eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
«EL KAZAMIENTO DE SALAMONIKYU»
La mi madre kontava komo se kazó su nonu, Salamón, kon suya nona, Flora.
Flora era manseva muy ermoza. Era gorfana. Kresió onde suya nona, ke era prove.
Salamonikyu era mansevo lindu i muy bivu. Lavorava en la botika de su padre in la sivdad de Saray (oy Sarajevo), en Bosna.
Salamonikyu stava namurado muy muchu di Flora.
Il padre no kería sentir. El kería una grande dota i no una manseva prove, sin parás.
Lo ke izu Salamonikyu? Kada viarnis tumava unus kuantus dukatus di la kasha di la butika i dava pishkésh a la suya Flora.
Li dizía: «Guarda estu para ti!»
Un día dishu il padre a su iju: «Sienti, Salamonikyu, ya vino il tiempo para ti di kazarte. Viaje a la sivdad Spalato (Split). Vas ser musafir ondi il sinyor M. El es merkader riko, i yo merko ondi él ropa. El tieni tres ijas. Skoji una di eyas, i vas resivir grande dota.»
Dispués di diez-kinzi días turnó Salamonikyu.
«Lu ke iskujites, Salamonikyu» li dishu il padre.
Respondió Salamonikyu: «La grande es guboza, la sekunda es sarnoza, la trisera es di ocho anyos.»
Salamonikyu vino ondi la nona di suya Flora, li dio dukatus i li dishu: «Agora tienis sinkuenta dukatus. Va ondi el mío padre i dizi a él ki Flora keri bien a Salamonikyu. No tieni muchu. Sólo sinkuenta dukatus de dota.»
Dishu il padre: «Si tiene sinkuenta dukatus, ki seya. Es bastante.»
Yamó a Salamonikyu, li dishu: «Floreta te keri. Tiene sinkuenta dukatus. Tú la keris kazar?»
«Sí, mi padre!!» dishu Salamonikyu.
Il padre resivió los sinkuenta dukatus, los mitió atrás in la kasha de la butika, i los dos si kazaron kontentis i alegres.
———————————————————-
Kontado por DANIEL ITZHAKI – 1995
(Del livro «Kuentos de todos los tiempos – La Sosiedad» de Matilda Koén-Sarano, Ed. S. Zack, Yerushaláyim, en vía de publikasión).
