eSefarad Noticias del Mundo Sefaradi
Djusta paga
Una vez estava indo un prove por la kaleja, kuando pasó al lado de una butika de karne asada. El guezmo de la karne asada lo kitó loko. Se kedó, kitó un pedaso de pan seko, lo metió enriva del dumán ke estava saliendo de la asadura, i empesó a komérselo.
Viendo esto, el patrón de la butika demandó al prove ke le page.
Le disho el prove: «No tomí nada de ti!»
Le disho el patrón de la butika: «Kon el buen guezmo pudites komerte el pan seko…»
D’akí d’ayá dechizaron de ir al tribunal.
Kuando el djuzgador sintió las dos partes, demandó ke le tragan una payla kon adientro muncha moneda minuta, ke aga muncho bruído.
El patrón de la butika estava muy kontente, i se aserkó para tomar la moneda.
La disho el djuzgador: «Esta moneda no es para ti!»
«Ma deké?» disho el patrón de la butika.
Le disho el djuzgador: «Komo el prove golió sólo el guezmo, tú vas a oyir sólo el son de la moneda!»
Kontado por ELISHEVA VENTURA – 2017
Traduizido i redaktado por MATILDA KOEN-SARANO
———————————————————————-
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
