Las Notas de Matilda – Kuentos: El mansevo ke se kería kazar

El mansevo ke se kería kazar

Avía un mansevo ke se kería kazar. Este mansevo pasava kada día por las botikas i dizía: «Addió, me kazaré, me arresentaré, me se está atrazando la boda.» Dizía: «Kale ke les dé tavlá de plata, si no, no me vo kazar.»

Un día ke él estava en estos penserios, le salió enfrente un ombre, le disho: «Mansevo, kada día te veygo my merekiyozo, kuando pasas por akí. Ke te está pasando?»

«Kada día mi djente dize ke kere una tavlá de plata, ke kere kuchares i pirones de plata… Me se está atrazando la boda.»

«Saves kualo?» le disho el ombre, «Kale ke digas «Si kere el Dio» en tala data ya me estó kazando.»

«Ayde bre!» disho el mansevo, «Agora v’a dizir yo «Si kere el Dio»? Si kere el Dio i si no kere, yo estó pronto para kazar!»

Le disho el ombre: «No, no te vas a kazar, si no dizes ansina.»

«Mira komo me vo kazar!» le disho el mansevo, ma van pasando días i yené está pasando merekiyozo.

Le disho el ombre: » Ya te kazates?»

«No!» le disho el mansevo, » Me están demandando kozas, me estan denteniendo la boda.»

Le disho el ombre: «Si no dizes «Si kere el Dio» no te vas a kazar nunka. Aze ansina: va a la keilá a azerte la tevilá, melda un pokitiko de Teilim i dí «Si kere el Dio»… me kero kazar.»

I ansina, fue a la keilá, izo la orasión i disho: «Si kere el Dio, ke me de la permisión i me kazaré.» I en esta forma se kazó.

Kontado por ZELDA ZABARA-ARAJA (Izmir- Moadón Yéfet, Yafo) – 1990

Enrejistrado por SHOSHANA WEICH-SHAHAK
Redaktado por MATILDA KOEN-SARANO – 2014

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino