL LIBRARY
