eSefarad Noticias del Mundo Sefaradi
“La sigunda pierna”
Un ombre eskaso se izo hazino de enfluenza, yamó a su ijo i finalmente avrió el portafolio, le dio un poko de parás en la mano i le disho: «Ijo mío, no me estó konsintiendo bien. Va al soko, merka una gayina, métela en una oya, kuzínala i apróntame una buena supa. Vo komer la supa i la gayina, me vo konsintir mijor i me vo meter en pies.»
El ijo muy maraviyado izo lo ke le ordenó el padre, merkó la gayina i la gizó. La golor del gizado bayleó al ijo, ke a kavza de la eskasura del padre no vido nunka en su meza una semejante karne de poyo. Sin poderse kontener, arrankó una pierna del poyo i se la komió kon muncho plazer.
Fue el ijo ande el padre kon el poyo sin la pierna. Miró el padre el poyo i disho: «Kualo akontesió a mi poyo. Deké le manka una pierna? Es ke te la komites tú?»
Le respondió el ijo: «Ke estás diziendo, papá? Ansina son todas las aves. Tienen una sola pierna. Si no te kreyes, mos alevantaremos amanyana presto i miraremos las aves de la ventana, i vas a ver kon tus ojos…».
Se alevantaron presto, salieron afuera i vieron un grupo de laylekes ke estavan sovre un pie.
«Vites, papá?» disho el ijo, «Ya te lo dishi yo!»
El padre dio palmas i gritó: «Kirrrrrrsh!». Los laylekes se espantaron, abasharon la piena duvlada i se fuyeron.
«Vites?» disho el padre al ijo, «Vites ke las aves tienen dos piernas? Es ke komites una pierna de mi poyo?»
Disho el ijo: «Papá, ke haham sos tú! Izites a los laylekes «Kirrrrrsh!» I eyos abasharon la sigunda pierna. Si azías esto al poyo ke gizí para ti, él también iva a abashar la sigunda pierna…».
Kontado por MATILDA KOEN-SARANO – 2013
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
