eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
LA IDA ESTA EN MI MANO, LA VINIDA NO SE KUANDO
Al amaneser de un día salió ham Moïse, el famozo Rambam, para ir al kal sentral de la sivdad. A la mizma ora salió el rey Ben-Maruán kon su guardia. El rey i el Rambam se enkontraron en el kamino de la djudería.
«Ande se va el famozo ham a esta ora temprana?» demandó el rey.
«Me vo a rogar al Dio, al Senyor del mundo, ke todo está en su mano.» le respondió el ham, «I onde va el onorable Rey?»
«Yo me vo a kasar, i a la vinida pasaré en rivista la kavalería de mi armada.»respondió el rey kon muncho orgolyo.»Ke tus kaminos sean seguros!» adjustó el rey.
«I tus kaminos también.» respondió el ham, «Ma la persona save komo se va, ma no save komo viene.» adjustó el ham.
El rey se aravió muncho de oyir las últimas palavras del ham, porké pensó ke no se dizen estas palavras a un rey. Komandó pishín al kapitán de su guardia de meter el ham en el karakol.
Salió el rey a kasar en el bosko, ma no pasó una ora ke su kavayo se kayó i el rey se dio kontra un arvolé. El prove de rey se metió a la kama kon munchas dolores i sin su kavalería.
Pasaron dos días i el rey se akodró de ham Moïse. Pishín demandó al kapitán de liberar el haham i de akompanyarlo al palasio.
Kuando aparesió el ham delantre del rey, los vezires i los notables, le disho el rey: «Yo te devo demandar pardón, entonses dime tus keshas.»
«No tengo dinguna kesha,» le respondió el ham, «porké tú me dates dos días para rogar al Senyor del mundo ke me líbere.»
«Munchas grasias, Ham Moïse,» disho el rey, tomó la mano del ham i le dio munchos regalos. Komandó al kapitán de su guardia de akompanyar al ham a su kaza kon muncha onor.
I a sus vezires i notables surprendidos el rey kontó lo ke le arivó l`otro día al amaneser: «Ambezavos la verdad de la palavra del haham: la ida está en muestra mano, ma la vinida no savemos kuando.»
Kontado por NOAM-CLAUDE GABRIEL – 2002
Notado i redaktado por MATILDA KOEN-SARANO
