eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
El elefante solitario
Un día fresko de enverano el rey desidió de vijitar el kazal onde bivía Djohá.
Los kazalinos lo aresivieron kon muncha alegría, kon muncho respekto i le ofresieron lo mijor de la kumida ke tenían.
El rey era renomado por ser muy kruel, ma enfrente de la amistad del puevlo desidió de azerles regalo un elefante.
Pasando el tiempo, el elefante komió toda la vedrura, arankó los árvoles, no deshó guerta sana.
Los povretikos de kazalinos, del espanto del rey, no disheron nada i desharon a la hayá azer lo ke le plazía. Ma una demanyana los vizinos de Djohá se adresaron a él i le demandaron lo ke pensa de lo ke se deve de azer para eskabuyirsen de esta beemá.
El les respondió ke lo mijor será de ir i kontar la situasión al rey. Por esto, Djohá arrekojó la mayoría de los kazalinos i se hue enfrente del rey.
El rey preguntó a Djohá: «Porké vinites? Komo está el elefante mío ke vos regalí?»
Djusto ke Djohá iva responderle i esplikarle los danyos ke la hayá avía echo, se aboltó para mirar a los de detrás de él, i a su sorpreza se rendió kuento ke no kedó ni uno, i ke todos se avían fuyido.
Por esto respondió i disho: «Mi rey grande i poderozo, el kazal entero está muy kontente. Keríamos demandarte si puede ser ke mos mandes un otro elefante, porké el elefante muestro se siente muy solo!!»
Kontado por SELIM SALTI – 2012
Redaktado por Matilda Koén-Sarano
