Las Notas de Matilda – Kuentos Populares: "LOS EXEMPLOS DE LOS RABINOS" – Exemplo 121a

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER

Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986

EXEMPLO 121a

Ambezaron muestros maestros: «No tomes el nombre del Dio en vano (Ex. 20, 7). Disho Rabí Shimón: «No devemos tomar djuramento de ken es sospechozo kon respekto a los djuramentos».

Este el kavzo de Bar Telamión, ke konfirma  la opinion de los maestros.

En una sierta okazión un ombre deshó en depózito a Bar Telamión una bolsa de monedas. Kuando fue a demandar su dinero, el otro se lo niegó, diziendo: «Ya te di atrás todo lo ke me dates».

Le disho el ombre: «Ven kon mí i djuramelo».

Le respondió Bar Telamión: «Iré i te lo djuraré».

Ke izo Bar Telamión? Fue a su kaza i tomó una vara, la vazió i metió adientro mil monedas. Después se fue arrimándose a eya, asta ke yegó al Kal.

Kuando yegó al Kal le disho al ombre: «Toma esta kanya, porké te vo djurar».

El otro tomó la kanya i Bar Telamión le djuró, diziendo:»Djuro por el Dio de la buendad ke todo lo ke me entregates te lo di atrás».

Entonses akel ombre, yeno de tristeza i ravia, echo la vara a tierra i kayeron las mil monedas, esparziéndosen en el suelo.

El ombre se apresuró a arrekojerlas, i Bar Telamión le disho: «Arrekoje, arrekoje, ke  estás arrekojendo lo ke te apartiene».

Fuente foto rabino: UCL LIBRARY