eSefarad Noticias del Mundo Sefaradi
La santedad del shabat
Avían un marido i una mujer ke tenían tres kriaturas i eran muy proves. Era invierno i azía muncho frío.
Un día chafteó a la puerta un viejiziko. Disho: «Puedo estar un poko akí? Pedrí el kamino.»
Eyos eran muy buena djente. Le disho eya (se yamava Sunhula): «Venga, padre, venga…» le izo banyo, le dio la pijamá del marido. El se asentó ayá. Akeya noche ya tenían de komer. No era djueves aínda. Al otro día kualo le van a dar? No tenían de komer para eyos, komían pan i kezo.
Disho el viejiziko: «Kortaremos la kavrika.»
Disho la mujer: «I después, komo mos vamos a mantener?»
«El Dio es grande, no ay nada!» disho el viejo.
Degoyaron la kavrika i dieron onor en shabat a este viejiziko ke vino a sus kaza. En shabat kale komido karne.
Degoyaron la kavrika, la gizaron para noche de shabat, asentaron al viejo en la kiushé, i él se gustó muncho i estuvo bindiziendo todo.
Demanyana se alevantó el marido para ir al kal. Disho el viejiziko: «V’a vinir i yo!» i los dos se fueron al kal.
La mujer kedó en kaza kon las tres kiaturas. Ensupitó se están sintiendo una bozes de malahimes (ándjeles). Ensupitó korrió a la kaza de Sunhula una mujer, le disho: «Ven Sunhula, ven mira al viejiziko. Mira komo está kantando!» I eya fue.
Después tornó a kaza mas presto para aparejar todo i vido a sus tres kriaturas muertas en basho. Agora, eyos eran muy datís (relijiozos): en shabat no se yora. Kualo izo? Las tomó a las tres kriaturas, las metió al almario i serró la puerta, porké en shabat es asur (defendido) de yorar. Lo van a amargar al viejiziko ke vino musafir?
Kuando ya tornaron todos del kal, le disho el viejo: «Ande están las kriaturas?»
«Na,» disho eya: «vino mi ermana las tomó. No ay nada. Komeremos.»
Kuando ya salieron las estreyas, eya vido ke ya eskapó el shabat i empesó a yorar.
Le disho el viejo: «Kualo ay? Deké estás yorando?»
«Na, mis kriaturas…» disho la mujer.
«Avre el almario.» disho él. Eya avrió el almario, él metió la mano i las kriaturas se arrebivieron.
El viejo era Eliau Anaví. Le disho a la mujer: «De agora en delantre en toda tu vida, todo lo ke vas a tokar se va azer de leche i miel.» i se desparesió.
Miraron: la tinaja está yena de azeyte, los kutís están yenos de asukar, la kaza está yena de todo lo bueno, i las kriaturas están bivas bivas.
Kontado por BENSO – (Estambol – Moadón Yéfet, Yafo) – 1990
Enrejistrado por SHOSHANA WEICH-SHAHAK
Redaktado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Saludos a la señora Matilda: Y gracias por sus maravillosos cuentos, me encanta el español ladino me traen muchos recuerdos de mi abuela paterna. dice mi madre que mi abuela hablaba en esos términos. y ahora me doy cuenta que ella hablaba era español ladino, muchas gracias por los articulos que me envían me encantan.
Att: Consuelo Franco.
Kerida Sinyora Franco,
Munchas grasias or sus jentiles palavras.
Matilda