eSefarad Noticias del Mundo Sefaradi
No entendió…
Avía un ombre muy relijiozo. Todo el tiempo rogava al Dio i dizía: «El Dio me siente!»
Un día disheron por radio ke va aver una grande inondasión, i akavidaron a la djente ke se metiera en salvo. Los vizinos le disheron al ombre: «Mos estamos indo de akí. Ven kon mozotros!»
Disho él: «No, yo no me vo menear de akí. El Dio me siente i no me va afitar nada.»
I empesó la inondasión, ke le undió el apartamento al primer etaje. El su suvió a un etaje mas alto.
Pasaron salvadores en barka al lado de su kaza i le disheron: «Suve a la barka!»
El les disho: » No, yo no me vo menear de akí. El Dio me siente i no me va afitar nada.» Viendo esto, akeyos se fueron.
La agua suvió mas arriva i él suvió al último etaje. Pasaron otros kon un vinch i kijeron tomarlo.
El les disho: » No, yo no me vo menear de akí. El Dio me siente i no me va afitar nada.» I se suvió al techo, rogando al Dio..
Vino un elikópter i abashó a tomarlo. Le disheron: «Ayde, ven! Te vas a undir akí!»
Les disho él: » No, yo no me vo menear de akí. El Dio me siente i a mí no me va afitar nada.» I el elikópter se fue.
Kuando la agua arivó a undir toda la kaza, el ombre se murió i suvió al sielo. Kuando arivó ayá, demandó de enkontrarse kon el Dio i le disho: «Patrón del mundo, yo fui muy relijiozo. Tú me sintías siempre i a mí no me iva afitar nada. Ma no fue ansina.»
«Es verdá!» le disho el Dio, «Yo izi de todo para salvarte. Te mandí antes los vizinos, después la barka, después el vinch i a la fin el elikópter. Kualo ke iziera, ke no te kijites menear?»
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
