eSefarad Noticias del Mundo Sefaradi
Ke sorpreza!
Avía un bakal ke vendía guevos, ke estavan en un kutí basho enriva del banko. El patrón de la butika los arresentava i los kontava kada demanyana. Kada demanyana vía ke mankavan algunos.
Pensava: ‘Yo no los vendí. Ken los tomó?’
Empesó a sospechar del vizino, ke era un povereto. ‘Será él ke los toma? Ma kuando? Yo estó akí. No, no, no puede ser. El es un ombre muy onesto…’
A la fin fue ande el haham i le disho: «Kada demanyana, kuando konto los guevos, veo ke mankan tres o kuatro d’eyos.»
Le disho el haham: «Saves kualo vas azer? Toma kuatro, sinko guevos, hamínalos i mételos entre los krudos, i veremos.»
El ombre haminó sinko guevos i los metió entre los krudos.
La demanyana de después, kuando entró a la botika, kualo ke veygan sus ojos? Una grande kulevra estava muerta en basho, kon en la boka un guevo haminado ke la aogó.
Pensó el ombre: ‘No se deve nunka sospechar de las personas onestas!’
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Es un tesoro. Gracias