eSefarad Noticias del Mundo Sefaradi
La mezuzá
Un djidió de nombre Moshé bivía puerta kon puerta kon un kristiano yamado Mario, a la kaza del kual vinían munchas vezes ladrones a rovar.
Un día Mario lo kedó a Moshé i le demandó: «Dime Moshé, kuala es la koza ke tienes en la cherchevé de tu puerta, es un alarme?»
«No, amigo mío, esto se yama mezuzá. Es una de las mitzvás djudías para protejar la kaza. Adietro de este kutí ay una pergamena ande están eskritas algunas orasiones ke protejan la kaza.»
«Siente Moshé, pensas ke podrás meter una mezuzá i sovre mi cherchevé.» le disho Mario, «Me parese ke lavora muy bien.»
«Mira Mario, la mezuzá es para las kazas de los djidiós.»
Ma Mario metió innat: «Mozotros semos todos ijos de Dios. Mozotros dos semos amigos de munchos anyos…»
«Bueno» se konvensió Moshé, «Por la larga amistá entre mozotros, yo vo meter una mezuzá en la puerta de tu kaza.»
Unos kuantos mezes después Mario batió a la puerta de Moshé i le disho: «Eskúzame, ma kero darte atrás la mezuzá.»
«Ke afitó?» le demandó Moshé, «Están entrando deynda ladrones a tu kaza?
«No» disho Mario, «los ladrones no están entrando mas, ma de kuando me metites la mezuzá, kada 15 minutos tanye la kampanika de la puerta i viene djente ke demanda donasiones para kales, para eskolas djudías, para proves i mas i mas…Izi kuento i ariví a la konkluzión ke las donasiones me kostan mas de lo ke toman los ladrones!»
Kontado por ELISHEVA VENTURA – 2018
Traduizido i redaktado por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
