eSefarad Noticias del Mundo Sefaradi
Kurioza rekuesta
Un mansevo fue ande el haham i le disho: «Sinyor haham, kero demandarle una koza.»
«Dime, ijo mío.» le disho el haham.
«Kero azerme koén.»
«Azerte koén?» le disho el haham, «Tú no puedes azerte koén!»
«Porké no puedo? Ay munchos ke son koanim!»
«Te digo ke no puedes…»
«Si es kestión de parás, yo estó pronto a pagar lo k’es ke sea…»
«Ma deké keres azerte koén?»
«Porké mi padre es koén i mi nono era koén!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
