eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
“El Rabino i Eliau Anaví”
En el anyo 1920 el Rav Nisim Binyamín Ohana resivió una letra del Rav Eliashar, ande estava eskrito: “Te estó mandando un rabino ke va a tomar tu lugar, i ke va a arivar en los próksimos días a Malta. Te rogo ke te okupes de él i ke lo presentes a la komunitá. I a ti te nómino rabino de Port-Saíd en Ejipto”.
El Rabino i la Rubisa se aprontaron al viaje. Embalaron sus kozas i los sakros atuendos de plata, i aprontaron un sakito de komanya para los días del viaje en mar.
La Rubisa, yena de preokupasión, le dize al Rabino: “Komo vamos a azer pasar los atuendos de plata i muestras parás avansadas por la duana ejipsiana?”
Los funksionarios de la duana eran konosidos por tomar el maaser[1] de las kozas de los ke entravan por las puertas del porto.
Ademas dize la Rubisa: “Komo vamos a guadrar todo muestro dinero de los ladrones i los embroliones ke se topan sovre la nave?”
I el Rabino, kon su kara serena dize a su mujer: “El Dio mos va protejar i no mos va abandonar”.
La famiya del Rabino, akompanyada por los notables de Malta, suve a la nave i se arresenta en las kabinas, i las kriaturas están alegres i kontentes en vista de la aventura ke las aspera.
Pasan los días del viaje, i la nave ariva al porto de Port-Saíd. Los pasajeros suven al ponte kon sus bagajes.
La Rubisa se adresa al Rabino kon grande preokupasión: “Ya arivimos. I agora komo vamos a pasar?”
El Rabino, kon la kara trankila i yena de luz le reponde: “No te preokupes! No te dishi ke El ke no se puede mentar se está preokupando i mos va a ayudar?”
La Rubisa, kon validjas en las dos manos, i kon dos kriaturas ke le aferran el fostán, suve al ponte.
Entremientres sovre el debarkader se dispozan dos rangos de soldados, una punta de los kualos empesa a los piezes de la rampa de la nave, i la otra ariva a la entrada de la duana. La Rubisa está echando ojadas preokupadas al marido, i él tiene en la kara su sunriza serena i trankilizante.
La famiya está en el rango para abashar al debarkader, enkavesada por el rabino. Un chiko paso detrás de él están su mujer i sus kriaturas.
Los pasajeros empesan a abashar i pasan en medio a los dos rangos de soldados. Antes los adresan al edifisio de la duana, para ke deshen sus bagajes. Después eyos vienen pasados al edifisio de la karantina, para resivir la dizinfeksión kontra los piojos i otros insektos, i la vaksinasión kontra malatías i epidemías. Después de estas penas los pasajeros pasan a las manos de los duanieres, ke avren sus pakietos a los ojos de todos, mientres ke sus manos prestozas azen despareser de vez en kuando una koza ke les parese de valor. Los funksionarios de la duana miran en las aldukeras de las personas “por miedo de kontrabanda”.
La Rubisa mira al marido kon grande preokupasión, murmureando una orasión.
El Rabino, ke está rogando i él al Patrón del mundo, sunriye a eya i a las kriaturas.
I ensupitó de la otra parte de la barriera, la djente se avre en dos i un ombre alto kon la barva i kon ojos briyantes, vistido muy bien i yeno de kavod[2], pasa i entra en el debarkader.
Dinguno no lo keda, i él kon pasos siguros kamina entre los soldados, suve a la rampa del ponte, va ande el Rabino, se inkina, beza la mano del Rabino, i se adresa a él i a la Rubisa en ebreo, diziendo: “Bienvenidos! Shalom a ti, Rabi. Espero ke pasatesh bien el viaje. Vos rogo de vinir detrás de mí”.
I él toma los bagajes de las manos de la Rubisa, se abolta i kamina por primero, avriendo el kamino al Rav i a su famiya.
Eyos abashan de la rampa de la nave al debarkader. El ombre mehubad[3] pasa entre los dos rangos de los soldados i kontinúa derechamente, pasa al lado de los edifisios de la karantina i de la duana i se dirije en derecho a la salida del porto. Yeva la famiya del rabino a la kaye, ande está asperando una karrosa. Karga los bagajes de la famiya, se adresa al veíkolo kon: “Toma esta onorada famiya la kaza de la komunitá djudía”, i ayuda a la Rubisa a suvir a la karroza.
La Rubisa aze asentar a las kriaturas i se abolta para rengrasiar al ombre, ma él ya se desparesió.
Se abolta la Rubisa al marido i le dize: “No izi en tiempo a rengrasiarlo. Ken era este ombre, i porké se desparesió tan presto?”
Le dize el Rabino, kon la kara yena de luz; “No te dishi ke El ke no se puede mentar mos iva a ayudar i no mos iva a abandonar? No lo vites i no lo rekonosites a Eliau Anaví, zahur latov[4]?”
El Rabino se asentó en la karrosa, i partieron para la sivdad.
Kontado por NITZA TZAFRIR RUSSO – 2000
(Sigún el kuento ke le kontó su nono, el Rav Agaón Nisim Binyamín Ohana, ztl.[5], ke fue el Rabino sefaradí de Hayfa )
Traduksión del ebreo de MATILDA KOEN-SARANO
[1] maaser (ebreo): la diezena parte
[2] kavod (ebreo): onor
[3] mehubad (ebreo): onorado
[4] zahur latov (ebreo): en bueno ke se nombre
[5] Zéher Tsadik Livrahá (ebreo): Tsadik de bindicha memoria
B’H. Bello cuento sobre Eliahú.